ލ. އަތޮޅުގެ 4 ރަށެއްގައި މޯބައިލް ލެބޯރެޓަރީގެ ޚިދުމަތް ދޭން ފަށައިފިއެވެ.
އަލަށް ދޭން ފެށި މޯބައިލް ލެބޯރެޓަރީ ޚިދުމަތުގެ ދަށުން އެ މަސައްކަތް ފަށާފައިވަނީ ލ. ކުނަހަންދޫ، ލ. ދަނބިދޫ، ލ. މުންޑޫ އަދި ލ. މާމެންދޫގައެވެ. މި ޚިދުމަތް މި ހަތަރު ރަށުގައި ފަށާފައިވަނީ އާދީއްތަ ދުވަހު ލ. ކުނަހަންދޫގައި ބޭއްވި ރަސްމިއްޔާތެއްގައި ހެލްތު މިނިސްޓަރ ޢަބްދުﷲ އަމީނެވެ. އެގޮތުން މި ޚިދުމަތް ފެށްޓުމަށް ބޭނުންވާ ހުރިހާ ވަޞީލަތްތައްވަނީ އެރަށްރަށުގައި ޤާއިމުކުރެވި، ލެބޯރެޓަރީ ސާމްޕަލް އެންމެ ކައިރީގައި ހުންނަ ލެބޯރެޓަރީއަކަށް ގެންދެވޭނެ އިންތިޒާމު ހަމަޖެހިފައިވާ ކަމަށް ހެލްތު މިނިސްޓްރީން ބުނެއެވެ.
މޮބައިލް ލެބޯޓަރީގެ ހިދުމަތް އިފްތިތާހުކޮށްދެއްވާ ވާހަކަދައްކަވަމުން ހެލްތް މިނިސްޓަރ އަބްދުއްﷲ އަމީން ވިދާޅުވީ ރާއްޖޭގައި ލެބޯޓަރީގެ ހިދުމަތް ލިބެނީ 90 ރަށުގައި ކަމަށާއި، މި ޚިދުމަތަކީ އަސާސި ޚިދުމަތެއްގެ ގޮތުން ލިބެންޖެހޭ ޚިދުމަތެއްކަމަށެވެ. އަދި އާދީއްތަ ދުވަހު ފެށުނު މި ހިދުމަތާއެކު ގައިންގަޔަށް ނާރަ ބަލިތަކުގެ ސަބަބުން މަރުވާ މީހުންގެ މިންވަރު ދަށްކުރުމުގައި އެހީތެރިވެދީ ބަލިތަކުގެ އަލާމަތްތައް ކުރިއާލާ ދެނެގަނެވި ބަލި މަދުކުރުމަށް ބާރަކަށް ވާނެކަމަށް މިނިސްޓަރ ވިދާޅުވިއެވެ.
މޮބައިލް ލެބޯޓަރީގެ ހިދުމަތް ދިނުމަށް ލެބޯޓަރީ ނެތް ރަށްރަށުން ލޭގެ ސާމްޕަލާއި ޔުރިން ސާމްޕަލް ނަގައިގެން ގެންދަނީ އެންމެ ކައިރީގައި ހުންނަ ލެބޯޓަރީއަކަށެވެ. އަދި އެކަން ކުރުމަށް އެއްބަސްވުންތަކެއްގައި ވެސް ވަނީ ސޮއިކޮށްފައެވެ. އެގޮތުން ލ.މުންޑޫއާއި ދަނބިދޫން ޓެސްޓް ހެދުމަށްޓަކައި ސާމްޕަލް ގެންދިއުމަށް ހަމަޖެހިފައިވަނީ ލ.މާބައިދޫ ސިއްޙީ މަރިކަޒުގައި ހުންނަ ލޭބޯޓްރީއަށެވެ. އަދި ލ.ކުނަހަންދުއާއި މާމެންދުއިން ސާމްޕަލް ނަގައި ޓެސްޓް ހެދުމަށް ގެންދާނީ ލ.ހިތަދޫ ހޮސްޕިޓަލަށެވެ.
މޮބައިލް ލެބޯޓަރީގެ ހިދުމަތް ފެށުމުގެ ގޮތުން ކުނަހަންދޫ ސިއްހީ މަރުކަޒުން ވަނީ މީހެއްގެ ގައިން ފުރަތަމަ ފަހަރަށް ސާމްޕަލް ނަގާފައެވެ. ސަންޕަލް އެއްރަށުން އަނެއް ރަށަށް ގެންދަނީ ކަނޑައެޅޭ ޚާއްސަ ޝަރުތުތަކެއް ހުންނަ ކޫލް ބޮކްސްއެއްގައެވެ. އަދި ޓެސްޓްގެ ނަތީޖާ ރިޕޯޓް 1 ދުވަހުގެ ތެރޭގައި އަމިއްލަ ރަށުގެ ސިއްޙީ މަރުކަޒަށް މެއިލްއެއްގެ ޒަރިއްޔާއިން ލިބޭނެ ގޮތަށް ވަނީ ހަމަޖައްސާފައެވެ.
މި ޚިދުމަތުގެ ދަށުން ލެބޯރެޓަރީ ނުހުންނަ ރަށްރަށުން، ހަކުރު، ކޮލެސްޓްރޯލް، ކުޑަކަމުދާ ނިޒާމް ފަދަ އާދައިގެ ޓެސްޓްތައް ރަށުގައި ހުރެގެން ހެދޭނެކަމަށް ހެލްތު މިނިސްޓްރީން ބުނެއެވެ.
ލ. އަތޮޅުގައި ލެބޯރެޓަރީގެ ޚިދްމަތް ހޯދާ މީހުންގެ ރިކޯޑަށް ބަލާއިރު ދުވާލަކަށް 150 މީހުން ލ. ގަމު ރީޖަނަލް ހޮސްޕިޓަލުން ލެބޯޓްރީގެ ޚިދުމަތް ހޯދައެވެ. އަދި ލ. އަތޮޅުގެ ލެބޯރެޓަރީ ހުންނަ ރަށްތަކުން ދުވާލެއްގެ މައްޗަށް 12 މީހުން ޚިދުމަތް ހޯދާފައިވެއެވެ. މިގޮތުން ލ.ދަނބިދޫ އަކީ ގާތްގަނޑަކަށް 1057 މީހުންގެ އާބާދީއެއް އޮންނަ ރަށެކެވެ. މިރަށުގެ ރައްޔިތުން ލެބޯޓްރީގެ ޚިދުމަތް ހޯދުމަށްޓަކައި މީގެ ކުރިން މާބައިދޫއަށް ދިއުމަށް 20 މިނެޓު ހޭދަވާއިރު ލޯންޗެއްގައި ދަތުރުކޮށްދޭ އަގަކީ ގާތްގަނޑަކަށް 800 ރުފިޔާއެވެ.
އަދި ލ. މުންޑޫގައި 308 މީހުންގެ އާބާދީއެއް އެއް އޮންނަ އިރު ލެބޯރެޓަރީގެ ޚިދުމަތް ހޯދުމަށް މާބައިދޫއަށް ދިއުމަށް 05 މިނެޓު ހޭދަވާއިރު ލޯންޗެއްގައި ދަތުރުކޮށްދޭ އަގަކީ ގާތްގަނޑަކަށް 400 ރުފިޔާއެވެ. މީގެއިތުރުން ލ. މާމެންދޫގައި 1332 މީހުންގެ އާބާދީއެއް އެއް އޮންނަ އިރު ލެބޯޓަރީގެ ޚިދުމަތް ހޯދުމަށް ލ. ހިތަދޫއަށް ދިއުމަށް 05 މިނެޓު ހޭދަވާއިރު ލޯންޗެއްގައި ދަތުރުކޮށްދޭ އަގަކީ ގާތްގަނޑަކަށް 300 ރުފިޔާއެވެ. އަދި ލ. ކުނަހަންދޫގައި 887 މީހުންގެ އާބާދީއެއް އޮންނަ އިރު ލ. ހިތަދޫއަށް ލެބޯޓްރީގެ ޚިދުމަތްހޯދުމަށް ދިއުމަށް 10 މިނެޓު ހޭދަވާއިރު ލޯންޗެއްގައި ދަތުރުކޮށްދޭ އަގަކީ ގާތްގަނޑަކަށް 500 ރުފިޔާއެވެ.
އެހެންކަމުން ލ. އަތޮޅުގެ ލެބޯރެޓަރީ ނުހުންނަ ރަށްރަށުގައި ސާމްޕަލް ނަގައި ކައިރި ރަށްރަށުގެ ލެބޯޓްރީތަކަށް ސާމްޕަލް ފޮނުވޭނެ އިންތިޒާމް ހަމަޖެހިގެންދިއުމަކީ އެ ރަށްރަށުގެ ބަލިމީހުންނަށް ވެގެންދާނެ ވަރަށް ބޮޑު ލުއި ފަސޭހައެކެވެ. މީގެ އިތުރުން ގައިންގަޔަށް ނާރާ ބަލިތަށް ދުރާލާ ދެނެގަނެ، ރަށުގައި ހުރެގެން ޤަވާއިދުން ލެބޯޓްރީ ޓެސްޓުތައް ހެދޭނެގޮތް މެދުވެރިވެފައި އޮތުމަކީ މި ރަށްރަށުގެ ރައްޔިތުންނަށް ވަރަށް ބޮޑު ލުއިފަސޭހައަކަށް ވެގެންދާނެ ކަމަށް މިނިސްޓްރީން ބުނެއެވެ. އަދި މި ހަތަރު ރަށުން ސާންޕަލް ޓްރާންސްފަރ ކުރުމުގެ އިންތިޒާމް ހަމަޖެހިގެން ދިއުމުން ހައްދުންމަތީގެ ހުރިހާ ރަށެއްގެ ރައްޔިތުންނަށް އެރަށެއްގައި ތިބެގެން ލެބޯޓަރީގެ ތަހްލީލުތައް ކުރެވޭނެ އިންތިޒާމް ހަމަޖެހިގެންދާނެ ކަމަށް މިނިސްޓްރީން ބުނެއެވެ.
