ދީނުގެ ނަމުގައި ހަމަނުޖެހުމުގެ ތެރެއަށް ދޫކުރުމަކީ ގޯހެއް، އަނިޔާވެރިކަމަށް ގޮވާލާ މީހުންނަށް ފިޔަވަޅު އަޅަންޖެހޭ
ފުލުހުން ދަނީ އެމްޑީއެންގެ މައްސަލަ ބަލަމުން
ރައީސް ނަޝީދު
އަނިޔާވެރިކަމަށް ގޮވާލާ ފަރާތްތަކާއި މެދު ގާނޫނީ ފިޔަވަޅު އަޅަން ޖެހޭނެ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހުގެރޭ ރައީސް ނަޝީދު ކުރައްވާފައިވާ ޓްވީޓެއްގައި ވިދާޅުވީ، ދީނުގެ ނަމުގައި ކަމަށް ބުނެ މުޅި ރާއްޖޭ ހަމަނުޖެހުމުގެ ތެރެއަށް ދޫކުރުމަކީ ގޯހެއް ކަމަށެވެ. އަދި މީހުން މަރާށާއި، އަނިޔާވެރިކަމަށް ގޮވާލާ އެންމެހާ ފަރާތްތަކަށް ގާނޫނީ ފިޔަވަޅު އަޅަން ޖެހޭނެ ކަމަށް ނަޝީދު ވިދާޅުވިއެވެ.
އަނިޔާވެރިކަމަށް ގޮވާލާ ފަރާތްތަކަށް ފިޔަވަޅު އަޅަން ރައީސް ނަޝީދު ގޮވާލާފައިވާއިރު، އެމްޑީއެނުން ދީނަށް ހަޖޫޖަހާފައިވާ ކަމަށް ބުނެ ނެރެފައިވާ ރިޕޯޓާއި ގުޅިގެން އެ ރިޕޯޓް ހެދުމުގައި ބައިވެރިވި ފަރާތްތަށް ''މަރަން'' ބައެއް ފަރާތްތަކުން ދަނީ ފާޅުކަން ބޮޑު ގޮތެއްގައި ޝޯޝަލް މީޑިއާގެ އިތުރުން އާއްމުން އެއްވާ ތަންތަނުގައި ގޮވާލަމުންނެވެ. އެގޮތުން ބައެއް ރަށްރަށުގައި އެމްޑީއެންގެ ރިޕޯޓާއި ގުޅިގެން ކުރި މުޒާހަރާތަކުގައި ބައެއް މީހުންވަނީ އަނިޔާވެރިކަމަށް މަގުފަހިވާ ގޮތަށް އަޑުއުފުލާފައެވެ.
އެ ރިޕޯޓާއި ގުޅިގެން މީހުން މެރުމަށް ބަޔަކު މީހުން ގޮވަމުން ދާއިރު އެފަދަ ފަރާތްތަކާ މެދު ފިޔަވަޅު ނާޅާތީ ހޯމް މިނިސްޓަރު އިމްރާން އަބްދުﷲ އަށް އޮތް އިތުބާރު ނެތްކަމަށް އެމްޑީޕީގެ ޕާލިމެންޓްރީ ގްރޫޕުގެ ވަޓްސް އެޕްގައި ނަޝީދު ވިދާޅުވެފައިވާ ކަމަށް ރާއްޖޭގެ މީޑިއާ އަކުން ވަނީ ރިޕޯޓް ކޮށްފައެވެ. އެހެން ނަމަވެސް އެ މެސެޖަކީ ޞައްޙަ މެސެޖެއް ކަމެއް މިހާތަނަށް އެނގިފައެއް ނުވެއެވެ.
އެމްޑީއެންގެ ރިޕޯޓް ތައްޔާރުކުރުމުގައި ހަރަކާތްތެރިވި ބައެއް ފަރާތްތަށް ފުލުހަށް ހާޒިރުވަން ވަނީ އަންގާފައެވެ. އެމްޑީއެން އިން ވަނީ ރިޕޯޓް އާއްމުވުން އެކަމަށް މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ.
