ޑޮކްޓަރުންނާއި ނަރުހުން ތަމްރީންކުރުމަށް އެސްޓަރ މިމްސް އާއި އެމްވީ މެޑިކަލްސް އިން އެއްބަސްވެއްޖެ
މި އެއްބަސްވުމުގެ ދަށުން ޑޮކްޓަރުންނާއި ނަރުހުން ތަމްރީނު ކުރެވިގެންދާން
އެމްއޯޔޫގައި ސޮއި ކުރަނީ
މޯލްޑިވްސް މީޑިއާ އެކްސްޕޯގެ ތެރެއިން އިންޑިއާގެ އެސްޓަރ މިމްސް އާއި އެމްވީ މެޑިކަލްސް އާއި ދެމެދު އެމްއޯޔޫއެއްގައި ސޮއި ކޮށްފިއެވެ.
އެމްވީ މެޑިކަލްސްގެ މާރކެޓިންގް ޑިރެކްޓަރ އެންޑް ޕަބްލިކް ރިލޭޝަންސް އަބްދުލް ޖަލީލް ހުސައިން ވިދާޅުވީ މި އެމްއޯޔޫގެ ދަށުން ރާއްޖެއިން ލިބެންނެތް ސިއްހީ ހިދުމަތްތައް އެސްޓަރ މިމްސް ގްރޫޕްގެ އައުޓްލެޓްތަކުން ލިބޭނެ ގޮތް ވެގެންދާނެ ކަމަށާއި އަދި މި އެމްއޯޔޫގެ ދަށުން މަސައްކަތް ކުރާނީ ޞިއްޙީ ޚިދްމަތްތެރިން ތަމްރީންކުރުމަށް ވިސްނައިގެންކަމަށެވެ.
މީގެ އިތުރުން އަބްދުލް ޖަލީލް ހުސެއިން ވިދާޅުވީ މި އެއްބަސްވުމުގެ އެންމެ ބޮޑު ބޭނުމަކީ މީހުން ތަމްރީނު ކުރުން ކަމަށާއި އެގޮތުން ޑޮކްޓަރުންނާއި ނަރުހުން ތަމްރީނު ކުރުމަށް ހަމަޖެހިފައިވާ ކަމަށެވެ.
އެސްޓަރ މިމްސް ގެ ފަރާތުން ވާހަކަ ދައްކަވަމުން ރިޒްވާން ވިދާޅުވީ ބުރަކަށީގެ ތަދުތަކަކީ ވަރަށް އާންމު ބައްޔެއް ކަމަށާއި އެކަމަށް އެސްޓަރ މިމްސް އިން 24 ގަޑިއިރު ތެރޭގައި ރަނގަޅުވާނެ ޙައްލެއް ހޯދައިފައިވާ ކަމަށެވެ. އެހެންކަމުން މި ފަރުވާ ރާއްޖޭގެ ރައްޔިތުންނަށް މި އެއްބަސްވުމުގެ ދަށުން ލިބިގެންދާނެ ކަމަށެވެ.
