ޓެރަރިޒަމްގެ ތުހުމަތުގައި މާލޭގެ ގެއެއް ފާސްކޮށް، ދެ މީހަކު ފުލުހުންގެ ބެލުމުގެ ދަށަށް
23 އޮކްޓޯބަރު 2019 | ބުދަ 22:11ހައްޔަރު ކޮށްފައިވަނީ ފިރިހެނާކައި އަންހެނަކު
ފުލުހުން ބުރާސްފަތި ދުވަހުގެރޭ ހިންގި އޮޕަރޭޝަންގެ ތެރެއިން
ޓެރަރިޒަމްގެ ތުހުމަތުގައި ބުރާސްފަތި ދުވަހުގެރޭ ފުލުހުން ހިންގި ބަލާ ފާސްކުރުމުގެ އޮޕަރޭޝަންގައި މ. ވޯލްނަޓުން ދެ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން އެ ގެ ފާސްކުރަން ފަށާފައިވަނީ ބުދަ ދުވަހުގެރޭ 11 ޖެހިހާއިރުއެވެ. ދެގަޑިއިރަށްވުރެ ގިނަ އިރުވަންދެން އެ ގެ ބަލާ ފާސްކުރުމަށް ފަހު ފިރިހެނަކާއި އަންހެނަކު ފުލުހުންގެ ވެހިކަލް އަށް އަރުވައިގެން ގެންދިޔަތަން އެތަނުގައި ހަރަކާތްތެެރިވި ރާއްޖެޓީވިގެ ނޫސްވެރިންނަށް ވަނީ ފެނިފައެވެ.
އެކަމާއި ގުޅިގެން ފުލުހުން މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ފުލުހުން ގެއެއް ބަލާ ފާސްކޮށްފައިވާއިރު، ރާއްޖެއިން ބޭރުގައި ހިނގާ ހަނގުރާމަތަކަށް ދިވެހިން ފޮނުވާ ހަނގުރާމަވެރި ޖަމާއަތްތަކުގެ މީހުން ރެކްރޫޓް ކުރުމުގައި ހަރަކާތްތެރިވާ ކަމަށް ތުހުމަތު ކުރެވޭ އުމުރުން 35 އަހަރުގެ މީހަކު ވަނީ ބުދަ ދުވަހުގެރޭ ހައްޔަރު ކޮށްފައެވެ. މައުލޫމާތު ލިބިފައިވާ ގޮތުން ފުލުހުން ފާސްކޮށްފައިވަނީ އެމީހާ ދިރިއުޅޭގެއެވެ.
ފުލުހުން ވަނީ މީގެ ކުރިންވެސް ޝޯޝަލް މީޑިއާގައި ޓެރަރިޒަމް އަށް ހިތްވަރުދިން މީހަކު ހައްޔަރުކޮށްފައެވެ.
މަރު ކޮމިޝަނުގެ ރިޕޯޓާއި ގުޅިގެން ސެޕްޓެމްބަރު މަހުގެ ތެރޭގައި ތަންތަން ބަލާ ފާސްކުުރުމުގެ މަސައްކަތް ފުލުހުން ފަށާފައިވާއިރު ޖުމްލަ 13 ތަނެއް ވަނީ ބަލާފާސްކޮށްފައެވެ. އެއީ މާލެ ސިޓީ އިން 12 ތަނަކާއި އައްޑޫ ސިޓީން އެއް ތަނެވެ.
އެ އޮޕަރޭޝަނަކީ ފުލުހުންގެ ކްރިމިނަލް އިންވެސްޓިގޭޝަން ކޮމާންޑާއި ފޮރެންސިކް ސަރވިސް ޑިޕާރޓްމެންޓް އަދި ޑިވިޒަނަލް ޕޮލިސިންގ ކޮމާންޑުން ކުރިއަށްގެންދާ އޮޕަރޭޝަނެކެވެ. އަދި މޯލްޑިވްސް ޑިފެންސް ފޯސް (އެމްއެންޑީއެފް) އިންވެސް ފުލުހުންނަށް މިކަމުގައި އެހީތެރިކަން ފޯރުކޮށްދެމުންދާކަން ފާހަގަ ކޮށްލެވެއެވެ.
