ރިލްވާން ވަގަށް ނަގައި މަރާލުން : ގައުމީ ސަލާމަތާބެހޭ ކޮމެޓީ ސިއްރުކޮށްފި
މަރު މައްސަލަތައް ބަލާ ކޮމިޝަނުން ފުލުހުންގެ އިހުމާލު އޮތްކަން އެނގޭ
މަރާލާފައިވާ ނޫސްވެރިޔާ އަހުމަދު ރިލްވާން
ވަގަށް ނެގުމަށްފަހު، މަރާލާފައިވާ ނޫސްވެރިޔާ އަޙްމަދު ރިލްވާންގެ މަރުގެ މައްސަލައިގައި ނެޝަނަލް އިންޓެގްރިޓީ ކޮމިޝަން (އެންއައިސީ) ގެ މެމްބަރުންނާއެކު ރައްޔިތުންގެ މަޖިލީހުގެ ގައުމީ ސަލާމަތީ ހިދުމަތްތަކާބެހޭ ކޮމެޓީން ބާއްވާ ހޯމަ ދުވަހުގެ ބައްދަލުވުން ސިއްރު ކޮށްފިއެވެ.
ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން އެންއައިސީގެ މެމްބަރުންނާ ބައްދަލުކުރަން ނިންމާފައިވަނީ ރިލްވާން ވަގަށް ނެގި މައްސަލާގައި ފުލުހުންގެ އިހުމާލެއް ނެތް ކަމަށް އެ ކޮމިޝަނުން ބުނެފައިވާތީ އެކަމުގެ ތަފްސީލު ހޯދުމަށެވެ. މަޖިލީހުގެ ގައުމީ ސަލާމަތުގެ ކޮމެޓީ އެގޮތަށް ނިންމީ މިދިޔަ ސެޕްޓެމްބަރު މަހުގެ 24 ވަނަ ދުވަހު ބޭއްވި އެކޮމެޓީގެ ބައްދަލުވުމުގަ އެވެ.
ރިލްވާނުގެ އާއިލާއިން 2014 ވަނަ އަހަރުގެ އޮކްޓޯބަރ މަހުގެ 29 ވަނަ ދުވަހު އެންއައިސީއަށް ހުށައެޅި މި މައްސަލައިގެ ޖަވާބު ދެމުން އެންއައިސީން ބުނެފައިވަނީ އެ މައްސަލަ ބަލައި ތަހުގީގުކުރުމުގައި ފުލުހުންގެ ފަރާތުން އެއްވެސް އިހުމާލެއް ވެފައިވާކަން އެނގޭނެ އެއްވެސް ހެއްކެއް އަދި ގަރީނާއެއް ކޮމިޝަނުގެ ތަހުގީގަށް މިހާތަނަށް އެނގިފައި ނުވާ ކަމަށެވެ.
އެންއައިސީއިން އެހެން ބުނެފައިވާއިރު މަރުތައް ބެލުމަށް ރައީސް އުފައްދަވާފައިވާ ކޮމިޓީން ތައްޔާރު ކުރި ޑްރާފްޓް ރިިޕޯޓްގައި ބުނެފައިވާ ގޮތުގައި ރިލްވާން މަރާލުމުން ފުލުހުންގެ އިންޓެލިޖެންސްގެ ދެ މީހަކު އިމިގްރޭޝަން ކޮންޓްރޯލަރ ހަސަން އަލީއާ ބައްދަލުކޮށް ރިލްވާންގެ ޕާސްޕޯޓްގެ ކޮޕީއެއް ހޯދުމަށް އެދުނު ކަމަށް ވަނީ ބުނެފައެވެ. ރިލްވާން ސީރިއާއަށް ގޮސް މަރުވެފައިވާކަން ދައްކަން ހަސަން އަލީގެ ކިބައިން އެދުނު ކަމަށާއި، ހަސަން އަލީ މިކަމާގުޅޭގޮތުން ތަހުގީގީ އިދާރާއަށް ބަޔާނެއް ދެއްވާފައި ވާކަމަށްވެސް ރިޕޯޓްގައި ބުނެފައިވެއެވެ. ޕާސްޕޯޓް ކޮޕީ ހޯއްދަވަން ކުރީގެ ނައިބު ރައީސް އަޙްމަދު އަދީބު މަސައްކަތް ކުރެއްވިކަން ހާމަވާ ކަމަށާއި ،އަދީބު އެމްއެންޑީއެފްގެ އިސް ފަރާތަކަށް ކޮޕީ ހޯދުމަށް އެދުނުކަން ތަހުގީގަށް އެނގިފައިވާ ކަމަށް ވެސް ރިޕޯޓްގައި ބުނެފައި ވެއެވެ.
ރިލްވާން ސީރިއާއަށް ދިޔަކަން އެދުވަސްވަރު ސަރުކާރަށް ތާއީދު ކުރާ ބައެއް ފަރާތްތަކުން ބުނަމުންވެސް ދިޔައެވެ. އަދި އޭރުގެ ސަރުކާރަށް ތާއީދުކުރާ އޮންލައިން ނޫހެއްގައި އެވާހަކަތައް އެގޮތަށް ފަތުރާފައިވެސް ވެއެވެ.
މީގެ އިތުރުން ރިލްވާން މަރާލުމުގެ ކުރިން ވެސް ފުލުހުން ފާރަލާފައިވާ ކަމަށާއި އެކަމަކީ ރިލްވާނަށް އައި އިންޒާރަކާއި ހެދިކަމަށް ފުލުހުން ބުނެފައިވާކަމަށާއި އެވާހަކައާއި ފުށު އެރުންތައް ހުރުމުން ފުލުހުން ދޭ ޖަވާބު ދިމާ ނުވާ ކަމަށް މަރުގެ މައްސަލަ ބެލުމަށް އެކުލަވާލި ކޮމިޓީގެ ރައީސް ހުސްނުއްސުއޫދު ވިދާޅުވިއެވެ.
ސުއޫދު ވިދާޅުވީ ރިލްވާން މަރާލުމުގެ ކުރިން ޖޫން 24، 2014 ގައި ހުޅުމާލޭގައި މީހަކު ރަހީނު ކުރަން އުޅޭ ކަމަށާއި އެކަމަށް ޑިންގީއެއް ތައްޔާރު ކޮށްފައިވާކަމުގެ އިންޓެލް ރިޕޯޓެއް ފުލުހުންނަށް ކުރިން ލިބިފައި އޮތްކަމަށެވެ. އެކަން ފަހުން ބަދަލުކޮށްފައިވަނީ ފުލުހުންގެ ޕޮލިޓިކަލް ސެކްޝަނަށް ކަމަށެވެ. އެކަމުގައި ފުލުހުން ކޯޓަށް ހުށައެޅި ފޯމުގައި ބުނެފައިވަނީ ދައުލަތާއި ދެކޮޅު ހަރަކާތް ހިންގާތީ ފޯނުކޯލުތައް އަޑުއަހާލަން ފާރަލީ ކަމަށް ފުލުހުން ބުނެފައިވާ ކަމަށް ސުއޫދު ވިދާޅުވެފައި ވެއެވެ.
