ޕާލަމެންޓްރީ ގްރޫޕްގެ ގިނަ މެމްބަރުން ތާއީދު ކުރަނީ ފިޔާޒަށް ރުހުންދޭން
20 އޮކްޓޯބަރު 2019 | އާދީއްތަ 18:36އެގޮތަށް ނިންމާފައިވަނީ އެމްޑީޕީ ޕާލިމަންޓްރީ ގްރޫޕުން އާދިއްތަ ދުވަހުގެ ރޭ ބޭއްވި ބައްދަލުވުމަށްފަހު
ހުސެއިން ފިޔާޒް މޫސާ
އިންފޮރމޭޝަން ކޮމިޝަނަރުކަމަށް ޙުސައިން ފިޔާޒު މޫސާ ޢައްޔަން ކުރަން ރުހުން ދިނުމަށް އެމްޑީޕީގެ ޕާލަމެންޓްރީ ގްރޫޕް (ޕީޖީ) އިން ނިންމައިފިއެވެ.
ރައްޔިތުންގެ މަޖިލީހުގެ އަޣުލަބިއްޔަތު ޕާޓީ އެމްޑީޕީގެ ޕީޖީން އެގޮތަށް ނިންމީ އާދިއްތަ ދުވަހުގެ ރޭ ބޭއްވި ބައްދަލުވުމަށްފަހުގައެވެ.
އެމްޑީޕީ ޕާލިމަންޓްރީ ގްރޫފްގެ ގިނަ މެމްބަރުން ތާއިދުކުރަނީ މާދަމާ މަޖިލީހުގައި އިންފޮމޭޝަން ކޮމިޝަނަރަކު އައްޔަނު ކުރުމަށް ބާއްވާ ޖަލްސާގައި ޙުސައިން ފިޔާޒު މޫސާއަށް ރުހުން ދިނުމަށެވެ.
އިންފޮމޭޝަން ކޮމިޝަނަރަކު އައްޔަނުކުރުން ހޯމަ ދުވަހުގެ ޖަލްސާއަށް އެޖެންޑާކޮށްފައިވާއިރު އިންފޮމޭޝަން ކޮމިޝަނަރުކަމަށް ޢައްޔަންކުރަން 3 ނަމެއް ރައްޔިތުންގެ މަޖިލީހުގެ ތަޅުމަށް ފޮނުވުމަށް މިނިވަން މުއައްސަސާތަކުގެ ކޮމެޓީން ރުހުންދީފައިވަނީ އޮކްޓޯބަރު މަހުގެ 8 ވަނަ ދުވަހުއެވެ.
އެމަޤާމަށް ރައީސުލްޖުމްހޫރިއްޔާ ފޮނުއްވި 4 ބޭފުޅުންނާއި އިންޓަވިއު ކުރެވުނުއިރު މަޤާމަށް ޢައްޔަނުކުރުމަށް ކޮމެޓީން ރުހުންދީފައިވަނީ ޙުސައިން ފިޔާޒު މޫސާއާއި އަޙްމަދު ފަޔާޒުގެ އިތުރުން އަޙްމަދު އާހިދު ރަޝީދަށެވެ.
ހުސައިން ފިޔާޒަށް އިންޓަވިއުގައި ބައިވެރިވި ހުރިހާ މެމްބަރުންގެ ވޯޓު ލިބިފައިވާއިރު ފަޔާޒަށް ލިބިފައިވަނީ އިންޓަވިއުގައި ބައިވެރިވި 10 މެމްބަރުންގެ ތެރެއިން 9 މެމްބަރުންގެ ވޯޓެވެ. އާހިދަށް ލިބިފައިވަނީ އިންޓަވިއުގައި ބައިވެރިވި 11 މެމްބަރުންގެ ތެރެއިން 10 ،މެމްބަރުންގެ ވޯޓެވެ. ސައުޝަން އަށް ލިބުނީ އިންޓަވިއުގައި ބައިވެރިވި 9 މެމްބަރުންގެ ތެރެއިން 5 މެމްބަރުންގެ ވޯޓެވެ.
ޤާނޫނު އަސާސީގައި އޮންނަ ގޮތުން އިންފޮމޭޝަން ކޮމިޝަނަރު ކަމުގެ މަޤާމު ހުސްވާތާ 60 ދުވަހުގެ ތެރޭގައި އިންފޮމޭޝަން ކޮމިޝަނަރަކު ޢައްޔަންކުރަންޖެހެއެވެ. އެ މަޤާމުގައި ކުރިން ހުންނެވި ޢަބްދުލް އަޒީޒް ޖަމާލް އަބޫބަކުރުގެ ދައުރުގެ މުއްދަތު ވަނީ މިއަަހަރުގެ ޖޫން މަހުގެ 22 އަށް ހަމަވެފައެވެ. އެހެންކަމުން އިންފޮމޭޝަން ކޮމިޝަނަރެއް ނެތި، އެ މުއައްސަސާ ޤާނޫނީ ހުސްކަމެއްގެ ތެރޭގައި އޮންނަތާ މިހާރު ވަނީ ތިން މަހަށްވުރެ ގިނަ ދުވަސްވެފައެވެ. މަޢުލޫމާތު ހޯދައި ލިބިގަތުމުގެ ޙައްޤުގެގެ ޤާނޫނުގެ ދަށުން އިންފޮމޭޝަން ކޮމިޝަނަރުގެ އޮފީހެއް ދައުލަތުން އުފައްދާފައިވަނީ 13 ޖުލައި 2014 ގައެވެ.
