މިއަދަކީ އެޑިއުކޭޝަންގެ އެކްސްޕޯގެ ފަހު ދުވަސް
މިފަހަރުގެ އެކްސްޕޯގައި ގިނަ އެގްޒިބިޓަރުން ބައިވެރިވެފައިވޭ
އެޑިއުކޭޝަން އެކްސްޕޯގެ ތެރެއިން
މިއަދަކީ މޯލްޑިވްސް އިންޓަރނޭޝަނަލް އެޑިއުކޭޝަން އެންޑް ކެރިއަރ އެކްސްޕޯގެ ފަހު ދުވަހެވެ.
މޯލްޑިވްސް އެގްޒިބިޝަން އެންޑް ކޮންފަރެންސް ސަރވިސަސް އާއި އަސަރީ ސަރވިސަސް ގުޅިގެން ބާއްވާ މި އެކްސްޕޯއަކީ ރާއްޖޭގައި ބާއްވާ މި ސިރީޒްގެ 4 ވަނަ އެކްސްޕޯއެވެ. އެކްސްޕޯ ބުރާސްފަތި ދުވަހު ފަށާފައިވާއިރު އެކްސްޕޯ ކުރިއަށްދާނީ މިރޭ 22:00 ޖެހުމާއި ހަމައަށެވެ.
އަސަރީ ސާރވިސަސްގެ އިވެންޓް ޑިރެކްޓަރ އައިޝަތު މުއީނާ ވިދާޅުވީ މިފަހަރުގެ އެކްސްޕޯގައި ގިނަ އެގްޒިބިޓަރުން ބައިވެރިވެފައިވާ ކަމަށާއި އެކްސްޕޯ އަށް ގިނަ އަދަދެއްގެ ފަރާތްތަކުން ޒިޔާރަތްކޮށްފައިވާ ކަމަށެވެ.
މި އެކްސްޕޯގައި ރާއްޖެއާ ރާއްޖެއިން ބޭރުގެ 46 އަކަށް ވުރެ ގިނަ އިންސްޓިޓިއުޓްތަކުން ބައިވެރިވެފައިވެއެވެ. އެގޮތުން ރާއްޖޭގެ ފަރާތުން ބައިވެރިވި ބައެއް އިންސްޓިޓިއުޓްތައް ކަމުގައިވާ ސައިރިކްސް ކޮލެޖް، މެޕްސް ކޮލެޖުން ބުނެފައިވަނީ އެކްސްޕޯއަށް އާންމުގެ ފަރާތުން ބޮޑު ތަރުހީބެއް ލިބިފައިވާ ކަމަށާއި މިކަހަލަ އެކްސްޕޯ އަކީ ވަރަށް މުހިންމު އެކްސްޕޯއެއް ކަމަށެވެ.
މި އެކްސްޕޯގައި ރާއްޖެއިން ބޭރުގެ އިންސްޓިޓިއުޓްތަކުން ބައިވެރިވެފައިވާއިރު ލަންކާގެ ގިނަ އިންސްޓިޓިއުޓްތަކުން ބައިވެރިވެފައިވެއެވެ. މީގެ އިތުރުން މެލޭޝިއާ، ޖަރުމަންވިލާތް ފަދަ ޤައުމުތަކުގެ އިންސްޓިޓިއުޓްތަކުން ވަނީ އެކްސްޕޯގައި ބައިވެރިވެފައެވެ. އެ އިންސްޓިޓިއުޓްގެ ފަރާތުން ވެސް ބުނީ މި އެކްސްޕޯގެ ތެރެއިން ކުދިންނަށް މައުލޫމާތު ދިނުމަށް ފުރުސަތު ފަހިވެގެންދިޔަ ކަމަށާއި އަންނަ އަހަރު ވެސް އެކްސްޕޯގައި ބައިވެރިވުމަށް ނިންމާފައިވާ ކަމަށެވެ.
އެކްސްޕޯއަށް ގިނަ އަދަދެއްގެ ކިޔަވާ ކުދިން ޒިޔާރަތްކޮށްފައިވާއިރު އެ ކުދިން ބުނީ އެކްސްޕޯގެ ސަބަބުން ސްކޫލް ނިންމުމަށް ފަހު ކުރިއަށްދާނެ ދާއިރާއެއް އިހްތިޔާރު ކުރުމަށް މަގު ފަހިވެގެން ހިނގައްޖެ ކަމަށެވެ.
މި އެކްސްޕޯއަކީ ރާއްޖޭ އާއި ރާއްޖެ އިން ބޭރުން ލިބެން ހުންނަ ތައުލީމާއި ތަމްރީނު އަދި އިލްމު އުނގެނުމާ ގުޅޭ ތަފާތު ގިނަ މައުލޫމާތު ދަރިވަރުންނާއި ބެލެނިވެރިންނަށް ފޯރުކޮށްދިނުމުގެ މަޤްސަދުގައި ބާއްވާ އެކްސްޕޯއެކެވެ.
