އެކުއަޓިކް އެނިމަލް ހެލްތް ލެބޯޓްރީ ވަރަށް އަވަހަށް ހުޅުވިގެންދާނެ: މިނިސްޓަރ ޒަހާ
13 އޮކްޓޯބަރު 2019 | އާދީއްތަ 11:02މަސްވެރިންކަން ފުޅާކުރުމަށްޓަކައި ކަނޑުގެ ދިރުން އާލާ ކުރުމަކީ ފިޝަރީޒް މިނިސްޓްރީގެ މުހިންމު ސިޔާސަތެއް
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު
އެކުއަޓިކް އެނިމަލް ހެލްތް ލެބޯޓްރީ ވަރަށް އަވަހަށް ހުޅުވިގެންދާނެ ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.
މެރިކަލްޗަރ އެންޓަރޕްރައިސް ޑިވެލޮޕްމަންޓް ޕްރޮޖެކްޓްގެ ދަށުން ބާއްވާ ޕްރޮޖެކްޓް ކޮންޕްލީޝަން ރިވިއު ވޯކްޝޮޕް އިފްތިތާޙު ކުރުމަށް ބޭއްވި ރަސްމިއްޔާތުގައި ވާހަކަފުޅުކަދައްކަވަމުން މިނިސްޓަރ ވިދާޅުވީ މި އަހަރުގެ ތެރޭގައި ހުޅުވި އެތަނުގެ ހިދުމަތް ކަނޑުގެ ދިރުން އާލާ ކުރާ ފަރާތްތަކަށް ލިބޭނެ ކަމަށެވެ. އަދި މަސްވެރިންކަން ފުޅާކުރުމަށްޓަކައި ކަނޑުގެ ދިރުން އާލާ ކުރުމަކީ ފިޝަރީޒް މިނިސްޓްރީގެ މުހިންމު ސިޔާސަތެއް ކަމަށް މިނިސްޓަރ ވިދާޅުވިއެވެ.
މި މަސައްކަތަކީ ރާއްޖެއަށް އައު މަސައްކަތަކަށްވުމުން ގިނަ މަސައްކަތްތަކެއް ކުރައްވަން ޖެހުނުކަން ފާހަގަކުރައްވާ މިނިސްޓަރ ޒަހާ ވިދާޅުވީ މީހުން ތަމްރީން ކުރުމާއި މާލީ އެހީތެރިކަން ހޯދުން ހިމެނޭ ކަމަށެވެ.
މެރިކަލްޗަރ އެންޓަޕްރައިޒް ޑިވަލޮޕްމަންޓް ޕްރޮޖެކްޓް ރާއްޖޭގެ ކަނޑުގެ ދިރުން އާލާ ކުރުމަށްޓަކައި މުހިންމު މަސައްކަތެއްކޮށްފައި، މި ޕްރޮޖެކްޓްގެ ދަށުން ޕްލޭނެއް އެކުލަވާލާ ތަންފީޒު ކުރުމުގެ މަސައްކަތް ކުރެވެމުންދާ ކަމަށް ވެސް ޒަހާ ވިދާޅުވިއެވެ. މި ޕްރޮޖެކްޓް ނިމެމުން އަންނައިރު ވޯލްޑް ބޭންކްގެ އެހީގައި އިތުރުން އެހެން މަޝްރޫއެއް ފަށާނެއެވެ. އެއީ ސަސްޓެއިނަބަލް ރިސާޗް ޑިވަލޮޕްމަންޓް ޕްރޮޖެކްޓެވެ. މި ޕްރޮޖެކްޓްގެ މައިގަނޑު މަޤްސަދަކަށް ވާނީ ރައްޔިތުންނަށް ސީދާ ގޮތުންނާއި ނުސީދާ ގޮތުން އާމްދަނީ ހޯދައިދިނުން ކަމަށް ޒަހާ ފާހަގަކުރެއްވިއެވެ.
މަސްވެރިންކަން ފުޅާކުރުމަށްޓަކައި ކަނޑުގެ ދިރުން އާލާ ކުރުމަކީ ފިޝަރީޒް މިނިސްޓްރީގެ މުހިންމު ސިޔާސަތެއް ކަމަށް އެކަމަނާ ވިދާޅުވިއެވެ.
