ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ސެކްރަޓަރީ ޖެނެރަލް (އެސްޖީ)ގެ މަގާމަށް ކެލާ ދާއިރާގެ ކުރީގެ މެމްބަރު އަދި އިދިކޮޅު ޕީޕީއެމްގެ ކުރީގެ ސްޕޯކްސްޕާސަން އަލީ އާރިފް ހަމަޖައްސަވައިފި އެވެ.

ޖުމްހޫރީ ޕާޓީގެ އެސްޖީގެ މަގާމަށް އަލީ އާރިފް ހަމަޖެއްސުމަށްފަހު، މަގާމުގެ ލިޔުން ހަވާލުކޮށްދެއްވާފައިވަނީ، ޖުމްހޫރީ ޕާޓީގެ ލީޑަރު، މަޝްހޫރު ވިޔަފާރިވެރިޔާ ގާސިމް އިބްރާހީމް އެވެ.

ކުރިން އެމަގާމުގައި ހުންނެވި ހުސައިން ރަޝީދު ވަނީ މަގާމުން އިސްތިއުފާ ދެއްވާފަ އެވެ. އޭނާ އިސްތިއުފާ ދެއްވީ، ޑަބްލިއު އެޗްއޯގެ ރީޖަނަލް އެޑްވައިޒަރުގެ މަގާމު ލިބިވަޑައިގަތުމުންނެވެ. ހުސައިން ރަޝީދަކީ ހެލްތުގެ ދާއިރާގައި ގިނަ ދުވަހު މަސައްކަތް ކުރައްވާފައިވާ ތައުލީމީ ބޭފުޅެކެވެ. އޭނާ ވަނީ ޖޭޕީގެ އެސްޖީގެ މަގާމުގައި 9 މަސް ދުވަސް ހޭދަ ކުރައްވާފަ އެވެ.

އިދިކޮޅު ޕީޕީއެމްގެ ލީޑަރޝިޕްގެ ގިނަ ބޭފުޅުންނާއި އާންމު ގިނަ މެމްބަރުން ދަނީ ޖޭޕީއާ ގުޅެމުންނެވެ. އެގޮތުން ނިމިދިޔަ 18 ވަނަ ރައްޔިތުންގެ މަޖިލީހުގައި ޕީޕީއެމް ޕާލަމެންޓްރީ ގްރޫޕްގައި ހިމެނުނު، އަދި މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ އިންތިހާބުން ފެއިލްވި ގިނަ ބޭފުޅުން ހިމެނެއެވެ. އޭގެތެރޭގައި، އަލީ އާރިފްގެ އިތުރުން، ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނަކީ 19 ވަނަ މަޖިލިސް އިންތިހާބުގައި ވާދަކޮށް، ބޮޑުތަކުން ފެއިލްވެފައިވާ ބޭފުޅުންނެވެ.

ޕީޕީއެމްގެ ކުރީގެ މެމްބަރުން ޖޭޕީއާ ގުޅެމުންދާތީ، ޖޭޕީ ލީޑަރޝިޕްގައި ހިމެނޭ ބައެއް ބޭފުޅުންނާއި އާންމު ބައެއް މެމްބަރުން ގެންދަނީ ނުރުހުން ފާޅުކުރަމުން ނެވެ.

ޖޭޕީގެ ރައީސް، އަދި ރައީސް އިބްރާހީމް މުހައްމަދު ސޯލިހުގެ ސަރުކާރުގެ ޓޫރިޒަމް މިނިސްޓަރު އަލީ ވަހީދު ޖޭޕީގެ އެއްވެސް ހަރަކާތެއްގައި ބައިވެރިވެވަޑައި ނުގަންނަވާތާ އެއްތައްދުވަހެއް ވެއްޖެ އެވެ. އަލީ ވަހީދު ވަނީ 19 ވަނަ މަޖިލީހުގެ އިންތިހާބުގައި ޖޭޕީން ޕީޕީއެމާއެކު ކޯލިޝަން ހެދުމުން އެކަމާ ނުރުހުން ފާޅު ކުރައްވާފަ އެވެ.

ގާސިމް ގެންދަވަނީ ސަރުކާރު ކޯލިޝަނުގައި ހުންނަވައިގެން، 2023 ވަނަ އަހަރުގެ ރިޔާސީ އިންތިހާބަށް ތައްޔާރުވުމުގެ ގޮތުން ޕާޓީއަށް މެމްބަރުން އިތުރު ކުރުންފަދަ ހަރަކާތްތައް ހިންގަމުން ނެވެ.

ސަރުކާރަށް ޖެއްސުން ކުރުމުގެ މަސައްކަތްތަކެއް ނިމިދިޔަ 18 ވަނަ މަޖިލިސް ނިމެމުންދަނިކޮށް، މަޖިލީހުގެ ތެރެއިން ކުރަމުން ގެންދެވި އެވެ. ނަމަވެސް 19 ވަނަ މަޖިލީހުގެ އިންތިހާބުގައި ސަރުކާރު ކޯލިޝަންގެ މައިޕާޓީ އެމްޑީޕީން ސުޕަރ މެޖޯރިޓީ ހޯދުމާއެކު، މަޖިލީހުގެ ތެރެއިން ޖުމްހޫރީ ޕާޓީއާއެކު އިދިކޮޅު ފަރާތްތަކުން ކުރަމުންދިޔަ ޖެއްސުންކުރުންތައް ވަނީ ހުއްޓުމަކަށް އައިސްފަ އެވެ.