ނޭޝަނަލް ރޯޑް ސޭފްޓީ އެކްޝަން ޕްލޭން އިފްތިތާފްކޮށްފި

މަގުމަތީގެ ސަލާމަތާ ރައްކާތެރިކަން ގާއިމުކުރަން ތައްޔާރުކުރެވިފައިވާ ނޭޝަނަލް ރޯޑް ސޭފްޓީ އެކްޝަން ޕްލޭން އިފްތިތާފްކޮށްފިއެވެ.

ބުރާސްފަތި ދުވަހުގެ ރޭ ހޮޓެލް ޖެންގައި ބޭއްވި ރަސްމިއްޔާތެއްގައި އެކްޝަން ޕްލޭން އިފްތިތާފްކޮށްދެއްވީ ރައީސުލްޖުމްހޫރިއްޔާ ނައިބް ފައިސަލް ނަސީމްއެވެ.

އެކްޝަން ޕްލޭންއާ ބެހޭ ގޮތުން ޑަބްލިޔުއެޗްއޯގެ ފަރާތުން ނޭޝަނަލް ޕްރޮފެޝަނަލް އޮފިސަރ ފާތުމަތު ހުދާ ވިދާޅުވީ އެކްޝަން ޕްލޭންގައި 2019 އިން 2023 އަށް މަގުމަތީގެ ސަލާމަތާއި ރައްކާތެރިކަން ކަށަވަރުކުރަން ގިނަ ކަންތައްތަކެއް ގާއިމްކުރެވިގެންދާނެ ކަމަށެވެ.

ހުދާ ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރުކުރަން ފިޔަވަޅުތަކެއް އަޅަންޖެހިފައިވާކަން ކަން ގަބޫލުކޮށް 2017 ވަނަ އަހަރު ނޮވެންބަރު މަހު ޑަބްލިޔުއެޗްއޯގެ މެންބަރ ގައުމުތަކުން ވަނީ ބައްދަލުވުމެއް ބާއްވާ ލަނޑުދަނޑިތަކަކަކަށް އެއްބަސްވެފައި ކަމަށެވެ. މިއީ މަގުމަތީގައި ދިމާވާ އެކްސިޑެންޓުތަކުގައި މަރުވާ މީހުންގެ އަދަދު މަދު ކުރުމަށް ގައުމުތަކުން އަޅާނެ ފިޔަވަޅުތައް ގައިޑްކޮށްދޭނެ މަގުޗާޓެއް ކަމަށެވެ. އަދި ދުނިޔޭގެ ފެންވަރުގައި ހާސިލްކުރާނެ ޓާގެޓްތައް ކަނޑައެޅުމުގެ ބޭނުމަކީ ދެމެހެއްޓެނިވި ތަރައްގީގެ ލަނޑުދަނޑިތައް ހާސިލްކުރުން އަދި ދުނިޔޭގެ ފެންވަރުގައި މަގުމަތީގެ ރައްކާތެރިކަން އާންމުން ހޭލުންތެރިކުރުވުން ކަމަށެވެ.

ހުދާ ވިދާޅުވީ މަގުމަތީގެ ސަލާމަތާ ރައްކާތެރިކަން ކަށަވަރުކުރުމަކީ މުހިންމު ކަމެއްކަން ދެކި ދެމެހެއްޓެނިވި ތަރައްގީގެ ލަނޑުދަނޑިތަކުގެ ތެރޭގައި 2020އަށް ދުނިޔޭގެ މަގުމަތީގަ ހިނގާ ހާދިސާތަކުގަ މަރުވާ މީހުން އަދަދު އަދި އަނިޔާ މީހުންގެ އަދަދު ދެބައިކުޅަ އެއްބައި ދައްކުރަން ވަނީ ހިމަނާފައިވާ ކަމަށެވެ. އަދި ގައުމުތަކުގެ ފެންވަރުގައި ނަތީޖާ ނެރެވޭނެ ފަދަ ގޮތަކަށް މަސައްކަތްތައް ރާވާލުމަށް ވެސް މި އެކްޝަން ޕްލޭން އެހީއަށްވާ ކަމަށް އޭނާ ވިދާޅުވިއެވެ.

"މީގެ ތެރެއިން ގިނަ ޓާގެޓަކީ 2030 ވަނަ އަހަރު ނިމެންވާއިރަށް ގައުމުތަކުން ހާސިލްކުރަންޖެހޭ ލަނޑުދަނޑިތައް ނަމަވެސް މީގެ ތެރެއިން އެންމެ ފުރަތަމަ ޓާގެޓަކީ 2020 ވަނަ އަހަރު ނިމެންވާއިރު ގައުމުތަކުން ނޭޝަނަލް ރޯޑް ސޭފްޓީ އެކްޝަން ޕްލޭނެއް ހަދާއެއަށް އަމަލުކުރަން ފެށުން. ދިވެހިރާއްޖެއިން މިއަދު މިވަނީ ގްލޯބަލް ޓާގެޓްގެ އެންމެ ފުރަތަމަ ޓާގެޓް ހާސިލްކުރުމަށް ފުރަތަމަ ފިޔަވަޅުއަޅާފަ. މަގުމަތީގެ ހާދިސާތަކުގަ މަރުވާ މީހުންގެ ތެރެއިން 25 އިންސައްތަ މީހުންނަކީ ދެކުނު އިރުމަތީ އޭޝިޔާ ބައްރުގެ 11 ގައުމުގެ ތެރޭގައި ހިމެނޭ މީހުން" ހުދާ ވިދާޅުވިއެވެ.

މަގުމަތީގެ ސަލާމަތާ ރައްކާތެރިކަން ކަށަވަރުކުރުމަށް މިހާރު ކުރެވެމުންދާ މަސައްކަތްތައް ސްޕީޑް އަވަސްކޮށް 2020 ލަނޑުދަނޑިތައް ހާސިލްކުރުމަށްޓަކައި މިސަރަހައްދުގެ 11 ގައުމުގެ ހެލްތް މިނިސްޓަރުން އެއްބަސްވުމެއްގައި ސޮއިކޮށްފައިވާކަން ފާހަގަކުރައްވައި ހުދާ ވިދާޅުވީ މަގުމަތީގެ ރައްކާތެރިކަމަށްޓަކައި މަސައްކަތް ކުރުމަށް ދުނިޔޭގެ ފެންވަރު އަދި ސަރަހައްދީ ފެންވަރުގައި ވެސް ރާއްޖެއިން އެކި ކޮމެޓްމެންޓްތައް ދިނުމަށް އެއްބަސްވެފައިވާ ކަމަށެވެ.

ހުދާ ވިދާޅުވީ މިއެކްޝަން ޕްލޭންގެ މައިގަނޑު މަގުސަދުތަކަކީ މަގުމަތީގަ ހިނގާ ހާދިސާތަކުން މަރުވާ މީހުންގެ އަދަދު އަދި އަނިޔާ މީހުންގެ އަދަދު ދެބައިކުޅަ އެއްބަޔަށް މަދުކުރުން ކަމަށާއި، މަގުތަކުގެ ރައްކާތެރިކަން ކަށަވަރުކުރުމާއެކު ބޭނުންކުރެވޭ އުޅަނދުތައް ރައްކާތެރިކަން ޔަގީންކުރުން ކަމަށެވެ.

ހުދާ ވިދާޅުވީ އާންމު ރައްޔިތުން މަގު ބޭނުންކުރުމުގައި ސަމާލުވުމަށް މަގު ބޭނުންކުރާ ރައްކާތެރި ގޮތްތަކާއި ހޭލުންތެރިކަން އިތުރުކުރުމުގެ އިތުރުން ގާނޫނާއި ގަވާއިދުތައް ހަރުދަނާކުރާނެ ކަމަށެވެ. އަދި ގާނޫނާއި ގަވާއިދުތައް ތަންފީޒުކުރުން ހިމެނޭ ކަމަށް އޭނާ ވިދާޅުވިއެވެ.

މަގުމަތީގެ ރައްކާތެރިކަން މެނޭޖްކުރުމުގެ ގޮތުން މިއެކްޝަން ޕްލޭންގެ ތެރެއިން ކުރަން ނިންމާފައިވާ ބައެއް މުހިންމު ކަންތައްތަކުގެ ތެރޭގައި ސަރުކާރުގެ ތެރޭގައި ރޭޑް ސޭފްޓީ ބޯޑެއް ގާއިމްކުރުމާއި، ރޯޑް ސޭފްޓީ ޓެކްނިކަލް ކޮމެޓީއެއް ގާއިމްކުރުމާއި، ރޯޑް ސޭފްޓީގެ މަސައްކަތް ކުރުން އިސް އެޖެންސީއެއް ކަނޑައެޅުން އަދި ރޯޑް ސޭފްޓީ ފަންޑެއް ގާއިމްކުރުން ހިމެނެ އެވެ. އަދި މަގުތަކުގެ ފެންވަރު ރަނގަޅުކުރުމަށްޓަކައި ގަވާއިދުން މަގުތަކުގެ ރައްކާތެރިކަން އޮޑިޓް ކުރުމާއި އާންމުންގެ ދަތުރުފަތުރުގެ ނިޒާމު ހަރުދަނާކުރުން ވެސް ހިމެނެ އެވެ.

''މަގުގައި ދުއްވާ އުޅަނދުތައް ރައްކާތެރިކަން ކަށަވަރުކުރުމުގެ ގޮތުން އެކްޝަން ޕްލޭންގައި ކުރަން ރާވާފައިވާ ކަންތައްތަކުގެ ތެރޭގައި އުޅަނދުތަކުގެ ރައްކާތެރިކަމަށް މިހާރު ހެދިފައިވާ ގަވާއިދުތައް ތަންފީޒު ކުރުން. އެތެރެކުރެވޭ އުޅަނދުތަކަކީ ގައުމީ އަދި ބައިނަލްއަގްވާމީ މިންގަނޑުތަކަށް ފެތޭ އުޅަނދުތަކަށްވުން، ގާނޫނާ ގަވާއިދުގެ ޒަރިއްޔާއިން އުޅަނދުތަކުގެ ރައްކާތެރިކަން ކަށަވަރުކުރުން ހިމެނޭ. ރައްކާތެރި ގޮތުގައި މަގު ބޭނުން ކުރުން ހަރުދަނާ ކުރުމަށް ގަވާއިދުތައް ތަންފީޒުކުރުން ހަރުދަނާ ކުރުން.'' ހުދާ ވިދާޅުވިއެވެ.

އެކްޝަން ޕްލޭންގައި މިހާރު ލައިސެންސް ދިނުމުގެ ނިޒާމު ހަރުދަނާ ކުރުން ވެސް ހިމެނެ އެވެ.