ޖޭއެސްސީއަށް އާންމުގެ ތެރެއިން ނަގާ މެމްބަރުކަމަށް ކުރިމަތިލާން އަލުން ހުޅުވާލަނީ

އާންމު ރައްޔިތުންގެ ތެރެއިން ޖުޑީޝަލް ސާވިސް ކޮމިޝަން (ޖޭއެސްސީ) އަށް ރައްޔިތުންގެ މަޖިލީހުން ކަނޑައަޅާ މެންބަރު ކަމަށް ކުރިމަތިލާން އަލުން ހުޅުވާލާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ތިންވަނަ ދައުރުގެ ފުރަތަމަ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ ކުރިން ޖޭއެސްސީއަށް އާންމުގެ ތެރެއިން މެމްބަރަކު އައްޔަން ކުރުމަށް ކަނޑައެޅީ ކުރިން އަމަލު ކުރަމުންދިޔަ ރައްޔިތުންގެ މަޖިލީހުގެ ގަވައިދުގެ ދަށުން ކަމަށް ވާތީ މިހާރު އަމަލު ކުރަމުންދާ މަޖިލިސް ގަވައިދުގައި އެގޮތަށް އިއުލާން ކުރެވޭ މަރުހަލާ ތަފާތު ވާކަމަށް ޖުޑީޝަރީ ކޮމިޓީއިން އަންގާފައިވާ ކަމަށެވެ. އަދި ވީހާވެސް ގިނަ ފަރާތްތަކަށް އިއުކާން ކުރުމުގެ ފުރުސަތު ހޯދައި ދިނުމަށް އެ ކޮމިޓީއިން އެދިފައިވަނީ އަލުން އިއުލާން ކުރުމަށްފަހު ޖޭއެސްސީގެ މެމްބަރަކު މަޖިލީހުން ނެގުމަށް ކަމަށް ރައީސް ނަޝީދު ވިދާޅުވިއެވެ.

ކުރިން ޖޭއެސްސީއަށް މެމްބަރަކު އައްޔަން ކުރުމަށް ހުޅުވާލި ފުރުސަތުގައި އެމަގާމަށް ކުރިމަތިލީ ފަރާތްތަކުގެ ތެރެއިން ތިން ނަމެއް ދިރާސާ ކުރުމަށް ޖުޑިޝަރީ ކޮމިޓީއަށް ފޮނުވިއެވެ. ނަމަވެސް އެކޮމިޓީއިން އެދުނީ އާ ގަވައިދަށް ފެއްތުމަށް އަލުން އެމަގާމަށް އެދި ފުރުސަތު ހުޅުވާލުމަށެވެ.

ޖޭއެސްސީގައި ތިއްބަވާނީ މަޖިލީހުގެ ރައީސާއި، މަޖިލީހުން ކަނޑައަޅާ މެންބަރަކާއި، ސުޕްރީމް ކޯޓުގެ ފަނޑިޔާރުންގެ ތެރެއިން ބޭފުޅަކާއި، ބަންޑާރަ ނައިބާއި ދަށު ކޯޓުތަކުން ފަނޑިޔާރަކާއި، ހައި ކޯޓުގެ ފަނޑިޔާރަކާއި، ރައީސުލްޖުމްހޫރިއްޔާ ކަނޑައަޅުއްވާ މެންބަރަކާއި ސިވިލް ސާވިސް ކޮމިޝަންގެ ރައީސް އާއި، އާންމުންގެ ތެރެއިން މެންބަރެއްގެ ގޮތުގައި މަޖިލީހުން ކަނޑައަޅުއްވާ ބޭފުޅަކާއި، ގާނޫނީ ވަކީލުންގެ ތެރެއިން އިންތިޚާބުކުރާ ވަކީލެކެވެ.