ތިން ސްކޫލެއްގެ ކްލާސްރޫމްތައް އިމާރާތްކުރުމަށް 03 ކުންފުންޏަކާ ހަވާލުކޮށްފި
18 އޮކްޓޯބަރު 2019 | ހުކުރު 08:14ސީއެޗްއެސްއީ ގައި އިމާރާތްކުރުމަށް ހަމަޖެހިފައިވާ 08 ފަންގިފިލާ
އެއްބަސްވުންތަކުގައި ސޮއިކުރި ރަސްމިއްޔާތުގެ ތެރެއިން
ތިން ސްކޫލެއްގައި އަލަށް އިމާރާތް ކުރުމަށް ހަމަޖެހިފައިވާ ކްލާސްރޫމްތައް އިމާރާތްކުރުމަށް 03 ކުންފުންޏަކާ ހަވާލުކޮށްފިއެވެ.
އެޑިޔުކޭޝަން މިނިސްޓްރީން ބުނީ ސީއެޗްއެސްއީ ގައި އިމާރާތްކުރުމަށް ހަމަޖެހިފައިވާ 08 ފަންގިފިލާގެ އިމާރާތުގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކޮށްފައިވާ ކަމަށެވެ. 420 ދުވަހުގެ ތެރޭގައި ނިންމާ ގޮތަށް މިމަސައްކަތް ހަވާލުކުރީ ތިރީސްތިން މިލިއަން ރުފިޔާ ޚަރަދުވާ ކަމަށެވެ. އަދި މި މަސައްކަތްތަކަށް ޚަރަދުކުރަނީ މިއަހަރުގެ ބަޖެޓުގެ ޕީއެސްއައިޕީން ކަމަށް މިނިސްޓްރީން މައުލޫމާތުދެއެވެ.
އެޑިޔުކޭޝަން މިނިސްޓްރީން ބުނީ ގދ.ފިޔޯރި ސްކޫލް ގައި 2 ފަންގިފިލާގެ 6 ކްލާސްރޫމް އެޅުމަށް ހަވާލުކޮށްފައިވަނީ އިނޯކާ ޕްރައިވެޓް ލިމިޓެޑާއެވެ. މިމަސައްކަތް 225 ދުވަހުގެ ތެރޭގައި ނިންމާގޮތަށްހަވާލުކޮށްފައިވަނީ ފަސް މިލިޔަނަށް ވުރެ ގިނަ ރުފިޔާއަށް ކަމަށް މިނިސްޓްރީން މައުލޫމާތުދެއެވެ.
މީގެ އިތުރުން މާރިސް ކޮންސްޓްރަކްޝަން ޕްރައިވެޓް ލިމިޓެޑާ ކ.ހުރާ ސްކޫލްގައި 2 ފަންގިފިލާގެ 6 ކްލާސްރޫމް އިމާރާތްކުރުމަށް ވަނީ ހަވާލުކޮށްފައެވެ. އަދި ހަތަރު މިލިއަންއަށްވުރެ ގިނަ ރުފިޔާ މިމަޝްރޫއަށް ހަރަދުވާއިރު، މިމަސައްކަތްޗ 250 ދުވަހުގެ ތެރޭ ނިންމަންޖެހެއެވެ.
