ނޭޝަނަލް ލައިބްރަރީން ފޯނެއް ވަގަށް ނެގި މައްސަލައެއް ބަލަނީ
6 އޮކްޓޯބަރު 2019 | އާދީއްތަ 17:23އެ މައްސަލާގައި ހައްޔަރު ކުރީ 37 އަހަރުގެ ފިރިހެނެއް
ނޭޝަނަލް ލައިބްރަރީ
ނޭޝަނަލް ލައިބްރަރީން ފޯނެއް ވަގަށް ނެގި މީހަކު އަތުލައިގަނެ އެ މައްސަލަ ބަލަން ފަށާފައިވާ ކަމަށް ފުލުހުން ބުނެފިއެވެ.
ރާއްޖެ އެމްވީއަށް މައުލޫމާތު ދެމުން ފުލުހުން ބުނީ ލައިބްރަރީ ތެރެއިން ފޯނެއް ވަގަށް ނެގި ކަމަށް އާދިއްތަ ދުވަހުގެ ހެނދުނު 10:18 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
ފުލުހުން އިތުރަށް ބުނީ އެ މައްސަލާގައި ހައްޔަރު ކޮށްފައިވަނީ އުމުރުން 37 އަހަރުގެ ފިރިހެނެއް ކަމަށާއި އެމީހާ ހައްޔަރުކޮށްފައިވަނީ ފޯނު ވަގަށް ނަގައިގެން ނުކުމެ އެ ފޯނު ވިއްކާލާފައި ދަނިކޮށް މަގުމަތީން ކަމަށެވެ.
އެމީހާ ފުލުހުންގެ ބެލުމުގެ ދަށުގައި ހުރިއިރު ފޯނު ވިއްކާލި މީހާ އަތުން އަނބުރާ ފޯނު ހޯދުމަށް ފަހު އެ ފޯނުގެ ވެރިފަރާތަށް މިހާރު ހަވާލުކޮށްފައިވާނެ ކަމަށް ވެސް ފުލުހުން ބުންޏެވެ.
އެ މައްސަލަ ހިނގައިދިޔަ ގޮތް ފުލުހުން ދަނީ އިތުރަށް ތަހުޤީގު ކުރަމުންނެވެ.
