ކުޅުދުއްފުށީ ހޮސްޕިޓަލުގައި ސީޓީ ސްކޭނާއި ކާޑިއެކް ސެންޓަރުގެ ޚިދުމަތް ރަސްމީކޮށް ފަށައިފި
ވޭތުވެދިޔަ 1 އަހަރު ތެރޭގައި ސީޓި ސްކޭނާއި ކާޑިއޯ ޓެސްޓްތައް ހެދުމަށް އިމަޖެންސީކޮށް 74 ބަލިމީހުން ރެފަރ ކުރެވިފައިވޭ
ކުޅުދުއްފުށީ ރީޖަނަލް ހޮސްޕިޓަލުގައި އަލަށް ޤާއިމް ކުރި ކާޑިއެކް ސެންޓަރު އަދި ސީޓީ ސްކޭންގެ ހިދުމަތް ރަސްމީކޮށް މިނިސްޓަރު އިފްތިތާހުކޮށްދެއްވަނީ
ހދ. ކުޅުދުއްފުށީ ރީޖަނަލް ހޮސްޕިޓަލުގައި ސީޓީ ސްކޭނާއި ކާޑިއެކް ސެންޓަރުގެ ޚިދުމަތް ރަސްމީކޮށް ފަށައިފިއެވެ.
މިކަމަށްޓަކައި ހދ. ކުޅުދުއްފުށީ ތަޢުލީމީ މަރުކަޒުގައި ރޭ ބޭއްވި ރަސްމިއްޔާތުގައި މި ޚިދުމަތްތައް ރަސްމީކޮށް އިފްތިތާޙުކޮށްދެއްވީ މިނިސްޓަރ އޮފް ހެލްތު ޢަބްދުﷲ އަމީންއެވެ. ހުކުރު ދުވަހު ރަސްމީކޮށް ޚިދުމަތް ދޭންފެށުނު ކާޑިއެކް ސެންޓަރުން ހުރިހާ ނޮން- އިންވޭސިވް ކާޑިއެކް ޓެސްޓްތައް (އެކޯ ކާޑިއޯގްރާމް، ތްރެޑްމިލް ޓެސްޓިން އަދި ހޯލްޑަރ މޮނިޓަރިން) ހެދޭނެ ކަމަށް ހެލްތު މިނިސްޓްރީން ބުނެއެވެ.
އެ މިނިސްޓްރީން ބުނީ ވޭތުވެދިޔަ 1 އަހަރު ތެރޭގައި ސީޓިއާއި ކާޑިއޯ ޓެސްޓް ހެދުމަށް އިމަޖެންސީކޮށް 74 ބަލިމީހުން މާލެ ގެންދިޔަ ކަމަށެވެ. އެގޮތުން ރިފަރ ކުރެވުނު ގިނަ ބަލި މީހުން މާލެ ގެންދިޔައީ ޗާޓަރ ފްލައިޓް ނުވަތަ ޝެޑިއުލްޑް ފްލައިޓުގައި ކަމަށާއި، މިގޮތަށް ގެންދާއިރު ކުރާއިރު، ޗާޓަރ ފްލައިޓުން ރެފަރ ކުރާނަމަ ރެފަރ ކުރެވޭ ކޮންމެ ބަލިމީހަކަށް 125600 ރުފިޔާ ޚަރަދު ކުރެވޭކަމަށް މިނިސްޓްރީން ބުނެއެވެ.
އަދި ޝެޑިއުލްޑް ފްލައިޓުން ކުރާނަމަ 14966 ރުފިޔާ ޚަރަދުވާކަމަށް ވެސް ހެލްތު މިނިސްޓްރީން ބުނެއެވެ. މީގެއިތުރުން މާލެގެންދާ ބަލިމީހާއާއި ޢާއިލާގެ އަތުން އެތަކެއް ޚަރަދުތަކެއް ކުރަންޖެހޭ ކަމަށާއި، އަލަށް ފެށި ޚިދުމަތްތަކުގެ ސަބަބުން މިކަމަށް ކުރާ ޚަރަދު ވަރަށް ބޮޑުތަން ދަށްވެގެންދާނެ ކަމަށް ހެލްތް މިނިސްޓްރީން ބުނެއެވެ.
ކުޅުދުއްފުށީ ރީޖަނަލް ހޮސްޕިޓަލުގެ ތަފާސް ހިސާބުތައް ދައްކާގޮތުން އެވްރެޖްކޮށް 305 ބަލިމީހުން ހޮސްޕިޓަލުން ޚިދުމަތް ހޯދައެވެ. އަދި ހޮނިހިރު ދުވަހު އެވެރެޖްކޮށް 650 މީހުން ޚިދުމަތް ހޯދާއިރު މީގެ ތެރޭގައި ހިމެނެނީ ހދ، ހއ އަދި ށ އަތޮޅު މީހުންނެވެ. ހދ ކުޅުއްފުށީ ރީޖަނަލް ހޮސްޕިޓަލްގައި މިވަގުތު 28 ޑޮކްޓަރުން، 78 ނަރުހުން އަދި 16 އެހެނިހެން މެޑިކަލް ޕްރެކްޓިޝަނުން ފަރުވާދެމުންއާދެއެވެ.
އިއްޔެ ރަސްމީކޮށް ހުޅުވިގެންދިޔަ ސީޓީ ސްކޭން އަދި ކާޑިއެކް ސެންޓަރުން 64،000 މީހުނަށް މިޚިދުމަތް ލިބިގެން ދާނެއެވެ. ހދ. ކުޅުދުއްފުށީ ރީޖަނަލް ހޮސްޕިޓަލުގައި ޚިދުމަތް ފެށުނު ސީޓީ ސްކޭން އަދި ކާޑިއެކް ސެންޓަރަކީ ސަރުކާރުން ތަރައްޤީ ކުރުމަށް ނިންމާފައިވާ 5 ހޮސްޕިޓަލް ގެ މަޝްރޫއުގެ ދަށުން ހިމެނޭކަމެކެވެ.
ދައުލަތުގެ ބަޖެޓުން 50 މިލިއަން ރުފިޔާ ޚަރަދުކޮށްގެން ކުޅުދުއްފުށި ރީޖަނަލް ހޮސްޕިޓަލުގައި މިޚިދުމަތް އަލަށް ތަޢާރަފު ކުރެވިގެންދިޔަ އިރު، ގާތްގަނޑަކަށް ހއ. އަތޮޅުގެ 23000 ރައްޔިތުން، ހދ. އަތޮޅުގެ 27000 ރައްޔިތުން އަދި ށ. އަތޮޅުގެ 18000 ރައްޔިތުން މިޚިދުމަތް ހޯދާނެކަމަށް ހެލްތު މިނިސްޓްރީން ލަފާކުރެއެވެ.
