ސައިކަލެއްގެ މަތީގައި އިންދާ ގަޔަށް ފެންޖެހި ބިދޭސީ މީހާގެ މައުލޫމާތު ހޯދަނީ
7 އޮކްޓޯބަރު 2019 | ހޯމަ 08:44މި މައްސަލަ ފުލުހުން ދަނީ ތަހުގީގު ކުރަމުން
ސައިކަލު މަތީގައި އިންކަމަށް ބުނެ ބިދޭސީއެއް ގަޔަށް ފެންޖަހާ ވީޑިއޯގެ ކެޕްޗާއެއް
ސައިކަލެއްގެ މަތީގައި އިންދާ ބިދޭސީއެއް ގަޔަށް ފެންޖެހި މައްސަލައިގައި، އެ ސައިކަލުގައި އިން ބިދޭސީ މީހާގެ މައުލޫމާތު ފުލުހުން ހޯދަން ފަށައިފިއެވެ.
ފުލުހުން ބުނީ ސައިކަލެއްގެ މަތީގައި އިން މީހެއްގެ ގަޔަށް ފެންޖެހި މައްސަލައިގެ ތަހުގީގަށް ބޭނުންވާ، އަނިޔާ ލިބުނު މީހާ ދެނެގަތުމުގެ މަސައްކަތް ކުރަމުންދާ ކަމަށެވެ. އަދި އެމީހާއާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ ފުލުހުންގެ ޖެނެރަލް އިންޓެލިޖެންސް ޑިޕާޓްމަންޓްގެ ނަންބަރު 9631696 އަށް ގުޅާ އެ މައުލޫމާތު ހިއްސާ ކުރުމަށް ވެސް ފުލުހުން ވަނީ އެދިފައެވެ.
ސައިކަލެއްގެ މަތީގައި އިންދާ ބަންގުލަދޭޝް މީހެއްކަމަށް ލަފާކުރެވޭ މީހާގެ ގަޔަށް ފެންޖަހާ ވީޑިއޯއެއް އާންމުވެފައިވަނީ މިދިޔަ މަހުގެ 30 ވަނަ ދުވަހުއެވެ. އެ ވީޑިއޯއިން ފެންނަ ގޮތުގައި ކަޅުކުލައިގެ އެއާބްލޭޑެއްގައި އިށީންދެގެން އިން ބިދޭސީ މީހާ ގަޔަށް ދިވެއްސަކު ފެން ބާލިދީއެއް ޖެހުމަށްފަހު ސައިކަލުގެ މަޑި ފޮތިގަނޑަކުން ފޮހޭތަން ފެނެއެވެ.
ފެން ބާލިދީ ޖެހުމުން އެމީހާގެ ފޯނަށް ފެން އެޅިގެން ފޯނު ތަޅުވާތަން މި ވީޑިއޯއިން ފެނެއެވެ. މި މައްސަލައިގައި ގިނަ އަދަދެއްގެ ބަޔަކު ފެންޖެހި މީހާއަށް ފާޑު ކިޔާފައިވެއެވެ. ނަމަވެސް އެމީހާ ކުރި ކަން ރަނގަޅުކަމަށް ބުނެ ބައެއް މީހުން އެކަމަށް ހިތްވަރުދީފައިވެއެވެ.
އަދި ފެންޖެހި ދިވެހި މީހާ ގަޔަށް ފެންޖެހުމަށް ސޯޝަލް މީޑިއާގައި ގިނަ ބަޔަކު ގޮވަމުން ދަނިކޮށް، ފެންޖެހި ދިވެހި މީހާގެ ސައިކަލެއްކަމަށް ބުނާ ކަޅު ކުލައިގެ ވޭވް ސައިކަލަކަށް ރީނދޫ ކުލައިގެ ދަވާދު ވަނީ ޖަހާފައެވެ.
