ގައުމީ އުފެއްދުންތެރިކަން ފަސް ބިލިއަން ޑޮލަރަށް އިތުރުކުރީ އެމްޑީޕީން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އަންގާރަ ދުވަހުގެ ރޭ ތޮއްޑޫގައި ބޭއްވި ކެމްޕޭން ޖަލްސާގައި ވާހަކަދައްވަމުން އެމްޑީޕީގެ ރައީސްގެ މަގާމުގައި ވެސް ހުންނެވި ނަޝީދު ވިދާޅުވީ 2008 ވަނަ އަހަރު ވެރިކަމަށް އައުމަށްފަހު އެންމެ ބޮޑަށް އެނގުނު އެއްޗަކީ ދައުލަތަށް ލިބޭ އަމްދަނީ އިންތިހާއަށް ކުޑަ ކަމަށާއި، މަސައްކަތްކުރީ ދައުލަތަށް ލިބޭ އަމްދާނީ އިތުރުކުރަން ކަމަށެވެ.

ނަޝީދު ވިދާޅުވީ 2008 ވަނަ އަހަރު ފާސްކުރި ހަތް ބިލިއަން ރުފިޔާގެ ބަޖެޓެއް ކަމަށާއި، އެ ބަޖެޓުން ހިންގުމުގެ ހަރަދަށް ކެނޑުމަށް ފަހު މަޝްރޫއެއް ހިންގުމަށް ފައިސާ ނުހުންނަ ކަމަށެވެ. އެމަށް ހައްލެއް ގެނައުމަށް އޭރު ކުރެވުނު މަސައްކަތުގެ ނަތީޖާގެ ގޮތުން މިއަހަރު 30 ބިލިއަން ރުފިޔާގެ ބަޖެޓެއް ފާސްކުރެވިފައިވާ ކަމަށް އެ މަނިކުފާނު ފާހަގަ ކުރެއްވެވި އެވެ. 

ނަޝީދު ވިދާޅުވީ ރާއްޖެއަކީ ވަސީލަތްތައްހުރި އަދި އުފެއްދުންތެރިކަން އިތުރުކުރެވޭނެ ގައުމެއް ކަމަށާއި، ބޭނުންވަނީ ސަރުކާރަށް އެއްބާރުލުންދީގެން ގައުމު ހިންގާނެ ބައެއް ކަމަށެވެ. އަތޮޅުތެރޭގެ ރަށްރަށުގައި ގެސްޓްހައުސް ވިޔަފާރިއަށް އަލިއަޅުއްވާލައްވާ ނަޝީދު ވިދާޅުވީ އެ ވިޔަފާރި ހިންގުމަށް ހުއްދަ ދިނުން އެއީ އެމްޑީޕީގެ ވެރިކަމުގައި ކުރެވުނު އެންމެ މުހިންމު އެންމެ ކާމިޔާބު އެއް މަޝްރޫއު ކަމަށެވެ. އަދި ވިދާޅުވީ ވޯލްޑް ބޭންކުން ގައުމެއް ތަރައްގީ ކުރުމަށް މިސާލަކަށް ކ.މާފުށި ނަގަމުން އަންނަ ކަމަށާއި، މިއީ މުޅި ރާއްޖެއަށް ލިބޭ ކުރިއެރުމެއް ކަމަށެވެ.

މީގެ އިތުރުން ނަޝީދު ވިދާޅުވީ ގައުމީ އުފެއްދުންތެރިކަން މިއަދު ހުރީ ފަސް ބިލިއަން ޑޮލަރުގައި ކަމަށާއި، އެއީ 76 ބިލިއަން ރުފިޔާ ކަމަށެވެ. ބޮލަކަށް ޖެހޭ މިންވަރު 15،000 ޑޮލަރަށް އަރާފައިވާ ކަމަށާއި، ރާއްޖެއަކީ މެދު އާމްދަނީ ގައުމެއް ކަމަށް ނަޝީދު ވިދާޅުވިއެވެ.

"އެޖެންޑާ19 ގެ އާމާޒަކީ މިދެންނެވި ހިސާބުތައް އަނބުރާ ދެގުނަކުރުން. ގައުމީ އުފެއްދުންތެރިކަމަކީ ދިހަ ބިލިއަން ޑޮލަރަށް ހެދުން. ބޮލަކަށް ޖެހޭ މިންވަރު ތިރީސް ހާސް ޑޮލަރަށް ހެދުން. އަޅުގަނޑުމެންނަކީ ތަނަވަސް ގައުމަކަށް ތަނަވަސް ދިރިއުޅުމެއް އުޅޭ ރައްޔިތަކު އުޅޭ ގައުމަކަށް މިދިވެހިރާއްޖެ ބަދަލުކުރުން،" ނަޝީދު ވިދާޅުވިއެވެ.