މާލޭ ސިޓީގެ މަގުތައް އިރުއިރުކޮޅާ ކޮންނަން ނުޖެހޭ ގޮތަށް މާލޭގެ މަގުތައް ތަރައްގީކުރުމުގެ މަސައްކަތް ކުރަން ހަމަޖެހިފައިވާ ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެ އެވެ.

ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީއަށް ހާޒިރުވެވަޑައިގެން ދެއްކެވި ވާހަކަ ފުޅުގައި މިނިސްޓަރ އަސްލަމް ވިދާޅުވީ މާލޭގައި ފެންބޮޑު ވުމަކީ ދޭތެރެއަކުން ދިމާވާ މައްސަލައެއް ކަމަށާއި މާލެއަކީ ބިންގަނޑު އެއްވަރަށް އޮތް ތަނަކަށް ވެފައިވުމުން ފެން ބޮޑުވަމުން ދަނީ ހުންނަ އަޑިއަޑިގަނޑުގައި ކަމަށެވެ.

މަގުތަކުގައި ފެންހިންދުމުގެ މަސައްކަތް މިހާތަނަށް ކުރަމުން އައީ ޕަމްޕް ސިސްޓަމްތަކެއް ޖަހައިގެން ކަމަށް މިނިސްޓަރ ވިދާޅުވިއެވެ.

މާލޭ ސިޓީ ކައުންސިލުން މަގުތައް ހެދުމަށް މަސައްކަތްތަކެއް ކުރަމުންދާ ކަމަށާއި އެކަމަށް މިނިސްޓްރީން ވަރަށްބޮޑު އެއްބާރުލުމެއްދީފައިވާނެ ކަމަށް ވެސް އަސްލަމް ވިދާޅުވިއެވެ.

މިނިސްޓަރ ވިދާޅުވީ މާލޭ ސިޓީކައުންސިލުން މަގުތައް ހެދުމަށް މަސައްކަތް ކުރަމުންދަނީ މާލޭގެ ސްޓޯމް ވޯޓަރ ޑްރެއިނޭޖް ވެސް ހިމެނޭގޮތަށް ކަމަށެވެ.

މީގެ އިތުރުން ބައެއް މަގުތައް އެއްވަރު ކުރުމާއި، ޕާކިންގއަށް ގެންނަން ޖެހޭ ބަދަލުތައް ގެނައުމާއި އިރުއިރުކޮޅާއި މަގުތައް ކޮންނަން ނުޖެހޭނެ ގޮތަށް އަޑީގައި ހޮޅިތައް ތަރުތީބުކޮށްގެން ގެންދަން މަސައްކަތް ކުރަމުން އަންނަ ކަމަށް މިނިސްޓަރ ވިދާޅުވިއެވެ.

މީގެ ކުރިން މާލޭގެ މަގުތައް ހިއްކާފައިވަނީ ފެންތައް ބޭރުވާ ގޮތަށް ވިސްނާފައި ނޫންކަން ނޫންކަން ފާހަގަ ކުރައްވާ މިނިސްޓަރ ވިދާޅުވީ ފެން ހިނދަން މާލޭގައި ހުސްޖާގަ ނެތް ކަމަށާއި އޮހޭ ހުރިހާ ފެނެއް ބޭރުކުރަން ޖެހިފައިވާ ކަމަށެވެ.

އެހެންކަމުން އެކަމަށް އަނެއްކާވެސް އާޓިފިޝަލް ހައްލެއް ހޯދަން ޖެހޭ ކަމަށް ވިދާޅުވިއެވެ.

އަދި ސްޓޯމް ވޯޓަރ ކަލެކްޓް ކުރާނެ ތަނެއް ހޯދުމުގެ މަސައްކަތްވެސް ކުރަމުންދާ ކަމަށް މިނިސްޓަރ ވިދާޅުވިއެވެ.