ބަލްގޭރިއާގެ ކްރިސްޓަލީނާ ޖޯޖިއޭވާއާ އެކު އައިއެމްއެފް ތާރީހުގެ ތެރެއަށް
26 ސެޕްޓެމްބަރު 2019 | ބުރާސްފަތި 13:21މިއީ ތަރައްގީވަމުން އަންނަ ގައުމެއްގެ ބޭފުޅަކު މިމަގާމަށް އައްޔަނުކުރެވުނު ފުރަތަމަ ފަހަރު
އައިއެމްއެފްގެ އެމްޑީގެ މަގާމަށް އައްޔަނުކުރެވުނު ކްރިސްޓަލީނާ ޖޯޖިއޭވާ
އިންޓަރނޭޝަނަލް މަނިޓަރީ ފަންޑު (އައިއެމްއެފް) ގެ މެނޭޖިންގ ޑިރެކްޓަރަކަށް، ބަލްގޭރިއާގެ ކްރިސްޓަލީނާ ޖޯޖިއޭވާ އައްޔަނުކޮށްފިއެވެ.
މިއީ އައިއެމްއެފްގެ ތާރީހުގައިވެސް ތަރައްގީވަމުން އަންނަ ގައުމެއްގެ މީހަކު، އެ ޖަމިއްޔާގެ އެންމެ އިސް މަގާމަށް އައްޔަނުކުރެވުނު ފުރަތަމަ ފަހަރެވެ. އައިއެމްއެފްގެ މަގާމު ލިބިވަޑައިގަތުމުގެ ކުރިން ޖޯޖިއޭވާ ހުންނެވީ ވަރލްޑް ބޭންކްގެ ސީއީއޯގެ މަގާމުގައެވެ.
މީގެ ކުރިން ޔޫރަޕިއަން ކޮމިޝަންގެ މަގާމުތައްވެސް އަދާކުރައްވާފައިވާ ޖޯޖިއޭވާ އަކީ، ދެ ޖިންސުގެ ދެމެދުގައިވާ ފަރަގުތައް ނައްތާލުމަށާއި މޫސުމަށް އަންނަ ބަދަލުތަކާއި ދެކޮޅަށް ގިނަގުނަ މަސައްކަތްތަކެއް ކުރައްވާފައިވާ ބޭކަނބަލެކެވެ.
އައިއެމްއެފްގެ މަގާމު ލިބިވަޑައިގަތުމަށް ފަހު ނޫސްވެރިންނާ ވާހަކަފުޅު ދައްކަވަމުން ޖޯޖިއޭވާ ވިދާޅުވީ، އެކަމަނާ ހުންނެވީ "އަތުކުރި އޯޅާލައިގެން، މަސައްކަތް ކުރުމަށް ތައްޔާރަށް" ކަމަށެވެ. ޖޯޖީވާ ވަޒީފާއަށް ނިކުންނަވާނީ އަންނާ ހަފުތާގެ އަންގާރަ ދުވަހުގައެވެ.
އައިއެމްއެފްގެ މަގާމާ ޖޯޖިއޭވާ ހަވާލުވެވަޑައިގެންނެވީ، އެމެރިކާއާއި ޗައިނާއާ ދެމެދު ހިނގަމުން އަންނަ އިގްތިސާދީ ކޯޅުންތަކުގެ ސަބަބުން މުޅި ދުނިޔޭގެ އިގްތިދާސީ ދުވެލި މަޑުޖެހިފައިވާ ދަނޑިވަޅެއްގައެވެ. އޭގެ އިތުރުން ދުނިޔޭގެ ގައުމުތަކުގެ ދަރަނީގެ މިންގަނޑުތައްވެސް ހުރީ މާޒީގައި ދުވަހަކުވެސް ނުދާ މިންވަރަކަށް މަތީގައެވެ.
އދ.ގެ ކުޑައިގެ ދަށުން ހިންގާ ޖަމިއްޔާއެއް ކަމުގައިވާ އައިއެމްއެފް އަކީ 189 މެމްބަރު ގައުމުގެ މައްޗަށް އެކުލެވޭ ޖަމިއްޔާއެކެވެ. މި ޖަމިއްޔާއަކީ ދުނިޔެއިން ފަގީރުކަން ނައްތާލުމަށާއި، ވަޒީފާތައް އުފެއްދުމަށާއި ބައިނަލްއަގްވާމީ ވިޔަފާރި ކުރިއެރުވުމުގެ ގޮތުން އުފައްދާފައިވާ ޖަމިއްޔާއެކެވެ. އައިއެމްއެފްގެ ޖުމްލަ އެސެޓްތަކުގެ އަގު އެއް ޓްރިލިއަން ޑޮލަރަށް އަރައެވެ.
