ވިއްސާރައިގަ އައްޑޫ ސިޓީގެ 50 ގެއަކަށް ބޮޑެތި ގެއްލުންވި : މޭޔަރ
12 އޮކްޓޯބަރު 2019 | ހޮނިހިރު 08:50ގެއްލުންވެފައިވާ ގެތަކުގެ އެސެސްމެންޓްގެ މަސައްކަތް ދަނީ ކުރަމުން
އައްޑޫސިޓީއަށް ބޯކޮށް ވާރޭވެހި ފެންބޮޑުވެފައި
ރާއްޖޭގެ އެކި ޞަރަޙައްދުތަކަށް މިހާރު ކުރަމުން ދާ ވިއްސާރައިގައި އައްޑޫސީޓީއަށް ބޯކޮށް ވާރޭވެހި މިހާތަނަށް 50 ގެއަކަށް ވަރަށް ބޮޑެތި ގެއްލުންތަކެއް ވެފައިވާކަމަށް އައްޑޫ ސިޓީގެ މޭޔަރ ޢަބްދުﷲ ޞާދިގު ވިދާޅުވެއްޖެއެވެ.
މޭޔަރ ވިދާޅުވީ ވިއްސާރައިގެ ސަބަބުން ބައެއް ގެ ތަކުގެ ހިފާ ގެންގުޅޭ ތަކެއްޗަށް ވަރަށް ބޮޑަށް ގެއްލުންވެފައިވާކަމަށެވެ.
ހުވަދު އަތޮޅުން ފެށިގެން އައްޑޫ ސިޓީއަށް މޫސުމާއި ބެހޭ ޤައުމީ އިދާރާ އިން މިއަދު ހެނދުނު 08:00 އިން މެންދުރު 12:00 ޖެހުމާއި ހަމައަށް ޔެލޯޓް އެލަރޓް ނެރެފައިވާއިރު ، ވަގުތުހަމަވުމާއެކު ، އަލުން މެޓް އޮފީހުން ވަނީ އެ ސަރަހައްދަށް މެންދުރު 12:00 އިން ހަވީރު 16:00 އަށް އިތުރުކޮށްފައެވެ.
ރާއްޖެއެމްވީއަށް މައުލޫމާތު ދެއްވަމުން، ޑިޒާސްޓަރ މެނޭޖްމަންޓްގެ ޗީފް އެގްޒެކިއުޓިވް ހިސާން ހަސަން ވިދާޅުވީ، ވިއްސާރާގައި ގެތަކަށް ގެއްލުންވެފައިވާ ކަމުގެ މައުލޫމާތު ލިބިފައިވާކަމަށާއި، ކައުންސިލާއި އެމްއެންޑީއެފާއި ގުޅިގެން އެ ފަރާތްތަކަށް އެހީތެރިވުމުގެ މަސައްކަތް ކުރަމުން އަންނަ ކަމަށެވެ. އަދި ކައުންސިލާއި ގުޅިގެން ގެއްލުންވެފައިވާ ގެތަކުގެ އެސެސްމެންޓް ހަދަމުންދާކަމަށްވެސް ހިސާން ވަނީ ވިދާޅުވެފައެވެ.
އެމްއެންޑީއެފުން ދަނީ ފެން ބޮޑުވެފައިވާ ޞަރަޙައްދުތަކުގެ ފެންހިއްކުމުގެ މަސައްކަތް ކުރަމުންނެވެ.
