މެރިން އެކްސްޕޯގެ އެންމެ އުފެއްދުންތެރި އުފެއްދުމަކަށް އެކްޝަން 25 ފިޝިންގ ލޯންޗް

ހުކުރު ދުވަހުގެ ރޭ ނިންމާލި ފަސްވަނަ މޯލްޑިވްސް މެރިން އެކްސްޕޯގެ އެންމެ އުފެއްދުންތެރި ޕްރޮޑަކްޓަކަށް އަލްޝާލީ މެރިންގެ "އެކްޝަން 25 ފިޝިންގ ލޯންޗް" ހޮވިއްޖެއެވެ.

އެކްޝަން 25 ފިޝިންގ ލޯންޗަކީ މަސްވެރިކަމަށް ޚާއްޞަކޮށްގެން އުފައްދާފައިވާ ލޯންޗެކެވެ. އެކްޝަން 25 އަކީ ގާތްގަނޑަކަށް 10 މީހުންގެ ޖާގައިގެ ލޯންޗެކެވެ. ދިގުމިނުގައި 25 ފޫޓު ހުންނަ އެ ލޯންޗުގައި ފާޚާނާއަކާއި އަރާމުކޮށްލުމަށްޓަކައި އެނދަކާއި، 8 ވަރަކަށް ދޮށި ވެސް ލޯންޗުގައި ޖަހާލާފައިވެއެވެ. އަލް ޝާލީ މެރިން މޯލްޑިވްސްގެ ފަރާތުން މި އެވޯޑާ ޙަވާލުވީ އެކުންފުނީގެ އޮޕަރޭޝަންސް މެނޭޖަރ އިސްމާއިލް ޝަރީފެވެ.

މެރިން އެކްސްޕޯގައި އިތުރު އުފެއްދުންތަކަކަށްވެސް އެވޯޑްކުރިއެވެ. އެގޮތުން ބެސްޓް ސްޓޯލް ޑިޒައިން އެވޯޑް އެލިއާ އިންވެސްޓްމަންޓަށް ލިބުނު އިރު ބެސްޓް ކަސްޓަމަރ ސަރވިސް އެވޯޑް ލިބުނީ ޑީޓެކްއަށެވެ. އަދި އިންޓަނޭޝަނަލް ކޮންޓްރިބިއުޓަރ އެވޯޑް ޓްރޭޑް ޕްރޮމޯޓަރސް އަށް ލިބުނު އިރު އަޕް އެންޑް ކަމަރ އެވޯޑް ފޯސައިޓް ސަރވޭޔަރސް އަށްވަނީ ލިބިފައެވެ.

2007 ވަނަ އަހަރުން ފެށިގެން ބާއްވަމުން އަންނަ މި އެކްސްޕޯއަކީ ބޯޓުތަކާއި ކަނޑުގެ އުޅަނދުފަހަރު ބައިނަލްއަޤުވާމީ ޕްލެޓްފޯމެއްގައި ދައްކާލުމަށް ލިބޭ އެންމެ ބޮޑު ފުރުޞަތެވެ. އެގޮތުން، އުޅަނދުފަހަރު ބަންނަ މީހުންނާއި ސަޕްލަޔަރުންނާއި ޚިދުމަތް ފޯރުކޮށްދޭ މީހުންގެ އިތުރުން ބޮޑެތި ކުންފުނިތަކުންނާއި ވިޔަފާރިވެރިންނާ ގުޅުން ބަދަހި ކުރުމަށް މި އެކްސްޕޯގެ ތެރެއިން ފުރުޞަތު ލިބިގެން ދިޔައެވެ.

ތިން ދުވަހުގެ މުއްދަތަކަށް ކުރިއަށް ގެންދިޔަ މި އެކްސްޕޯގައި 30 ފަރާތަކުން ބައިވެރިވެފައިވާއިރު 52 ސްޓޯލެއް ބަހައްޓާފައިވެއެވެ.