ފިލިޕީންސްއިން ޗައިނާ މޮޅުވިޔަނުދީ ހިފަހައްޓައިފި

ވޯލްޑް ކަޕް ކޮލިފިކޭޝަނުގައި ރާއްޖެ ހިމެނޭ ގްރޫޕްގައި އަންގާރަ ދުވަހުގެ ރޭ ދެ މެޗު ކުޅެފައިވާއިރު ފިލިޕީންސް އިން ޗައިނާ މޮޅުވިޔަ ނުދީ ހިފެހެއްޓިއިރު ސީރިއާއިން ގުއާމް ބަލިކޮށް ގްރޫޕްގެ އެއްވަނަ އަށް ޖެހިލައިފިއެވެ.

ޗައިނާ އަދި ގުއާމް ބައްދަލުކުރި މެޗު ނިމިގެންދިޔައީ 0-0 ގެ ނަތީޖާއަކުންނެވެ. އަދި ސީރިއާ އާއި ގުއާމް ބައްދަލުކުރި މެޗު ނިމިގެންދިޔައީ 4-0 ގެ ނަތީޖާ އަކުންނެވެ.

ފިލިޕީންސްގެ ތިން ހާހެއްހާ ސަޕޯޓަރުންގެ ކުރިމަތީގައި ކުޅުނު މި މެޗުގައި ފިލިޕީންސް އިން މޮޅު ޑިފެންސިވް ގޭމްއެއް ކުޅެފައިވާއިރު މި މެޗުގައި ފިލިޕީންސްގެ ކީޕަރު ވަނީ ޗައިނާ އިން ފޮނުވާލި ގިނަ ހަމަލާތަކެއް ހުށިޔާރުކަމާއެކު ދިފާއު ކޮށްފައެވެ.

މެޗަށްފަހު ވާހަކަ ދައްކަވަމުން ފިލިޕީންސްގެ ކޯޗު ބުނީ މިއީ ފިލިޕީންސްގެ ފުޓުބޯޅައިގެ ތާރީހުގައި ލިބުނު އެންމެ ބޮޑު އެއްކާމިޔާބީ ކަމަށާއި މި ކާމިޔާބީ އަށް ކުޅުންތެރިންނަށް ޝުކުރު ހައްގު ކަމަށެވެ.

މި ގްރޫޕްގައި ސީރިއާއިން ގުއާމް ފަސޭހަ ކަމާއެކު ބަލިކޮށްފައިވާއިރު މި މެޗު ފަށައިގެން ދެވަނަ މިނެޓުގައި ސީރިއާއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އޮމަރް އަލް ސޮމާހްއެވެ. އަދި މެޗުގެ ފުރަތަމަ ހާފު ނިމުމުގެ ކުރިން އޭނާ ވަނީ އިތުރު ލަނޑެއްޖަހާ ލީޑު ފުޅާ ކޮށްދީފައެވެ.

މެޗުގެ ފުރަތަމަ ހާފު 2-0 ގެ ނަތީޖާ އަކުން ސީރިއާ ކުރީގައި އޮވެ ނިމުނު އިރު މެޗުގެ ދެވަނަ ހާފުގެ 83 ވަނަ މިނެޓުގައި އޮމަރް އަލް ސޮމާހް ވަނީ އިތުރު

ލަނޑެއްޖަހާ ހެޓްރިކް ހަދައިފައެވެ. އަދި މެޗުގެ އެންމެ ފަހު މިނެޓުގައި ސީރިއާގެ މަހްމޫދު ވަނީ ލަނޑެއްޖަހާ މެޗުގެ ނަތީޖާ ފުޅާ ކޮށްފައެވެ.

މި ނަތީޖާއާއެކު ސީރިއާއިން ތާވަލުގެ އެއްވަނައިގައި ނުވަ ޕޮއިންޓާއެކު އޮތް އިރު ދެވަނައިގައި އޮތް ޗައިނާ އަށް ލިބިފައިވަނީ ހަތް ޕޮއިންޓެވެ އަދި ތިންވަނައިގައި ފިލިޕީން ހަތަރު ޕޮއިންޓާއެކު އޮތް އިރު ތާވަލުގެ ހަތަވަނައިގައި ރާއްޖެ އޮތީ ތިން ޕޮއިންޓާ އެކުގައެވެ. ތާވަލުގެ ފުލުގައި ގުއާމް އޮތީ ޕޮއިންޓެއް ނުލިބިއެވެ.