އެމްޑީއެން އުވާލުމަށް ގޮވާލާ އިދިކޮޅުން ރަސްފަންނުގައި އެއްވުމެއް ބާއްވައިފި
އެމްޑީއެންގެ މެންބަރުންނާއި އެ ޖަމިއްޔާގެ މެންބަރުންގެ ތެރެއިން ސަރުކާރުގައި ތިބި މީހުންގެ އިސްތިއުފާއަށް ގޮވާފައިވޭ
ޕީޕީއެމް ޕީއެންސީން ބޭއްވި އެއްވުން
މޯލްޑިވްސް ޑިމިކޮރަސީ ނެޓްވޯކް (އެމްޑީއެން) އުވާލާ އެ ޖަމިއްޔާގައި ހިމެނޭ މެންބަރުން ހައްޔަރުކުރަން ގޮވާލާ އިދިކޮޅުން ރަސްފަންނުގައި އެއްވުމެއް ބާއްވައިފިއެވެ.
އިދިކޮޅު ކޯލިޝަންގެ އިސް ވެރިއެއް ބައިވެރިނުވާ މި އެއްވުމުގައި ތިބީ އިދިކޮޅު މުޒާހަރާތަކުގައި އާންމުކޮށް އަޑު އުފުލަމުންދާ މީހުންނެވެ. އިދިކޮޅުން ރަސްފަންނުގައި އެއްވުމެއް ބާއްވާފައިވަނީ ބުރާސްފަތި ދުވަހުގެ ރޭ ވެސް ޕީޕީއެމް އޮފީސް ކުރިމަތީގައި އެއްވުމެއް ބާއްވާފައި ވަނިކޮށެވެ.
ހުކުރު ދުވަހުގެ ހަވީރު 4 އިން ފެށިގެން 6 ޖަހަންދެން ބޭއްވި މި އެއްވުމުގައި، އެމްޑީއެން ޖަމިއްޔާގެ މެންބަރުން ހައްޔަރު ކުރުމަށާއި، އެ ޖަމިއްޔާގެ މެންބަރުންގެ ތެރެއިން ސަރުކާރުގެ މަގާމްތަކުގައި ތިބި ފަރާތްތައް މަގާމުން ވަކިކޮށް ހައްޔަރުކުރުމަށް ވެސް ގޮވާފައިވެއެވެ.
މީގެ އިތުރުން ކޮމިޝަނަރ އޮފް ޕޮލިސް މުހައްމަދު ހަމީދުގެ އިސްތިއުފާއަށް ވެސް އެއްވުމުގެ ބައިވެރިން ވަނީ ގޮވާލާފައެވެ.
މި އެއްވުން ރަސްފަންނުގައި ބޭއްވި ނަމަވެސް އެއްވުމުގެ ބައިވެރިން ވަނީ މަޖީދީ މަގުން އިރަށް ދިއުމަށް މަސައްކަތްކޮށްފައެވެ. ނަމަވެސް ފުލުހުން ވަނީ އެކަން ހުއްޓުވާ އެ ސަރަހައްދުގައި ބެރިކޭޑް ޖަހާ، ސުލްހަ ވެރިކަމާއެކު އެއްވުން ބޭއްވުމަށް ބައިވެރިންނަށް ނަސޭހަތްތެރިވެފައެވެ. މި އެއްވުމުގައި އެއްވެސް މީހަކު ހައްޔަރުކޮށްފައި ނުވެއެވެ.
