ޓްރާންސްޕޯޓް މިނިސްޓްރީ ތެރޭގައި ކޮރަޕްޝަންގެ ކަންކަން އެބަހުރި: މިނިސްޓަރ ނަހުލާ
ކަންކަން ހައްލުކުރެވޭނެ ގޮތަށް ހާއްސަ އިސްކަމެއް ދެއްވައިގެން މަސައްކަތް ކުރައްވަން
ޓްރާންސްޕޯޓް މިނިސްޓަރ އައިޝަތު ނަހުލާ
ޓްރާންސްޕޯޓް މިނިސްޓްރީން ދެމުންދާ ހިދުމަތްތަކުގެ ތެރޭގައި ކޮރަޕްޝަނަށް މަގުފަހިވެފައިވާ ކަންކަން އެބަހުރި ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
'ރާއްޖޭ ޓީވީގެ' ފަށާއިރު ޕްރޮގްރާމްގައި ވާހަކަ ދައްކަވަމުން، އެ މިނިސްޓްރީ ތެރެއިން ކުރާ ބައެއް މަސައްކަތްތަކުގައި ކޮރަޕްޝަނާއި ނާޖާއިޒް ފާއިދާ ނަގަމުންދާކަމަށް ދެކެމުންދާ ވާހަކަތަކާއި ގުޅިގެން މިނިސްޓަރ ވިދާޅުވީ އެ މިނިސްޓްރީ އަކީ ފެށުނީއްސުރެ މީހުން އިނގިލި ދިގުކުރަމުން އަދި ތުހުމަތުކުރަމުން އަންނަތަނެއް ކަމަށެވެ.
އަދި ތުހުމަތުގެ އިނގިލި ދިގުކުރަނީ އެތަނުގައި ދެރަ ކަންތައްތަކެއް [ކޮރަޕްޝަނާއި ނާޖާއިޒް ފާއިދާ ނެގުމުގެ ކަންކަން] ހިނގާފައިވާތީ ކަމަށް މިނިސްޓަރ ވިދާޅުވިއެވެ. އަދި މަގާމާ ހަވާލުވެވަޑައިގެންނެވި ފަހުން އެކަންކަން ހައްލުކުރެވޭނެ ގޮތަށް ހާއްސަ އިސްކަމެއް ދެއްވައިގެން މަސައްކަތް ކުރައްވަމުން ގެންދަވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ވަރަށް ގިނަ ކަންތައްތަކެއް ރަނގަޅުކުރަމުން އަންނަ ކަމަށެވެ. އަދި މިކަންކަމަކީ ކުރިންސުރެ ފެށިގެން އޮންނަ ކަންތައްތަކެއް ކަމުން، ކަންކަން ރަނގަޅުކުރުމުގައި ދަތިތަކެއް ދިމާވާ ކަމަށެވެ.
މިނިސްޓަރ ވިދާޅުވީ މަގާމުން ވަކިވެވަޑައިގަންނަވާ ދުވަހަކުން އެނާއަށް އިނގިލި ދިއްކުރުމުގެ ފުރުސަތެއް ނުދެއްވާނެ ކަމަށެވެ. އަދި އެފަދަ ހާލަތެއް ދިމާވާނެ ސަބަބެއް މެދުވެރި ނުވާނެ ކަމަށާއި، އެފަދަ ފުރުސަތެއް ނުދެއްވާނެ ކަމަށެވެ. މިނިސްޓަރ ވިދާޅުވީ އެހެން ކަންކަމަށްވުރެ އަމިއްލަ ނަފްސު މާ އަގުބޮޑު ކަމަށާއި، އެހެންކަމުން އެފަދަ ކަމެއް ނާންނާނެ ކަމަށެވެ.
