ޓެރަރިޒަމަށް ހިތްވަރު ދިން މީހަކު ހައްޔަރުކޮށްފި
ހައްޔަރު ކޮށްފައިވަނީ 27 އަހަރުގެ މީހެއް
ޓެރަރިޒަމް ގާނޫނަށް ގެނައި އިސްލާހް ތަސްދީޤް ކޮށްފައިވަނީ ބުރާސްފަތި ދުވަހު
ޓެރަރިޒަމަށް ހިތްވަރު ދިން މީހަކު ހައްޔަރުކޮށްފި އެވެ.
ފުލުހުން ބުނީ، މުޖުތަމައުގެ ތެރޭގައި ބިރުވެރިކަން އުފެދޭ ގޮތަށް މީހުންގެ ފުރާނަ އަށް ގެއްލުން ދިނުމަށާއި އަނިޔާވެރި ކަމުގެ އަމަލު ހިންގުމަށް ގޮވާލި އުމުރުން 27 އަހަރުގެ ފިރިހެނަކު ހައްޔަރު ކޮށްފައިވާ ކަމަށެވެ.
އޭނާ ހައްޔަރުކުރީ، ޓެރަރިސްޓު ޖަމާއަތްތަކުގެ ނިޝާންތަކާއި ލިޔެ ކިޔުންތައް ޝޯޝަލް މީޑިއާގައި އާއްމު ކުރުމުންނެވެ.
ޓެރަރިޒަމްގެ ތުހުމަތު ގައި މީހަކު ހައްޔަރު ކޮށްފައިވާއިރު، ޓެރަރިޒަމް މަނާކުރުމުގެ ގާނޫނަށް ދެ ވަނަ އިސްލާހު ގެނައުމުގެ ބިލު، ރައީސް އިބްރާހީމް މުހައްމަދު ސޯލިހު ވަނީ ބުރާސްފަތި ދުވަހު ތަސްދީގު ކުރައްވާފައެވެ.
ޓެރަރިޒަމް މަނާކުރުމުގެ ގާނޫނަށް ހުށަހަޅާފައިވާ އިޞްލާޙުގައި ޓެރަރިޒަމް މާނަކުރާގޮތް އިސްލާހު ކޮށްފައިވެއެވެ. އެގޮތުން ޓެރަރިޒަމަކީ، އަދި ދައުލަތުން ނުވަތަ ސަރުކާރުން ވަކި ކަމެއް ކުރުމަށް ނުވަތަ ނުކޮށް ދޫކޮށްލުމަށް މަޖުބޫރުކުރުވުމަށް ނުވަތަ އާންމުންނަށް ނުވަތަ ޢާންމުންގެ ބައެއްގެ މެދުގައި ބިރުވެރިކަން އުފެއްދުމަށް ހިންގޭ އަމަލުތައްކަމަށް ބުނެފައިވެއެވެ.
