އެމްއެންޑީއެފް އުވާލުމަށްފަހު، އުފައްދާނީ ކޯސްޓުގާޑާއި މެރިން ޕޮލިސް: ސުއޫދު
އެމްއެންޑީއެފް އުވާލަނީ ހަރަދުކުޑަ ކުރަން ކަމަށް ވިދާޅުވި
ސުއޫދު: ސަލާމަތްވާ ފައިސާ ހަރަދު ކުރަނީ ހޮސްޕިޓަލްތައް ތަރައްގީ ކުރަން ކަމަށް ވިދާޅުވި
ރައްޔިތުން އެދޭ ވެރިކަމެއްގައި މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އުވާލައި، އޭގެ ބަދަލުގައި ތިބޭނީ ކޯސްޓުގާޑު އާއި މެރިން ޕޮލިސް ކަމަށް ކުރީގެ ބަންޑާރަ ނައިބު އަދި މަޝްހޫރު ގާނުނީ ވަކީލު ހުސްނުއްސުއޫދު ވިދާޅުވެއްޖެއެވެ.
ސުއޫދު ކުރައްވާފައިވާ ޓްވީޓެއްގައި ވިދާޅުވެފައި ވަނީ ރައްޔިތުންގެ ފައިސާއިން ދުވާލަކު ހަތް މިލިއަން ރުފިޔާ އެމްއެންޑީއެފަށް ހަރަދު ކުރާ ކަމަށެވެ. އެމްއެންޑީއެފް އުވާލުމުން ސަލާމަތް ކުރެވޭ ފައިސާ ހަރަދު ކުރާނީ އަތޮޅުތަކުގެ ހޮސްޕިޓަލްތައް ތަރައްގީ ކުރުމަށް ކަމަށް ސުއޫދު ވިދާޅުވެފައިވެއެވެ.
ދިވެހި އަސްކަރިއްޔާއަށް މިއަހަރުގެ ބަޖެޓުގައި ވެސް އެއް ބިލިއަނަށް ވުރެ ގިނަ ރުފިޔާ ވަނީ ހިމަނާފައެވެ. އެގޮތުން އެއް ބިލިއަން އައްޑިހަ ހަތަރު މިލިއަން ތިންސަތޭކަ ތިރީސް ހަތަރު ލައްކަ ތިންސަތޭކަ ތިރީސް ފަސް ރުފިޔާ ވަނީ އެމްއެންޑީއެފަށް ބަޖެޓްކޮށްފައެވެ. އެގޮތުން މަހެއްގެ މައްޗަށް އެމްއެންޑީއެފަށް އެކަނި ވެސް 90 މިލިއަން ރުފިޔާ ހަރަދު ކުރެއެވެ.
އެމްއެންޑީއެފް އުވާލުމަށްފަހު، ކޯސްޓުގާޑާއި މެރިންޕޮލިސް އެކަނި އުފައްދަން ސުއޫދު ކްރެއްވި ޓްވީޓާ ގުޅިގެން އެކި މީހުން ސޯޝަލް މީޑިއަގައި ދަނީ ޝުއޫރުފާޅު ކުރަމުންނެވެ. އެގޮތުން ސުއޫދާ އެއްކޮޅަށް ވެސް އަދި އެކަމަށް ފާޑުކިޔުން އަމާޒުކޮށް ވެސް ބައެއް މީހުން ދަނީ ޝުއޫރު ފާޅުކުރަމުންނެވެ.
ރައްޔިތުންގެ މަޖިލީހުގައި އަންގާރަ ދުވަހު ބޭއްވި ޖަލްސާގައި އެ ވާހަކައާ ގުޅިގެން، ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ވަނީ ސުއޫދަށް ވަރަށް ބޮޑަށް ފާޑުވިދާޅުވެފައެވެ.
ނިހާން ވިދާޅުވީ އެފަދަ ވާހަކަތައް އެ ދައްކަނީ ރާއްޖޭގެ "އެތެރެވަރި" ނުދަންނަ މީހުން ކަމަށެވެ. ގައުމީ ސަލާމަތަށްޓަކާ އެފަދަ ވާހަކަތައް ދައްކާ މީހުން ވެރިކަމަށް ކުރިމަތިނުލެވޭ ގޮތް ވެސް ހަދަންޖެހޭ ކަމަށް އޭނާ ވިދާޅުވިއެވެ.
"ރާއްޖޭގެ އެތެރެވަރި ނުދައްނަ މީހުން ދައްކާ ދޯހަޅި ވާހަކަތަކުގެ ތެރެއިން ވާހަކައެއް މިއީ. މި ޒާތުގެ ފިލޯސޮފީ ދިވެހިންގެ މައްޗަށް ގެނެސްދޭ ކަން އެންމެ ވައްތަރީ ދިވެހިރާއްޖޭގެ ކަނޑުފަޅުގައި އުޅޭ ތާވަޅު، ބޮލަށް ފިތާފަ ދޫކޮށްލީމަ، އެނބުރޭ ބީދައިން ދަންނަވަނީ އެހެންވެ. މި ގައުމަށް މި ވާހަކަ ތަކުރާރު ކުރަންޖެހެނީ މި ސަބަބުތަކަށްޓަކާ... އަޅުގަނޑުމެންގެ ގައުމަށް މިހާތަނަށް ބޭރުގެ ނުފޫޒުން ވަދެގެން އައި ކޮންމެ ކަމެއް މަތަ ކުރުމުގެ ހިތްވަރާއި ފަންވަރު ދިވެހި ޒުވާނުންނަށް ދިވެހި ސިފައިން ހުރިކަން އޭރާއި މިހާރު ދައްކަދީފަ،" ނިހާން ވިދާޅުވިއެވެ.
