ހައްޔަރުކުރިއަސް ދީނާއި ރަސޫލާއަށް އޮތް ލޯތްބެއް ބަދަލެއް ނުވާނެ: އަދުރޭ
27 އޮކްޓޯބަރު 2019 | އާދީއްތަ 10:59ރައީސް ޔާމީން އިސްލާމް ދީނާ ހިލާފް ގިނަ ވާހަކަފުޅުތައް ދައްކަވާފައިވޭ
އަބްދުއްރަހީމް
އިސްލާމް ދީނާއި ކީރިތި ރަސޫލާއަށް އޮތް ލޯތްބެއް ބަދަލެއް ނުވާނެ ކަމަށާއި އިސްލާމް ދީނާއި ކީރިތި ރަސޫލާއަށް ފުރައްސާރަކުރާ ފަރާތްތަކާ ދެކޮޅަށް އަޑު އުފުލާނެ ކަމަށް އިދިކޮޅު ޕީއެންސީގެ ރައީސް އަދި ރައްޔިތުންގެ މަޖިލީހުގެ ފުނަދޫ ދާއިރާގެ ކުރީގެ މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
އިސްލާމް ދީނާއި ކީރިތި ރަސޫލާއަށް ފުރައްސާރަކޮށް މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިން ނެރުނު ރިޕޯޓާ ދެކޮޅަށް ކުރިއަށް ގެންދާ ހަރަކާތްތައް، ނުހުއްޓުވޭނެ ކަމަށް ވިދާޅުވެ އަދުރޭ ކުރެއްވި ޓްވީޓްގައި ވިދާޅުވީ ޕީޕީއެމްގެ އޮފީސް ދޮރުމަތީގައި ފުލުހުންނަށް ޓޭޕް ދެމިދާނެ ކަމަށާއި އަދި އޮފީސް ވެސް ބަންދުކުރެވިދާނެ ކަމަށެވެ. އަދި ޕީއެންސީއާއި ޕީޕީއެމްގެ އިތުރުން އެމްޑީއެންއާ ދެކޮޅަށް އަޑުއުފުލާ އެންމެން ހައްޔަރުވެސް ކުރެވިދާނެ ކަމަށެވެ. އެކަމަކު މުސްލިމު ދިވެހި ރައްޔިތުންގެ ހިތްތަކުން އިސްލާމް ދީނަށާއި ކީރިތި ރަސޫލާއަށް އޮތް ގަދަރާއި ލޯބި ބަންދު ނުކުރެވޭނެ ކަމަށްވެސް އަބްދުރަހީމް ވިދާޅު އެވެ.
އޭނާ އިތުރަށް ވިދާޅުވީ ސަރުކާރު ހިންގުމުގެ ބާރާއި ގާނޫނާ ހެދުމުގެ ބާރު ލިބި، ޝަރުއީ ދާއިރާ ބޭނުން ގޮތަކަށް ބަދަލުކުރުމުގެ ފުރުސަތު އޮތް ނަމަވެސް އިސްލާމް ދީނަށް ގޮންޖަހާ، ރަސޫލާއަށް ފުރައްސާރަ ނުކުރުމަށް އެދިވަޑައިގަންނަވާ ކަމަށެވެ. އަދުރޭ ވިދާޅުވީ އިލާހީ ގާނޫނު މާބާރުގަދަ ވާނެ ކަމަށާއި ކަމެއް ވާށޭ ވަހީ ކުރެއްވުމުން ލަހެއްފަހެއް ނުވެ އެކަމެއް ވާނެކަން ގަބޫލުކުރަންޖެހޭ ކަމަށެވެ.
އެމްއެންޑީއެންގެ އެ ރިޕޯޓާއި ގުޅިންގެ ޕީޕީއެމާއި ޕީއެންސީ ގެންދަނީ ޕީޕީއެމް އޮފީސް ކުރިމަތީ މުޒާހަރާ ކުރަމުންނެވެ. އަދި ބައެއް ރަށްރަށުގައި ވެސް އެއްވުންތައް ބާއްވަމުން ދެއެވެ.
އެއްވުންތަކާއި ގުޅިގެން ފުލުހުން ނެރުނު ބަޔާނެއްގައި ވަނީ ގާނޫނާ ހިލާފަށް އެއްވުންތައް ބާއްވަން ފުރުސަތު ނުދޭނެ ކަމަށެވެ.
ފުލުހުން ބުނީ، ފަހަކަށް އައިސް ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް ބައެއް ފަރާތްތަކުން އެއްވުން އިންތިޒާމްކޮށް ކުރިއަށް ގެންދިއުމާއި އެފަދަ ބައެއް އެއްވުންތަކުގައި ގާނޫނާ ހިލާފު އަމަލުތައް ކުރަމުންދާކަން ފާހަގަކުރެވިފައިވާ ކަމަށެވެ.
އަބްދުއްރަހީމަކީ، މިނިދިޔަ ރައީސް އަބްދުﷲ ޔާމީންގެ ސަރުކާރުގެ ދުވަސްވަރު އެންމެ ނުފޫޒުގަދަ އެއް ފަރާތެވެ. ޕީޕީއެމްގެ ނައިބު ރައީސްގެ ގޮތުގައި އަދި ރައްޔިތުންގެ މަޖިލީހުގެ ޕީޕީއެމްގެ އިސް މެމްބަރެއްގެ ގޮތުގައި އުޅުއްވި ދުވަސްވަރު، "ކޮހިނޫރު" އަނގޮޓި އަޅުއްވާ، އަގުބޮޑެތި ފްލެޓާއި މުދާ، ބައްލައިގެން ކަމުގެ ތުހުމަތު ކުރެވޭ ފަރާތެކެވެ.
ރައީސް ޔާމީންގެ ސަރުކާރުން ވަނީ މިހާތަނަށް ދިވެހި ދައުލަތުގައި ހިންގި އެންމެބޮޑު ހިޔާނާތް ހިންގާފަ އެވެ. ހަމަ އެކަނި އެމްއެމްޕީއާރުސީގެ ހިނާޔާތުގެ ތެރެއިން އެކަނިވެސް 3.3 ބިލިއަން ރުފިޔާގެ ހިޔާނާތް ހިންގާފައިވާ ކަމުގެ ތުހުމަތުތަކެއް ވަނީ ކުރެވިފަ އެވެ.
މީގެއިތުރުން، ކޮރަޕްޝަނާއި ވައްކަމަކީ އިންސާނާގެ ތޮބީއަތުގައި ހުންނަ ކަމެއްކަމަށް ދޭހަވާ ގޮތަށް ރައީސް ޔާމީން ވަހަކަ ދެއްކެވިއިރު، ހަލާލު ނޫން ފައިސާ (އެމްއެމްޕީއާރުސީގެ ފައިސާ) އެމަނިކުފާނުގެ އަމިއްލަ ގެ ކޮޅަށް ވެދަފައިވާ ކަމަށް އަމިއްލަފުޅަށް ވަނީ އިއުތިރާފު ވެވަޑައިގަންނަވާފަ އެވެ. އޭރު އަދުރޭއަކީ ރައީސް ޔާމީންގެ އެންމެ އަރިސް އެއްބޭފުޅާ އެވެ.
