ފަނޑިޔާރު އާދަމް މުހައްމަދުގެ ސުލޫކީ މައްސަލައިގެ އަޑުއެހުން ބުދަ ދުވަހު!
27 އޮކްޓޯބަރު 2019 | އާދީއްތަ 04:13ފަނޑިޔާރު އާދަމް މުހައްމަދުގެ ސުލޫކީ މައްސަލައިގެ އަޑުއެހުން ކުރިން ބޭއްވުމަށް ނިންމާފައިވަނީ އާދީއްތަދުވަހު
ފަނޑިޔާރުންތައް
ޖުޑީޝަލް ސަރވިސް ކޮމިޝަން (ޖޭއެސްސީ) ން ބަލަމުންދާ ސްޕްރީމް ކޯޓުގެ ފަނޑިޔާރު އާދަމް މުހައްމަދުގެ ސުލޫކީ މައްސަލައިގެ އަޑުއެހުން ބުދަ ދުވަހަށް ފަސްކޮށްފި އެވެ.
ފަނޑިޔާރު އާދަމް މުހައްމަދުގެ ސުލޫކީ މައްސަލައިގެ އަޑުއެހުން ކުރިން ބޭއްވުމަށް ނިންމާފައިވަނީ އާދީއްތަދުވަހު އެވެ. މިމައްސަލައިގެ އަޑުއެހުން ފަސް ކުރި ސަބަބެއް ޖޭއެސްސީން ހާމަކޮށްފައެއްނުވެ އެވެ.
ފަނޑިޔާރު އާދަމް މުހައްމަދުގެ ސުލޫކީ މައްސަލައިގެ އަޑުއެހުން ބޭއްވުމަށް ނިންމާފައިވަނީ ހުޅުވާލާއިގެންނެވެ. އެއީ ފަނޑިޔާރުގެ އެދުމުގެ މަތިންނެވެ.
މީގެ ކުރިން ފަނޑިޔާރު އާދަމް މުހައްމަދުގެ މައްސަލަ ބަލައި ޖޭއެސްސީން ވަނީ އޭނާއަށް ނަސޭހަތް ދޭން ނިންމާފަ އެވެ. ނަމަވެސް އެ ނަސޭހަތް އޭނާ ގަބޫލު ނުކުރުމުން، އެއީ ސުލޫކީ މައްސަލައެއް ކަމަށް ޖޭއެސްސީން ނިންމައި އެ ނަސޭހަތް ގަބޫލުނުކުރި މައްސަލަ ބެލުމަށް ޖޭއެސްސީން ފަހުން ނިންމިއެވެ.
މީގެ ކުރިން ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ދީދީގެ މައްސަލަ އާންމުކޮށް ހުޅުވާލައިގެން ދަރުބާރުގޭގައި ވަނީ ބާއްވާފަ އެވެ. އެ މައްސަލަ ބަލައި ފަނޑިޔާރު އަބްދުﷲ ދީދީ މަގާމުން ވަކިކުރުމަށް ޖޭއެސްސީން ނިންމިއިރު ފަހުން ރައްޔިތުންގެ މަޖިލީހުން ވަނީ އަބްދުﷲ ދީދީ އެ މަގާމުން ވަކިކުރުމަށް ފާސްކޮށް މަގާމުން ވަކިކޮށްފަ އެވެ.
މިފަހުން ޖޭއެސްސީން އަންނަނީ ފަނޑިޔާރުންގެ ސުލޫކީ މައްސަލަތައް ބަލާ ފިޔަވަޅު އަޅަމުންނެވެ.
