ކުރީގެ ޕޮލިސް ކޮމިޝަނަރަކު ހިޔާނާތުގެ ފައިސާ ނެންގެވި: ސީޕީ ހަމީދު
ހިޔާނާތުގެ ފައިސާ ނެންގެވި ކަމުގެ ތުހުމަތު ކުރެވޭ ފުލުހުންނަށް ޖިނާއީ ތަހުގީގު ކުރައްވާނެ
ސީޕީ ހަމީދު
އެމްއެމްޕީއާރުސީގެ ބޮޑު ހިޔާނާތުން ގިނަ އަދަދެއްގެ ފައިސާ ފުލުހުންގެ ކުރީގެ ޕޮލިސް ކޮމިޝަނަރަކާއި، އެސިސްޓެންޓް ޕޮލިސް ކޮމިޝަނަރަކު ތަކުރާރުކޮށް ނެންގެވި ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
އެމްއެމްޕީއާރުސީގެ ހިޔާނާތުގެ މައުލޫމާތު ހާމަ ކުރުމަށް ބުރާސްފަތި ދުވަހު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހަމީދު ވިދާޅުވީ، އެމްއެމްޕީއާރްސީގެ ހިޔާނާތުގެ މައްސަލައާ ގުޅިގެން ހިންގާ ތަހުގީގުގައި މިހާތަނަށް ހަތް ފުލުހަކަށް ތުހުމަތު ކުރެވޭ ކަމަށާއި، އޭގެ ތެރޭގައި ފުލުހުންގެ އިސް ފަރާތްތައްވެސް ހިމެނޭ ކަމަށެވެ.
ހަމީދު ވިދާޅުވީ، ހިޔާނާތުގެ ފައިސާ ނެންގެވި ކަމުގެ ތުހުމަތު ކުރެވޭ ފުލުހުންނަށް ޖިނާއީ ތަހުގީގު ކުރައްވާނެ ކަމަށާއި، މިހާރު ކުރިޔަށްދަނީ އެތެރޭގެ ތަހުގީގެއް ކަމަށެވެ.
އެގޮތުން ހަމީދު ވިދާޅުވީ، އެމްއެމްޕީއާރުސީގެ ހިޔާނާތާ ގުޅިގެން އެންޓި ކަރަޕްޝަން ކޮމިޝަން (އެސީސީ) އިން ތައްޔާރުކުރި ރިޕޯޓް މި އަހަރުގެ ފެބްރުއަރީ މަހު ލިބުމާއެކު، 104 ފަރާތަކާ ސުވާލުކޮށް މިހާތަނަށް ބަޔާން ނެގާފައިވާ ކަމަށެވެ.
ނަމަވެސް ހަމީދު ވިދާޅުވީ، މިހާތަނަށް ހޯދުނު ހޯދުންތަކުގެ އަލީގައި މި މައްސަލައިގައި ހިމެނޭ އަދި ސުވާލުކޮށް ބަޔާން ނަގަންޖެހޭ މީހުންގެ އަދަދު ދެގުނައަށް ބޮޑުވެގެން ގޮސްފައިވާ ކަމަށާއި، އެގޮތުން ތުހުމަތު ކުރެވޭ ފަރާތްތަކުގެ ނަންތައް ހާމަކުރެވޭނީ ހުރިހާ އިޖުރާއަތްތައް ފުރިހަމަކުރުމަށްފަހު ކަމަށެވެ.
ރައީސް އަބްދުﷲ ޔާމީންގެ ސަރުކާރުގައި ކޮމިޝަނަރ އޮފް ޕޮލިސްކަން ކުރެއްވީ ހުސައިން ވަހީދާއި، އަހްމަދު އަރީފެވެ. އެކްޓިންގް ކޮމިޝަނަރެއްގެ ގޮތުގައި އަބްދުﷲ ނަވާޒްވެސް ހުންނެވިއެވެ.
އެމްއެމްޕީއާރުސީގެ ހިޔާނާތުގެ މައްސަލައާއި ގުޅުންހުރި މައްސަލައެއްގައި ފުލުހުންތަކެއް ބައިވެރިކަމުގެ ތުހުމަތުގައި މި މަހުގެ 13 ވަނަ ދުވަހުން ފެށިގެން ފުލުހުންގެ ޕްރޮފެޝަނަލް ސްޓޭންޑަރޑްސްއިން އަންނަނީ ތަހުގީގުކުރަމުން ކަމަށް މިދިޔަ ހަފްތާ ތެރޭގައި ފުލުހުން ވަނީ ބުނެފައެވެ.
އެމްއެމްޕީއާރުސީގެ ބޮޑ ހިޔާނާތުގެ މައްސަލައާއި ގުޅިގެން ފުލުހުންތަކެއް ސަސްޕެންޑްކުރި އިރު، ޕްރޮސެކިއުޓާ ޖެނެރަލް އައިޝަތު ބިޝާމް ވަނީ މި ހިޔާނާތުގެ މައްސަލައިގައި ފަނޑިޔާރުންނާއި ސަރުކާރުގެ އިސްފަރާތްތަކާއި އަދި މަޖިލިސް މެންބަރުންތަކެއްގެ ތަހުގީގުކުރެވެމުންދާކަމަށް ވިދާޅުވެފައެވެ.
