އުތުރު ކޮރެއާ އާއެކު ހަތިޔާރުގެ ވިޔަފާރި ކުރުން މަނާ ކުރުމަށް އެކުލަވާލާފައިވާ ބައިނަލްއަޤްވާމީ މުޢާޙަދާ އާއި މިޞްރުން ޚިލާފްވެފައިވާކަން އދ.ގެ ތަޙުޤީޤުން ހާމަވެއްޖެ އެވެ.

މިކަން ފަޅާ އަރާފައި ވަނީ، ކެމްބޯޑިއާގެ ދިދައިގެ ދަށުގައި ދަތުރު ކުރަމުންދިޔަ އުތުރު ކޮރެއާގެ އާގުބޯޓު "ޖިއެ ޝުން" ބަލައި ފާސް ކުރުމުގެ ތެރޭގައި އެވެ. މިޞްރަށް ދަތުރު ކުރި މިބޯޓު ބަލާ ފާސްކުރިއިރު، ބޯޓުގެ ފަލްކާގެ ތެރޭގައި ފޮރުވާފައިވަނިކޮށް 30 ހާހަށް ވުރެ ގިނަ ރޮކެޓް ޕްރޮޕެލްޑް ގްރެނޭޑް ފެނިފައިވާ ކަމަށް ރިޕޯޓްތައް ބުނެ އެވެ. މިތަކެތީގެ ޖުމްލަ އަގު 23 މިލިއަން ޑޮލަރަށް އަރާ ކަމަށް ރިޕޯޓްތައް ބުނެ އެވެ.

މިދިޔަ އޯގަސްޓް މަހުގެ ތެރޭގައި މިޞްރުުގެ އިސްމާޢިލިއްޔާގައި ހުންނަ ސުވޭޒް ކެނަލް އަށް ދަތުރު ކުރަމުންދިޔަ ޖިއެ ޝުންގެ މަޢުލޫމާތު އެންމެ ފުރަތަމަ ހާމަކޮށްފައިވަނީ އެމެރިކާގެ ޖާސޫސީ އިދާރާއިންނެވެ. އެމެރިކާގެ ޖާސޫސީ އިދާރާ (ސީއައިއޭ) އިން ވަނީ އުތުރު ކޮރެއާ އިން ފުރައިގެން، އެޤައުމުގެ ފަޅުވެރިން ތިބި ބޯޓަކާއި މެދު ޝައްކު އުފައްދައި، އެކަން މިޞްރުގެ ކަމާއިބެހޭ އިދާރާތަކުގެ ސަމާލުކަމަށް ގެނެސްފައެވެ. އެބޯޓު މިޞްރަށް ބަނދަރު ކުރުމާއެކު ކަސްޓަމްސްގެ އޮފިޝަލުން އެބޯޓު ބަލާ ފާސްކުރިއިރު ހަތިޔާރުތައް ފެނިފައިވަނީ ދަގަނޑުގެ ބާވަތްތައް ފައްކާ ކުރުމަށް ބޭނުން ކުރާ މަޢުދަނެއް ކަމަށްވާ އަޔަން ޝިޕްމަންޓެއްގެ އަޑީގައި ފޮރުވާފައިވަނިކޮށެވެ.

މިމައްސަލަ އާއި ގުޅުމެއް ނެތް ކަމަށް މިޞްރުން ފުރަތަމަ ބުނި ނަމަވެސް، އދ.ގެ ތަޙުޤީޤު ޓީމުން ވަނީ ބޯޓުން ފެނުނު ހަތިޔާރަކީ މިޞްރުގެ ވިޔަފާރިވެރިންގެ އޯޑަރަކަށް، އެޤައުމުގެ އަސްކަރިއްޔާ އަށް ހޯދައިދިން ހަތިޔާރުކަން ތަޙުޤީޤަށް ހާމަވެފައިވާ ކަމަށް ބުނެފައެވެ.

އދ. ބުނާ ގޮތުގައި މިއީ އުތުރު ކޮރެއާ އާއި ދެކޮޅަށް ދަތިކުރުމުގެ ފިޔަވަޅު އެޅިފަހުން، އުތުރު ކޮރެއާ އިން ކުރާ ހަތިޔާރުގެ ވަގު ވިޔަފާރީގެ ތެރެއިން އަތުލައިގަނެވުނު އެންމެ ބޮޑު ޝިޕްމަންޓެވެ.

އެމެރިކާގެ ވޮޝިންގޓަންގައި ހުންނަ މިޞްރުގެ އެމްބަސީން ވަނީ، ހަތިޔާރުތައް ނައްތާލުމަށް އަދި އދ.ގެ ތަޙުޤީޤަށް މިޞްރުން ފުރިހަމަ އެއްބާރުލުން ދީފައިވާ ކަމަށް ބުނެފަ އެވެ. އަދި މިސްރުން އދ.ގެ ސަލާމަތީ މަޖިލީހުގެ ހުރިހާ ޤަރާރަކަށް ހުރުމަތްތެރިކޮށް ހިތާނެ ކަމަށް މިޞްރުގެ އެމްބަސީން ނެރުނު ބަޔާނުގައި ވެއެވެ.

އެހެން ނަމަވެސް އެމެރިކާ އިން ވަނީ، އެމެރިކާގެ ޖާސޫސީ އޮފިޝަލުން އެބޯޓުގެ ކަންކަން މިޞްރުގެ ކަމާއިބެހޭ އިދާރާތަކުގެ ސަމާލުކަމަށް ގެނައުމާއި ހަމައަށް، މިޞްރުން އުތުރު ކޮރެއާ އާއެކު ހިންގި ހަތިޔާރުގެ މުޢާމަލާތް ސިއްރުކޮށްފައިވާ ކަން ހާމަކޮށްފަ އެވެ.

އުތުރު ކޮރެއާ އާއެކު މިޞްރުން އަސްކަރީ ގުޅުން ބާއްވާ ކަމުގެ ތުޙުމަތުގައި އެމެރިކާ އިން މިދިޔަ ޖުލައި މަހު ވަނީ، މިޞްރަށް ދޭން ކަނޑައަޅާފައިވާ ގާތްގަނޑަކަށް 300 މިލިއަން ޑޮލަރުގެ އަސްކަރީ އެހީ ހިފަހައްޓާފައެވެ.

އދ. އާއި އެމެރިކާގެ މާހިރުން ވަނީ، ބައިނަލްއަޤްވާމީ މުޢާޙަދާ އާއި ޚިލާފަށް ބޭރު ޤައުމުތަކަށް ހެޔޮ އަގުގައި ހަތިޔާރު ވިއްކުމަށް، އުތުރު ކޮރެއާ އިން ބޮޑު ނެޓްވޯކެއް އެކުލަވާލާފައިވާ ކަމަށެވެ.

އުތުރު ކޮރެއާ އާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، އެޤައުމުގެ އިޤްތިޞާދަށް ފައިސާ ވެއްދުމަށް ހަތިޔާރުގެ ވަގު ވިޔަފާރި ކުރާ ކަމަށް ރިޕޯޓްތައް ބުނެ އެވެ. އުތުރު ކޮރެއާ އާއެކު ހަތިޔާރުގެ ވިޔަފާރި ކުރާ ކަމަށް ތުޙުމަތު ކުރެވޭ ޤައުމުތަކުގެ ތެރޭގައި އީރާން، ބަރުމާ، ކިއުބާ، ސީރިއާ، މިޞްރު އަދި އެރިޓްރިއާގެ އިތުރުން ޓެރަރިސްޓުންގެ ދެ ގްރޫޕެއް ހިމެނެ އެވެ.