ރާއްޖޭގެ 'އެމްބެސަޑަރ އޮފް ވެލްނެސް'ގެ މަގާމަށް ސުނިލް ޝެޓީ ހަމަޖައްސައިފި

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ދުޅަހެޔޮ ހަށިހެޔޮ ސިޔާސަތުގެ ދަށުން މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމެންޓްގެ ފަރާތުން ކުރިޔަށް ގެންދިޔުމަށް ނިންމާފައިވާ 'މިޝަން ފިޓް މޯލްޑިވްސް' ގައި 'އެމްބަސަޑަރ އޮފް ވެލްނެސް' ގެ މަގާމަށް ބޮލީވުޑްގެ މަޝްހޫރު ތަރި އަދި ފިޓްނެސް ގުރޫ ސުނިލް ޝެޓީ ހަމަޖައްސައިފިއެވެ.

ދިވެހިންގެ މެދުގައި ދުޅަހެޔޮ ދިރިއުޅުމެއް ޕްރޮމޯޓް ކުރުމަށް ޔޫތު މިނިސްޓްރީން ގިނަ މަސައްކަތްތަކެއް ކުރަމުންދާއިރު، ރާއްޖެއަކީ ދުޅަހެޔޮ ހަށިހެޔޮ ރައްޔިތުން އުޅޭ ގައުމަކަށް ހެދުމަށް މިނިސްޓްރީން ވަނީ 'މިޝަން ފިޓް މޯލްޑިވްސް' ގެ ނަމުގައި ޚާއްސަ ކެމްޕޭނެއް ކުރިޔަށް ގެންދިޔުމަށް ވަނީ ނިންމާފައެވެ.

ޔޫތު މިނިސްޓްރީން ބުނީ، މި ކެމްޕޭނަކީ ރާއްޖޭގެ ހުރިހާ ރައްޔިތުންނަކީ ވެސް ދުޅަހެޔޮ ހަށިހެޔޮ ދިރިއުޅުމެއް އުޅޭ ރައްޔިތުންތަކެއް ހެދުމަށް ކުރިޔަށް ގެންދާ ކެމްޕޭނެއް ކަމަށާއި، ރާއްޖޭއަކީ ދުނިޔޭގެ އެންމެ ދުޅަހެޔޮ ރައްޔިތުން އުޅޭ ގައުމުތަކުގެ ތެރޭގައި ހިމެނުމަށް ރާއްޖޭގެ ފިޓްނެސް އިންޑަސްޓްރީގައި މަސައްކަތްކުރާ ބޭފުޅުންނާއެކު މި ކެމްޕޭނުގެ 'އެމްބެސެޑަރ އޮފް ވެލްނެސް' ސުނިލް ޝެޓީ އަދި އޭނާގެ ޓީމު ހަރަކާތްތެރިވާނެ ކަމަށެވެ.

މިދިޔަ 30 އަހަރުގެ ތެރޭގައި ބޮލީވުޑްގެ އެތައް ކާމިޔާބު ފިލްމެއްގައި އެކްޓަރެއްގެ ގޮތުން ހަރަކާތްތެރިވެފައިވާ ސުނިލް ޝެޓީއަކީ މިވަގުތު އިންޑިއާގެ އެންމެ ބޮޑު އަދި ކާމިޔާބު ފިޓްނެސް ކެމްޕޭން ކަމަށްވާ 'މިޝަން ފިޓް އިންޑިއާ' ލީޑު ކުރައްވަމުން ގެންދަވާ މީހާއެވެ.

މި ކެމްޕޭން އިންޑިއާގައި ކުރިޔަށް ގެންދަނީ އެ ގައުމުގެ އެންމެ ބޮޑު އެއް މީޑިއާ ހައުސް ކަމަށްވާ ހިންދުސްތާން ޓައިމްސް ލިމިޓެޑާއި ގުޅިގެންނެވެ. އަދި މިދިޔަ 2018 ވަނަ އަހަރު ކުރިޔަށް ދިޔަ މި ކެމްޕޭންގެ ފުރަަތަމަ ސީޒަނުގައި 120 ދުވަހުގެ ފިޓްނެސް ފެސްޓިވަލް އިންޑިއާގެ 43 ސިޓީއެއްގައި ކުރިޔަށް ގެންގޮސްފައިވާއިރު މި ފެސްޓިވަލްގައި ގާތްގަނޑަކަށް 200 މިލިއަން މީހުން ބައިވެރިވެފައިވެއެވެ.

މި ކެމްޕޭންގެ 'އެމްބެސެޑަރ އޮފް ވެލްނެސް' ގެ މަގާމަށް ސުނިލް ހަމަޖެއްސުމަށް ނިންމުމާއި ގުޅިގެން އޭނާ ބުނީ، ރާއްޖެއަަކީ ދުޅަހެޔޮ ސިއްޚަތު ރަނގަޅު ރައްޔިތެއް އުޅޭ ގައުމަކަށް ހެދުމަށް ސަރުކާރުން ކުރަމުންދާ މަސައްކަތުގައި ބައިވެރިވުމަށް އޭނާއަށް ފުރުސަތު ލިބިގެންދިޔުމަކީ ލިބޭ ވަރަށް ބޮޑު ޝަރަފެއް ކަމަށެވެ.

ސަރުކާރާއެކު ކުރާ މަސައްކަތުގައި އެންމެ މުހިންމު ކަމަކީ މުޖުތަމައުގައި ހުރި ސިއްޚީ ނުރަނގަޅު އާދަތައް ނައްތާލުމަށް އެހީތެރިވުން ކަމަށާއި، ފިޓްކޮށް ހުރުމަކީ ކޮންމެ ރައްޔިތަކަށް ވެސް ފަސޭހަކަމާއެކު ކުރެވޭނެ ކަމެއް ކަން އަންގަން ބޭނުންވާ ކަމަށްވެސް ސުނިލް ވަނީ ބުނެފައެވެ.

މީގެއިތުރުން ސުނިލް ބުނީ، ރާއްޖެއަކީ ދުޅަހެޔޮ ސިއްޚަތު ރަނގަޅު ރައްޔިތުން އުޅޭ ގައުމަކަށް ހެދުމަށް ރައީސް އިބްރާހިމް މުހައްމަދު ސާލިހު ގެންގުޅުއްވާ ތަސައްވަރު ހަގީގަތަކަށް ހެދުމަށް މިނިސްޓަރ އަހްމަދު މަހްލޫފް އަދި މިނިސްޓަރގެ ޓީމާއެކު މަސައްކަތް ކުރުމަކީ ފަޚުރެއް ކަމަށް ދެކޭ ކަމަށެވެ.

މިނިސްޓަރ އަހްމަދު މަހްލޫފް ވިދާޅުވީ، ދުޅަހެޔޮ ހަށިހެޔޮ މުޖުތަމައުއެއް ބިނާކުރުމަކީ މި ސަރުކާރުން ވަރަށް ބޮޑު އިސްކަމެއް ދެއްވާ ވައުދެއް ކަމަށާއި، އެ ވައުދު ފުއްދުމަށް މިހާރު ވެސް ގިނަ މަސައްކަތްތަކެއް ކުރަމުންދާ ކަމަށެވެ.

އެގޮތުން ރަށްރަށުގައި ސްޕޯޓްސް ކައުންސިލަރުން ގާއިމް ކުރުމާއި އައުޓްޑޯރ ޖިމް ބެހެއްޓުމުގެ މަސައްކަތް ބާރަށް ކުރިޔަށްދާ ކަމަށްވެސް މިނިސްޓަރ ވިދާޅުވިއެވެ. އަދި ހަމައެހެންމެ މި ކެމްޕޭންގައި 'އެމްބެސެޑަރ އޮފް ވެލްނެސް' ގެ ހައިސިއްޔަތުން ބައިވެރިވުމަށް ނިންމެވީތީ ސުނިލްއަށް މިނިސްޓަރ ޝުކުރު އަދާކުރެއްވިއިރު، ދުޅަހެޔޮ މުޖުތަމައުއް ބިނާކުރުމަށް ކުރަމުންދާ މަސައްކަތުގައި ސުނިލް ބައިވެރިވުމަކީ އެކަމަށް ލިބިގެންދިޔަ އިތުރު ހިތްވަރެއް ކަމަށް މިނިސްޓަރ ވިދާޅުވިއެވެ.