އެމްޑީއެން އުވާލަން ޕެޓިޝަނެއްގައި ސޮއިކުރަން ފަށައިފި
5 އޮކްޓޯބަރު 2019 | ހޮނިހިރު 09:53މިހާތަނަށް 10،200 މީހުން ވަނީ ޕެޓިޝަނުގައި ސޮއި ކޮށްފައި
އެމްޑީއެން އުވާލުމަށް ސޮއިކުރުން
''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' ނަމުގައި މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) ފަރާތުން އާންމުކުރި ރިޕޯޓާއި ގުޅިގެން އެ ޖަމިއްޔާ އުވާލަން ޕެޓިޝަނެއްގައި ސޮއިކުރަން ފަށައިފިއެވެ.
ސޮއި ކުރުމަށް ޕެޓިޝަނެއް ހުށަހަޅާފައިވާ ފަރާތެއް އެނގިފައި ނުވާއިރު، ޕެޓިޝަނެއް އެކުލަވައިލި ފަރާތުން ވަނީ އިސްލާމްދީނާއި ދެކޮޅަށް ބަސްބުނާ މީހުންނަށް ފިޔަވަޅު އެޅުމަށް ރައީސް ސޯލިހަށް ގޮވާލާ ކަމަށާއި، އެ ޖަމިއްޔާއިން ވަނީ ދިވެހި ރާއްޖޭގެ ގާނޫނު އަސާސީއާއި ޖަމިއްޔާތަކާއި ބެހޭ ގާނޫނާއި ހިލާފުވެފައިކަމަށެވެ. އަދި އެ ޖަމިއްޔާ އުވާނުލެވޭނަމަ އެއީ ދީނަށް ފުރައްސާރަކުރާ ފަރާތްތަކަށް ދެވޭ ބޮޑު ހިއްވަރެއްކަމަށްވެސް އެ ފަރާތްތަކުން ވަނީ ފާހަގަކޮށްފައެވެ. މިހާތަނަށް އެ ޕެޓިޝަންގައި 10.000 ވުރެ ގިނަ ފަރާތަކުން ވަނީ ސޮއިކޮށްފައެވެ. (އަދަދު ބަދަލުވުން އެކަށީގެންވޭ).
މީގެއިތުރުން، އެމްޑީއެން އިން ނެރުނު ރިޕޯޓްގައި އިސްލާމްދީނާއި ރަސޫލާއަށް ނިސްބަތްކޮށް ފުރައްސާރަކޮށްފައިވާ މައްސަލަ އިސްލާމިކް މިނިސްޓްރީންވެސް ވަނީ ފުލުހުންނަށް ހުށަހަޅައިފިއެވެ. އިސްލާމިކް މިނިސްޓްރީން ބުނީ އެމްޑީއެން އިން ނެރުނު ރިޕޯޓުގައި އިސްލާމް ދީނާއި ރަސޫލާއަށް ފުރައްސާރަކޮށް، އިސްލާމްދީނުގެ އަސްލުތަކާއި ހިލާފު އަދި ދިވެހިންގެ ދީނީ އެއްބައިވަންތަކަން ގެއްލޭ ގޮތަށް ވާހަކަ ދައްކާފައިވާތީ އެކަން ތަހުގީގުކޮށް ފިޔަވަޅު އެޅުމަށް ބުރާސްފަތި ދުވަހުގެ 13:46 ގައި ފުލުހުންނަށް މައްސަލަ ހުށަހަޅާފައިވާ ކަމަށެވެ.
އެމްޑީއެންގެ ރިޕޯޓާއި ގުޅިގެން އަދާލަތު ޕާޓީން ވެސް ކަންބޮޑުވުން ފާޅުކޮށްފައި ވާއިރު، އެ ޕާޓީން ބުނެފައިވަނީ އެ ރިޕޯޓަކީ 2016 ވަނަ އަހަރު އާންމު ކުރެވި، އަދި އޭގެ ފަހުން 2019 ވަނަ އަހަރު އަނބުރާ ގެންދެވިފައިވާ ރިޕޯޓެއްކަމުގައި ވިޔަސް ރައްޔިތުންގެ މެދުގައި އިންތިހާޔަށް ބޮޑު ނުތަނަވަސްކަމެއް އުފެދިފައިވާ ކަމަށެވެ. އަދި އެފަދަ ކަންކަމާ ގުޅިގެން އުފެދޭ ނުތަނަވަސްކަމުގެ ތެރޭގައި ވަކިވަކި ފަރުދުންނާއި ޖަމާއަތްތަކަށް އިންޒާރުދިނުމާއި، އަނިޔާވެރި އަމަލުތަކަށް މަގުފަހިވެ، މުޖުތަމައުގެ އަމަންއަމާންކަން ގެއްލިދާނެ އެހެންވެސް ކަންކަމާއި ބަސްމަގު ޚިޔާރުނުކޮށް، ސުލްހަވެރި ގޮތުގައި ގާނޫނީ ހަމަތަކުގެ ތެރެއިން ޚިޔާލުފާޅުކުރުމުގެ މިނިވަންކަމުގެ ހައްގުގެ ބޭނުން ކުރުމަށް އެ ޕާޓީން ވަނީ ގޮވާލާފައެވެ.
މިކަމާއި ގުޅިގެން، ޢާއްމުންގެ ފާޑު ކިޔުންތައް ޢަމާޒުވުމުން އެ ރިޕޯޓް ނެގުމަށް ފަހު އެ ޖަމިއްޔާއިން ވަނީ މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ. އެ ރިޕޯޓުގެ މައްސަލަ އިސްލާމިކް މިނިސްޓްރީން ބުރާސްފަތި ދުވަހު ވަނީ ފުލުހުންނަށް ހުށަހަޅާފައެވެ. އަދި ފުލުހުން ވެސް ވަނީ އެ މައްސަލަ ހުށަހަޅާފައިވާކަން ކަށަވަރުކޮށްދީފައެވެ.
މީގެ އިތުރުން، އެ ޖަމިއްޔާގެ މެންބަރުންނަށް ބިރު ދެއްކި މައްސަލަ އެއްވެސް ފުލުހަށް ވަނީ ހުށައަޅާފައެވެ.
