ދެކުނާއި އުތުރަށް ކުނި މެނޭޖްކުރުމުގެ ސިސްޓަމްތައް ގާއިމްކުރުމުގެ މަސައްކަތް ދަނީ ކުރަމުން: ނިޒާމް
26 ސެޕްޓެމްބަރު 2019 | ބުރާސްފަތި 05:34ކުނީގެ މައްސަލަ ހައްލުކުރުމަށް ގިނަ މަސައްކަތްތައް ކުރޭ
ފަލަސުރުހީ ޕްރޮގްރާމްގެ ތެރެއިން
ރާއްޖޭގެ ދެކުނުން އުތުރަށް ހުރިހާ ޒޯނެއްގައި ރަނގަޅު ގޮތުގައި ކުނި މެނޭޖްކުރުމުގެ ސިސްޓަމްތައް ގާއިމްކުރުމުގެ މަސައްކަތް ކުރާ ކަމަށް އެންވަޔަރަންމަންޓް މިނިސްޓްރީގެ ޕްރޮޖެކްޓް މެނޭޖަރު އަހުމަދު ނިޒާމް ވިދާޅުވެއްޖެއެވެ.
ރާއްޖެޓީވީގެ ފަލަސަރުހީ ޕްރޮގްރާމްގައި ނިޒާމް ވިދާޅުވީ ރާއްޖެއަށް ދިމާވެފައިވާ އެންމެ ބޮޑު އެއް މައްސަލައަކީ ކުނީގެ މައްސަލަ ކަމަށާއި، އެމައްސަލަ ހައްލުކުރުމަށް ބޮޑު ހޭދައެއްކޮށް، ގިނަ މަސައްކަތްތައް ކުރަމުން އަންނަ ކަމަށެވެ.
ނިޒާމް ވިދާޅުވީ ކުނި މެނޭޖް ކުރުމަށް ރައްކާތެރި ސިސްޓަމްތަކެއް ރަށްރަށުގައި ގާއިމްކުރުމާއި، ރަށްރަށުގައި ގާއިމް ކުރެވޭ ވަސީލަތްތަކުން ސަރަހައްދީ ފެންވަރެއްގައި ކުނި މެނޭޖްކުރުމުގެ މައި މަރުކަޒުތަކެއް ގާއިމްކޮށް ސަރަހައްދީ ކުނި މެނޭޖްކުރުމުގެ މަސައްކަތް ކުރާ ކަމަށެވެ.
އެގޮތުން ބޭރުގެ ހިލޭ އެހީއާ، ލޯނުގެ ހިލޭ އެހީއާ އަދި ދައުލަތުގެ ބަޖެޓުން ބޮޑު ހޭދައެއްކޮށްގެން ކުނި މެނޭޖްކުރުމުގެ ކަންކަން ރަށްރަށުގައި ފަހިކޮށްދިނުމަށްޓަކައި ވަރަށް ގިނަ މަޝްރޫއުތައް ކުރިއަށްދާ ކަމަށެވެ. އަދި ރާއްޖޭގެ ދެކުނުން އުތުރަށް ހުރިހާ ޒޯނެއްގައި ރަނގަޅު ގޮތުގައި ކުނިމޭނޭޖްކުރާ ސިސްޓަމްތައް ގާއިމްކުރުމުގެ މަސައްކަތް ވަރަށް ބާރު ސްޕީޑްގައި ކުރިއަށްދާ ކަމަށާއި، ކައިރި މުސްތަގުބަލްގައި ޚާއްސަކޮށް ރަށު ފެންވަރުގައި ވަރަށް ބޮޑެތި ބަދަލުތަކެއް ބައެއް ދިމަދިމާލުން ފެންނާނެ ކަމަށް ނިޒާމް ވިދާޅުވިއެވެ.
ނިޒާމް ވިދާޅުވީ މާލެ މިހިމެނޭ ސަރަހައްދަށް އަމާޒުކޮށްގެން އުފެދޭ ކުނި މެނޭޖްކުރުމަށް ވެސް އޭޑީބީގެ އެހީގައި ވަރަށް ބޮޑު މަޝްރޫއެއް ފެށިގެން ކުރިއަށްދާ ކަމަށެވެ.
ޕްރޮގްރާމްގައި ވާހަކަ ދައްކަވަމުން ކްލައިމެޓް ޗޭންޖް ޑިޕާޓްމެންޓް ޑިރެކްޓަރު އަލީ ޝަރީފް ވިދާޅުވީ މޫސުމަށް އަންނަ ބަދަލުތަކަށް ވަރަށް ޚާއްސަ އަހައްމިއްޔަތުކަމެއްދީގެން މިސަރުކާރުން މަސައްކަތް ކުރާ ކަމަށެވެ.
ޝަރީފް ވިދާޅުވީ ކްލައިމެޓް ޗޭންޖް ޕޮލިސީ ތަންފީޒުކުރުމުގެ ގޮތުން ނޭޝަނަލީ ޓާގެޓްތަކެއް އެބައޮތް ކަމަށާއި، ޕެރިސް އެގްރިމެންޓަށްފަހު ގިނަ ކަންކަން ތަންފީޒު ކުރުމަށް މަސައްކަތްތައް ކުރާ ކަމަށެވެ.
ޝަރީފް ވިދާޅުވީ ރާއްޖޭގެ ގިނަ ރަށްރަށަށް ދިމާވެފައިވަނީ ރަށްގިރުމުގެ މައްސަލަ ކަމަށާއި، މިމައްސަލަ ހައްލުކުރުމަށް ވެސް ގިނަ ޕްރޮޖެކްޓްތައް ހިންގުމަށް މަސައްކަތް ކުރާ ކަމަށެވެ. އޭގެ އިތުރުން ރާއްޖޭގެ މެޓް ސަރވިސް މިހާރު ހުރި ހާލަތުން މިދޭ ވޯނިންތައް ދިނުމާއި އަދި މިހާރު މެޓްގެ ނެޓް ވޯކް އެކްސްޕެންޝަން ނެހެދުމުގެ ގޮތުން މަޝްރޫއެއް އެކުލަވާލުމުގެ މަސައްކަތް ކުރާ ކަމަށް ވެސް ޝަރީފް ވިދާޅުވިއެވެ.
