ދުބާއީގައި ބަނގުރަލުގެ ވިޔަފާރި ދަށްވާތީ ގާނޫނަށް ބަދަލު ގެނެސްފި

އެކުވެރި އަރަބި އިމާރާތުގެ ދުބާއީގައި ބަނގުރަލުގެ ވިޔަފާރި ދަށްވަމުންދާތީވެ، ރާ ވިއްކުމުގެ ގާނޫނަށް ބަދަލުގެނެސްފިއެވެ.

މީގެ ކުރިން ދުބާއީގައި ރާވިއްކަމުން ދިޔައީ އެކަމަށް ހާއްސަ ލައިސެންސް ދޫކޮށްފައިވާ ފަރާތްތަކަށް އެކަންޏެވެ.

ފާއިތުވި ދިހަ އަހަރުގެ ތެރޭގައި ރަލުގެ ވިޔަފާރި ހިނާރުވެފައިވާއިރު، އަލަށް އެކުލަވައިލެވުނު ގާނޫނުގެ ދަށުން އެ ގައުމަށް ޒިޔާރާތްކުރާ ފަތުރުވެރިންނަށް ލައިސެންސްއާ ނުލައި ރާ ގަނެވޭ ގޮތް ހަމަޖެހިގެންދާނެއެވެ. މި ގާނޫނާއި އެކު ދުބާއީ އަށް އެތެރެވާ ފަތުރުވެރިންނަށް ފަސޭހަ ކަމާއި އެކު ހުއްދަ ނުނަގައި ރާ ގަނެވޭނެއެވެ.

ހުއްދައާ ނުލާ ރާ ބުއިމަކީ ދުބާއިގައި މަނާ ކަމަކަށް ވިޔަސް ގިނަ ފަހަރުތަކުގައި ރާ ވިއްކާ ތަންތަނުން ހުއްދަ ނެތަސް އައީ ހިދުމަތް ދެމުންނެވެ.

ތެލުގެ މުއްސަނދިކަން ލިބިފައިވާ ދުބާއީ އަކީ އެ ތަނުގެ ރީތިކަން ބަލަން ދުވާލެއްގެ މައްޗަށް މިލިއަނެއްހާ ފަތުރުވެރިން ޒިޔާރާތް ކުރަމުންދާ ސިޓީއެކެވެ. ދުނިޔޭގެ އެންމެ އުސް އިމާރާތް ކަމަށްވާ ''ބުރުޖް ހަލީފާ'' ވެސް ހުންނަނީ ދުބާއީގައެވެ.