ސައުދީގެ ތެޔޮ އުފައްދާ މައި މަރުކަޒުތަކަށް ހަމަލާދިނީ އިރާނުން ކަމަށް އިނގިރޭސިވިލާތާއި ފަރަންސޭސިވިލާތް އަދި ޖަރުމަނުން ބުނެފިއެވެ.

މި ތިން ގައުމުގެ ލީޑަރުން ނެރިފައިވާ ބަޔާނެއްގައި ބުނެފައި ވަނީ، 2015 ވަނަ އަހަރު އެއްބަސްވެފައިވާ ނިއުކްލިއަރ ހަތިޔާރާއި ބެހޭ އެއްބަސްވުމަށް އެ ގައުމުތަކުން އަދިވެސް ސަޕޯޓްކުރާކަމަށާއި އެހެން ނަމަވެސް އިރާނުން އެއްބަސްވުމުގެ ބޭރުން ކަންތައްކުރުން ހުއްޓަން ޖެހޭކަމަށެވެ. އަދި ސައުދީގެ ތެޔޮ މަރުކަޒުތަކަށް ހަމަލާދިނީ އިރާނުން ކަމަށާއި އެއަށް ދެވޭނެ އިތުރު ތަފްސީލެއް ނެތް ކަމުގައި ބަޔާނުގައިވެއެވެ.

މި ބަޔާނުގައި ތިން ގައުމުން ވަނީ މެދުއިރުމަތީގައި ހަމަޖެހުމަށް މަސައްކަތް ކުރުމަށް އިރާނަށް ގޮވާލާފައެވެ. އަދި އެއް ގައުމު، އަނެއް ގައުމާއި މެދު ނުރުހުންވާ ގޮތްގޮތަށް އަމަލު ނުކުރުމަށް ވެސް ތިން ގައުމުގެ ލީޑަރުންގެ ބަޔާނުގައި ވަނީ ގޮވާލާފަ އެވެ.

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވަނީ ސައުދީގެ ތެޔޮ މަރުކަޒުތަކަށް ދިން ހަމަލާތަކަށްފަހު އެގައުމުގެ ސަލާމަތީ ކަންކަން ވަރުގަދަ ކުރުމަށް އެމެރިކާއިން ކުރަމުން އަންނަ މަސައްކަތުގައި އިނގިރޭސިވިލާތުންވެސް ބައިވެރިވުމުގެ ވިސްނުން ގެންގުޅޭކަމަށް ވިދާޅުވެފައެވެ.

މި ހަމަލާތަކަށް ފަހު އެމެރިކާއާއި އިރާނާއި ދެމެދު ކުރިއަށްދަ ހަމަނުޖެހުންތަކަށް ނިމުމެއް ގެނައުމަށް ފަރަންސޭސިވިލާތުން މަސައްކަތް ކުރާއިރު އެ ގައުމުގެ ރައީސް އެމާނުއެލް މެކްރޮން ވަނީ ދެގައުމުގެ ރައީސުންނާއި ވަކިވަކިން ބައްދަލު ކުރައްވާ މައްސަލަތައް ހަމަޖެއްސޭނެ ގޮތަކާއި މެދު މަޝްވަރާކުރައްވާނެކަމުގައި ވިދާޅުވެފައެވެ. އެހެންނަމަވެސް އިރާނުގެ ފޮރިން މިނިސްޓަރ މުހައްމަދު ޖަވާދު ޒާރިފް ވަނީ އެމެރިކާއާއި އެކު އިރާނުން އެއްވެސް މަޝްވަރާއެއް ނުކުރާނެ ކަމަށް ވިދާޅުވެފައެވެ. ޒާރިފް ވިދާޅުވީ، ޓްރަމްޕަ ވަނީ އެގައުމާއިއެކު މަޝްވަރާކުރުމުގެ ދޮރުތައް ބަންދުކޮށްފައި ކަމުގައެވެ.

ޒާރިފް ވަނީ ތެޔޮ މަރުކަޒުތަކަށް ދިން ހަމަލާތަކުގައި އިރާނުގެ އަތެއް ނުވާކަމާށާއި އދ ގެ އާންމު މަޖިލީހަށް އެގައުމުގެ ރައީސް ހަަސަން ރޫހާނީ ދަތުރު ކުރަން ހަމަޖެހިފައި ވަނިކޮށް އެގައުމުން އެފަދަ ކަމެއް ނުކުރާނެ ކަމަށް އޭނާ ވިދާޅުވެފަ އެވެ. އަދި އިރާނުން ދިން ހަމަލާއެއް ނަމަ ތެޔޮ މަރުކަޒުތަކުގެ އެއްވެސް ބައެއް ސަލާމަތުން ނުހުންނާނެ ކަމަށްވެސް ޒާރިފް ވިދާޅުވިއެވެ.

ޒާރިފް އިތުރަށް ވިދާޅުވީ، ހަމަލާތަކުގެ ޒިންމާ ނަގައިފައިވާ ޔަމަނުގެ ހޫތީ ޖަމާއަތުން ސައުދީއަށް ހަމަލާދޭނެ ސަަބަބުތައް އެބަހުރި ކަމުގައެވެ. އަދި ޔަމަނަށް ސައުދީގެ ވައިގެ އަސްކަރިއްޔާއިން ދިން ހަމަލާތަކަށް ފަހު އެ ޖަމާއަތުން ބަދަލު ހިފަން ބޭނުންވާނެ ކަމަށް ވެސް ޒާރިފް ވަނީ ފާހަގަކުރައްވާފައެވެ.

ސެޕްޓެމްބަރު 14 ވަނަ ދުވަހު ދިން ހަމާލާއާއި ގުޅޭގޮތުން އެމެރިކާގެ ނިޔުޔޯކްގައި ކުރިއަށްދާ 74 ވަނަ އދ ގެ އާންމު މަޖިލީހަށް ވަޑައިގެން އުޅުއްވާ ގައުމުތަކުގެ ލީޑަރުން ދަނީ މަޝްވަރާކުރައްވަމުންނެވެ. ސައުދީން ދަނީ ހަމަލާ ހިނގާދިޔަ ގޮތް ބައިނަލްއަގްވާމީ އިންވެސްޓިގޭޝަން ޓީމެއް މެދުވެރިކޮށް ބަލަމުންނެވެ.