ލީކުވި އޯޑިއޯއާ ގުޅިގެން ނަހުލާގެ ދިފާއުގައި ފިރިކަލުން ގާސިމް!
2 އޮކްޓޯބަރު 2019 | ބުދަ 05:36ބަދުނާމު ކުރުމުގެ ގޮތުން ބަޔަކު ނެރުނު އޯޑިއޯއިން އެފަރާތްތަކުގެ "އަތަށް ގޮވީ"
ޖުމްހޫރީ ޕާޓީގެ ލީޑަރ ގާސިމް އިބްރާހިމް(މ) އަނބިކަނބަލުން އައިޝަތު ނަހުލާ(ވ)
ޓްރާންސްޕޯޓް މިނިސްޓްރީގައި ހައްލުކުރަންޖެހޭ ކަންތައްތަކެއް އެބަހުރި ކަމަށާއި އެކަން ހައްލު ކުރަން ކިތަންމެ ގިނަ ބަޔަކަށް ފިޔަވަޅު އަޅަން ޖެހުނަސް ފަސް ޖެހިވަޑައި ނުގަންނަވާނެ ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވުމުން އެކަމަނާގެ ފިރިކަލުން އަދި ޖުމްހޫރީ ޕާޓީގެ ލީޑަރ ގާސިމް އިބްރާހިމް ދިފާއު ކުރައްވައިފިއެވެ.
ޓްރާންސްޕޯޓް މިނިސްޓްރީގެ ބައެއް މުއައްޒަފުންނާއި ބައްދަލުކުރައްވައި ގާސިމްގެ ހަނގު އަނބިކަނބަލުން ނަހުލާ ދެއްކެވި ވާހަކައެއްގެ އޯޑިއޯ ސޯޝަލް މީޑިއާގައި ވަނީ ދައުރު ވެފައެވެ. އެއޯޑިއޯގައި ނަހުލާ ވަނީ ޓްރާންސްޕޯޓް މިނިސްޓްރީގައި ހުރި ކަންބޮޑުވުންތަކުގެ ވާހަކަ ދައްކަވާފައެވެ. އެތަނުގެ މުއައްޒަފުން ގަޑިޖެހޭ ވާހަކައާއި އޮފީހުގައި ތިބެންޖެހޭ ވަގުތުތަކަށްވުރެ ކޮފީގައި ތިބޭ ވަގުތު ގިނަކަމަށް ވިދާޅުވެ ރައްޔިތުންނަށް ޚިދުމަތް ދޭން ޖެހޭ ފަރާތްތުގެ ޒިންމާ އަދާނުކުރާ ކަމަށް ވިދާޅުވެ ނަހުލާގެ ކަންބޮޑުވުން ވަނީ ފާޅުކުރައްވާފައެވެ.
ޖުމްހޫރީ ޕާޓީއަށް އަލަށް ގުޅުނު މެމްބަރުން ސޮއިކުރުމަށް އަންގާރަ ދުވަހުގެރޭ ބޭއްވި ރަސްމިއްޔާތުގައި ވާޙަކަ ދައްކަވަމުން ގާސިމް ވިދާޅުވީ ލީކުވި އޯޑިއޯއާއި ގުޅިގެން ނަހުލާއަށް ލިބުނީ ރައްޔިތުންގެ ލޯބި ކަމަށެވެ. ބަދުނާމު ކުރުމުގެ ގޮތުން ބަޔަކު ނެރުނު އޯޑިއޯއިން އެފަރާތްތަކުގެ "އަތަށް ގޮވީ" ކަމަށް ގާސިމް ވިދާޅުވިއެވެ.
ގާސިމް ވިދާޅުވީ ނަހުލާގެ ޒިންމާ އަދާ ކުރުމުގައި ދަށުން ތިއްބެވި މުއައްޒަފުން މަސައްކަތް ނުކުރާނަމަ އެވާހަކަ ދައްކަވާ ހައްލު ކުރެއްވުމަށް އެކަމަނާ މަސައްކަތް ކުރައްވާނެ ކަމަށެވެ. ނަހުލާ ކުރައްވަނީ ރައީސް އިބްރާހިމް މުހައްމަދު ސާލިހު ހަވާލު ކުރެއްވި ޒިންމާ ކަމަށާއި މިނިސްޓްރީގެ މުއައްޒަފުންނާ ހަވާލު ކުރާ މަސައްކަތްތައް ނުނިންމާ އެކަމަނާގެ މައްސަލަތައް ރައީސަށް ޝަކުވާގެ ގޮތުގައި ސިޓީ ފޮނުވި ނަމަވެސް އެޅޭނެ ފިޔަވަޅެއް ނޯންނާނެ ކަމަށް ގާސިމް ވިދާޅުވިއެވެ. "މާލިމީ ވެރިޔާ" ކަމެއް ރަނގަޅު ކުރަން އެންގުމުން މަސައްކަތް ނުކުރާތީ އަޅާ ފިޔަވަޅެއް ރައީސަށް ބަދަލު ކުރެވޭނެ ގޮތެއް ނޯންނާނެ ކަމަށް ގާސިމް ވިދާޅުވިއެވެ.
ޓްރާންސްޕޯޓް މިނިސްޓްރީގައި ހުރި ކަރަޕްޝަންގެ ވާހަކައަކީ އާ ވާހަކައެއް ނޫންކަމަށް ވިދާޅުވެ ގާސީމް ވިދާޅުވީ އެފަދަ ކަމެއް ނަހުލާ ނުކުރައްވާނެ ކަމުގެ ފުރިހަމަ ޔަގީންކަން އޮތް ކަމަށެވެ.
ޓްރާންސްޕޯޓް މިނިސްޓްރީގެ މުއައްޒަފުން އޮފީހުގައި ތިބޭ ވަގުތައްވުރެ ކޮފީގައި ތިބޭ ވަގުތު ގިނަ ކަމަށް މިނިސްޓަރ ނަހުލާ ވިދާޅުވާ އޯޑިއޯ ލީކުވެފައިވާއިރު އެތަނުގެ މުއައްޒަފުންގެ ހާޒިރީ ރިޕޯޓެއް ނަގައި ސިވިލް ސަރވިސް ކޮމިޝަން(ސީއެސްސީ)އަށް ފޮނުވާފައިވާ ކަމުގެ މައުލޫމާތު ވަނީ ލިބިފައެވެ. އެގޮތަށް ހާޒިރީ ރިޕޯޓް ފޮނުއްވެވީ ތަނުގެ މުއައްޒަފުން ވަކި ކުރުމަށް ނަހުލާ ކުރެއްވި ކަމެއްގެ ތުހުމަތާއި އެކު މުއައްޒަފުން ނުހައްގުން ވަޒީފާއިން ވަކި ކުރުން ހުއްޓުވައި ދެއްވުމަށް އެދި އެމިނިސްޓްރީގެ ބައެއް މުއައްޒަފުން ވަނީ ރައީސް ސާލިހަށް ޕެޓިޝަނެއް ވެސް ހުށައަޅާފައެވެ.
އާއްމުކުރި އޯޑިއޯގައި ނަހުލާ ވިދާޅުވެފައިވަނީ މަގާމާއި ހަވާލުވެވަޑައިގެންނެވީ އެއްވެސް ކަމެއް އުނިވެގެން ނޫންކަމަށާއި ރައްޔިތުންނަށް ޚިދުމަތް ކުރެއްވުމަށް ކަމަށެވެ. ކޮންމެ މިނިސްޓްރީއެއްގައި ވެސް ވަޒީރު ފިޔަވައި އެހެން އެއްވެސް މުއައްޒަފަކު އޮފީސް ގަޑީގައި ބޭނުން ގަޑިއަކު އޮފީހަށް ވަދެ ނިކުމުގެ ފުރުސަތު ނޯންނާނެ ކަމަށް ވެސް އެ އޯޑިއޯގައި ނަހުލާ ވިދާޅުވެއެވެ.
