ބަންގްލަދޭޝްގައި 16 އަހަރުން ދަށުގެ ޓީމުތަކަށް އަމާޒުކޮށްގެން ބާއްވާ "ޔުއެފާ އެސިސްޓް ޑިވެލޮޕްމެންޓް ޓޯނަމަންޓް" ގައި ފެރޯ އައިލޭންޑްސްއާ ދެކޮޅަށް ކުޅުނު މެޗުން ރާއްޖެ ބަލިވެއްޖެއެވެ.

ބުދަ ދުވަހު ކުޅުނު މެޗުން ފެރޯ އައިލޭންޑްސް އަތުން ރާއްޖެ ބަލިވީ 3-10 ގެ ތަފާތުބޮޑު ނަތީޖާއަކުންނެވެ.

މެޗު ފެށިގެން ރަނގަޅަށް ކުޅެމުންދިޔައީ ރާއްޖެއިންނެވެ. އެގޮތުން ފުރަތަމަ ލަނޑު ޖަހާ ލީޑު ނެގީވެސް ރާއްޖެއިންނެވެ. މި ލަނޑު ހަވަނަ މިނެޓުގައި ރާއްޖެއަށް ކާމިޔާބުކޮށްދިނީ މުހައްމަދު ހަންނާން އާދަމްއެވެ.

މި ލަނޑަށްފަހުވެސް ރާއްޖެއިން ރަނގަޅަށް ކުޅެމުންދިޔައިރު، 20 ވަނަ މިނެޓުގައި ހަންނާން ވަނީ އިތުރު ލަނޑެއް ކާމިޔާބުކޮށް ރާއްޖެއަށް ލީޑު ފުޅާކޮށްދީފައެވެ.

ނަމަވެސް ފުރަތަމަ ހާފް ނިމުމުގެ ކުރިން ފެރޯ އައިލޭންޑްސްއިން ވަނީ ކުޅުން ރަނގަޅުކޮށް 25 މިނެޓުގައި ނަތީޖާގެ ފަރަގު ކުޑަކޮށްފައެވެ. އަދި 32 ވަނަ މިނެޓުގައި އެޓީމުން ނަތީޖާ ހަމަހަމަކޮށްފައިވާއިރު، ފުރަތަމަ ހާފް ނިމުމުގެ ކުރިން އެޓީމުން ވަނީ ލީޑު ނަގާފައެވެ.

ދެވަނަ ހާފް ފެށިގެން ފެރޯ އައިލޭންޑްސްއިން ކުޅުން ވަރުގަދަކުރިއެވެ. އެގޮތުން އެޓީމުން ވަނީ ދެވަނަ ހާފްގައި ހަތް ލަނޑު ޖަހާފައެވެ. ދެވަނަ ހާފްގައި ރާއްޖެއިން ކާމިޔާބުކުރި ހަމައެކަނި ލަނޑު ޖެހީ ހަންނާންއެވެ. އޭނާ ވަނީ މެޗުގައި ހެޓްރިކް ފުރިހަމަކޮށްފައެވެ.

ބޮޑު ތަފާތަކުން ފެރޯ އައިލޭންޑްސް އަތުން ރާއްޖެ ބަލިވި ނަމަވެސް، އާ ކޯޗު މުހައްމަދު ނިޒާމް (ނިޒާމްބެ) އާއެކު ޒުވާން ޓީމަށް ވަނީ ކުރު މުއްދަތެއްގައި ގިނަ ކުރިއެރުންތަކެއް ލިބިފައެވެ.

މުބާރާތުގައި ރާއްޖެ އާއި ފެރޯ އައިލޭންޑްސްގެ އިތުރުން ދެން ވާދަކުރަނީ ކެމްބޯޑިއާ އާއި މުބާރާތް ބާއްވާ ގައުމު ބަންގްލަދޭޝްއެވެ.