އެންއައިސީގެ މެމްބަރުކަމަށް ރައީސްއަށް ފެނިވަޑައިގެންނެވި 4 ނަންފުޅު ދިރާސާ ކުރަން ކޮމިޓީއަށް
3 އޮކްޓޯބަރު 2019 | ބުރާސްފަތި 08:11ކުރިމަތިލައްވާފައިވާ ކިތައް ބޭފުޅުންކަމެއް ހާމައެއް ނުކުރޭ
މަޖިލިސް ޗެމްބަރުގައި މެމްބަރުން
ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާއަށް ފެނިވަޑައިގަންނަވާ ހަތަރު ބޭފުޅުންގެ ނަންފުޅު އިތުރަށް ދިރާސާކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ފޮނުވައިފިއެވެ.
އެންއައިސީގެ މެމްބަރުކަމަށް ކުރިމަތިލެއްވި ބޭފުޅުންގެ ތެރެއިން އެ މަނިކުފާނު މަޖިލީހަށް ފޮނުއްވާފައިވާ ހަތަރު ނަންފުޅުގެ ތެރެއިން އެއް ނަންފުޅެއް ކަނޑައަޅައިދެއްވުމަށް ރައީސް ވަނީ އެދިވަޑައިގެންފައެވެ. ރައީސް ފޮނުއްވި ސިޓީފުޅު އަމީންއާންމު، މަޖިލީހުގެ ތަޅުމަށް އިއްވަވާފައިވަނީ ރައީސް އެ ނަންފުޅުތައް ފޮނުއްވި ތަރްތީބުންނެވެ.
އެންއައިސީގެ މެމްބަރު ކަމަށް ކުރިމަތިލުމަށް ހުޅުވާލާފައިވަނީ އެ ކޮމިޝަންގެ މެމްބަރުކަމުގައި ކުރިން ހުންނެވި މުހައްމަދު ފަރުހާދު އިސްތިއުފާ ދެއްވުމާ ގުޅިގެންނެވެ.
ނޭޝަނަލް އިންޓެގްރިޓީ ކޮމިޝަން އުފައްދާފައި ވަނީ 2016 ވަނަ އަހަރެއެވެ. އެއީ ފުލުހުންގެ ޤާނޫނުގެ ދަށުން އުފައްދާފައިވާ ޕޮލިސް އިންޓެގްރިޓީ ކޮމިޝަނާއި، ކަސްޓަމްސްގެ ޤާނޫނުގެ ދަށުން އުފައްދާފައިވާ ކަސްޓަމްސް އިންޓެގްރިޓީ ކޮމިޝަން އުވާލުމަށް ފަހު އުފައްދާފައިވާ ކޮމިޝަނެކެއެވެ.
