ބިޑަކާއި ނުލާ ބޮސްކާލިސްއަށް ދިން މަޝްރޫއުގެ ތެރެއަށް އޭސީސީން ވަދެއްޖެ
ބިޑްކުރުމަކާއި ނުލައި ދައުލަތުގެ މަޝްރޫއުތައް ހަވާލުކުރުމަކީ އެކަމުގެ ސަބަބުން ކޮރަޕްޝަނަށް މަގުފަހިވާކަމެއް
އެންޓިކޮރަޕްޝަން ކޮމިޝަންގެ މެންބަރުން
ބިޑްކުރުމެއްނެތި ގުޅީފަޅުގެ ބިން ހިއްކުމަށް ބޮސްކާލިސް ކުންފުންޏާއި ހަވާލުކުރި މައްސަލައިގެ ތެރެއަށް އެންޓިކޮރަޕްޝަން ކޮމިޝަން (އޭސީސީ) އިން ވަދެއްޖެއެވެ.
މި މައްސަލަ ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ވެސް ވަނީ ހުށަހަޅާފައެވެ. މާލިއްޔަތު ކޮމެޓީގެ ބުދަ ދުވަހުގެ ބައްދަލުވުމަށް އެމައްސަލަ ހުށަހެޅުއްވީ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާއެވެ.
އޭސީސީން މި މައްސަލައިގެ ތެރެއަށް ވަދެ މިއަދު ކުރި ޓްވީޓެއްގައި ބުނެފައިވަނީ ބިޑްކުރުމަކާއި ނުލައި ދައުލަތުގެ މަޝްރޫއުތައް އެކި ފަރާތްތަކަށް ހަވާލުކުރުމަކީ، އެކަމުގެ ސަބަބުން ކޮރަޕްޝަނަށް މަގުފަހިވާ އަދި ދައުލަތުގެ މާލިއްޔާއަށް އިންތިހާއަށް ގެއްލުންވުމުގެ އިހްތިމާލް އޮތްކަމެއް ކަމަށެވެ. އަދި މިކަމަކީ ދައުލަތުގެ މާލިއްޔަތު ގާނޫނާއި ގަވާއިދުގެ ރޫހާ ހިލާފަށްކުރާ ކޮރަޕްޝަންގެ ހިރާސް އޮތްކަމަކަށް ވާތީ އެކޮމިޝަނުން ކަންބޮޑުވާ ކަމަށެވެ.
ދައުލަތުގެ ޕްރޮކިއުމެންޓް ކަންކަން ކުރިއަށް ގެންދިއުމުގައި ދެފުށްފެންނަ ހާމަކަން ބޮޑު އަދި ވާދަވެރި ބީލަމެއްގެ ތެރެއިން ދައުލަތުގެ ޕްރޮކިއުމެންޓް އުސޫލުތަކާ އެއްގޮތަށް ކުރިއަށްގެންދިއުމަށް އޭސީސީން ވަނީ އިލްތިމާސްކޮށްފައެވެ.
ޕްލޭނިންގ މިނިސްޓްރީން ނެރެފައިވާ ނޫސްބަޔާނެއްގައި ބުނެފައިވަނީ މާލޭގެ ތޮއްޖެހުމުގެ މައްސަލަ ހައްލުކުރުމުގެގޮތުން ކޮމާރޝަލް ޕޯޓު ގުޅީފަޅަށް ބަދަލުކުރުމަށް ސަރުކާރުން ނިންމުމާއި ގުޅިގެން، އެ މަސައްކަތުގެ ފުރަތަމަ ފިޔަވަހީގައި ހިއްކުމަށް ހަމެޖެހިފައިވާ 06 މިލިއަން ކިއުބިކް މީޓަރުގެ ބިން ހިއްކުމަށާއި، 4 ކިލޯ މީޓަރުފެ ތޮއްޓެއް ގާއިމުކުރުމުގެ މަސައްކަތް ކޮންޓްރެކްޓް އުސޫލުން މިމަހުގެ 17 ވަނަ ދުވަހު ބޮސްކާލިސް ވެސްމިންސްޓަރ ކޮންޓްރެކްޓިންގް ލިމިޓެޑާއި ހަވާލުކޮށް މަޝްރޫއުގެ އެއްބަސްވުމުގައި ސޮއިކޮށްފައިވާކަމަށެވެ.
180 ދުވަހުގެ ތެރޭގައި މަސައްކަތް ނިންމުމަށް ބޮސްކާލިސް ކުންފުންޏާއި މަސައްކަތް ޙަވާލުކުރުމުން، މާލޭގެ އިންޓީރިއަރ ބަދަލުކޮށް މާލެ ތޮއްޖެހުމުގެ މައްސަލަ ޙައްލުވެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ ވައުދުފުޅާއި އެއްގޮތަށް، މާލެ ހިތް ފަސޭހަ ތަނަކަށް ހެދުމަށް ވަރަށް ބޮޑު ކުރިއެރުމެއް ލިބިގެންދާނެކަމަށް އެ މިނިސްޓްރީން ބުނެއެވެ.
ބޮސްކާލިސް ވެސްމިންސްޓަރ ކޮންޓްރެކްޓިންގް ކުންފުނިން މީގެ ކުރިންވެސް ރާއްޖޭގައި ކާމިޔާބުކަމާއެކު ބިން ހިއްކުމުގެ މަޝްރޫއުތައް ކުރިޔަށް ގެންގޮސްފައިވާއިރު، އެ ކުންފުނިން ވަނީ 2007 އިން 2015 އާއި ދެމެދު ރާއްޖޭގެ މީހުން ދިރިއުޅޭ 10 ރަށެއްގައި ޖުމްލަ 198 ހެކްޓަރުގެ ބިން ހިއްކާފައެވެ.
ގުޅީފަޅުގެ ބިން ހިއްކުމުގެ މަޝްރޫޢޫ ބޮސްކާލިސް ވެސްމިންސްޓަރ ކޮންޓްރެކްޓިންގް ލިމިޓެޑާއި ހަވާލުކުރީ 53 މިލިއަން ޑޮލަރަށެވެ.
