ގެއްލުންލިބުން އާއިލާތަކަށް އައިޑީކާޑު ހަދައިދިނުމުގެ މަސައްކަތް ދަނީ ކުރެވެމުން: ޑިޒާސްޓަރ
22 ސެޕްޓެމްބަރު 2019 | އާދީއްތަ 15:18ނެޝަނަލް ރެޖިސްޓްރޭޝަނާއި ގުޅިގެން، އައިޑީ ކާޑު ހައްދައިދިނުމުގެ މަސައްކަތް އަންނަނީ ކުރެވެމުން
ކެމިކަލް ގުދަނުގައި ހިނގި އަލިފާނުގެ ހާދިސާ
ހުކުރު ދުވަހުގެ ރޭ ހިނގި ބޮޑު އަލިފާނުގެ ހާދިސާއާއި ގުޅިގެން ނެޝަނަލް އައިޑެންޓިފިކޭޝަން ކާޑު (އައިޑީކާޑު) ގެއްލުނު ފަރާތްތަކަށް އައިޑީކާޑު ހައްދައިދިނުމުގެ މަސައްކަތް ކުރެވެމުންދާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އާދިއްތަ ދުވަހު ރައީސް އޮފީހުގައި ބޭއްވި ޖޮއިންޓް ނޫސްވެރިންގެ ބައްދަލުވުމެއްގައި އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ، އެ ހާދިސާގައި ގިނަ ބައެއްގެ މުހިންމު ތަކެތި ގެއްލިފައިވާ ކަމަށާއި އޭގެ ތެރޭގައި ހިމެނޭ އެންމެ މުހިއްމު އެއް ޑޮކިއުމެންޓަކީ އައިޑީ ކާޑު ކަމަށާއި، އެހެންކަމުން، ނެޝަނަލް ރެޖިސްޓްރޭޝަނާއި ގުޅިގެން، އެ ފަރާތްތަކަށް އައިޑީ ކާޑު ހައްދައިދިނުމުގެ މަސައްކަތް ކުރެވެމުން އަންނަ ކަމަށެވެ.
ހާލުގައި ޖެހިފައިވާ ފަރާތްތަކުގެ އެންމެ ފަހުގެ އަޕްޑޭޓް ލިސްޓުން މިހާރު ނެޝަނަލް ރެޖިސްޓްރޭޝަނަށް ހުށަހަޅާފަ ވާނެ ކަމަށާއި ހޯމަ ދުވަހު އެތަނުގައި މިކަމަށްޓަކާ ހާއްސަ ސެޓްއަޕެއް ހަމަޖައްސާ، ހިދުމަތް ބޭނުންވާ ފަރާތްތަކަށް ހިދުމަތް ފޯރުކޮށްދެވޭނެ ކަމަށް ހިސާން ވިދާޅުވިއެވެ.
ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން ދަރުބާރުގޭ ދޮށިމޭނާ މާލަން ހިފައި މިހާރުވެސް 7 ދުވަހަށް، ރިލީފް އައިޓަމްސް ބެހުމުގެ މަސައްކަތް ކުރަމުންދާކަމަށް ހިސާން ވިދާޅުވިއެވެ.
މި ހާދިސާގައި ހާލުގައި ޖެހުނު ފަރާތްތަކަށް ސަރުކާރުގެ އިދާރާތަކާއި އަމިއްލަ ފަރާތްތަކުންވެސް ގިނަ އެހީތަށް ވަމުންދާކަން ފާހަގަކޮށްލެވެއެވެ.
