ތިން އަހަރަށް ފަހު އަނެއްކާވެސް ކަޅުވަކަރު މިސްކިތް މާލެއަށް
މިސްކިތް ބެހެއްޓުމުގެ މަސައްކަތް ފައްޓަވައިދެއްވީ ރައީސް އިބްރާހިމް މުހައްމަދު ސޯލިހު
ކަޅުވަކަރު މިސްކިތުގެ ބައިތަކަށް ފަރުވާދިނުމަށް ކުރެވުނު މަސައްކަތުގެ ތެރެއިން
ސަލްޓަން ޕާކުގެ އިރު ދެކުނު ކަނުގައި ބެހެއްޓިފައި ހުއްޓާ ރޫޅާލައިގެން ގެންދިޔަ ކަޅުވަކަރު މިސްކިތް އަލުން މާލޭގައި ބެހެއްޓުމުގެ މަސައްކަތް ފަށައިފިއެވެ.
ބުރާސްފަތި ދުވަހު އޮތް ރަސްމިއްޔާތެއްގައި މި މަސައްކަތް ފައްޓަވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ. މި ރަސްމިއްޔާތުގައި ރައީސްގެ އިތުރުން، ދައުލަތުގެ ބައެއް ވަޒީރުންނާއި މާލޭގެ ދާއިރާތަކަށް ނިސްބަތްވާ ރައްޔިތުންގެ މަޖިލީހުގެ މެމްބަރުންގެ އިތުރުން ރައީސް މައުމޫން ސަރުކާރުގެ ބައެއް އިސް ބޭފުޅުން ވެސް ބައިވެރިވަޑައިގެންނެވިއެވެ.
ކަޅުވަކަަރު މިސްކިތަކީ ދިވެހިންގެ ގަލުވަޑާމާއި ލާފެންކުރުމުގެ ފަންނުވެރިކަން ވަރަށް ފުރިހަމައަށް ދައްކުވައިދޭ މިސްކިތެކެވެ. މި މިސްކިތުގައި ހިރިގަލާއި ކަޅުވަކަރުގެ ކުރެހުންތައް ކަނޑާނެގިފައިވާއިރު، މިސްކިތުގެ އެތެރޭގެ ބައިތައްވެސް ހުންނަނީ ލާފެންކުރެވިފައެވެ. މި މިސްކިތަށް ކަޅުވަކަރު މިސްކިތޭ ކިޔުނީ މިސްކިތުގެ އެތެރޭގެ ވަޑާމަށް ކަޅުވަކަރު ބޭނުންކޮށްފައި ހުރުމުންނެވެ. ބުނެވޭ ގޮތުގައި މި ކަޅުވަކަރަކީ ގިޔާސުއްދީން ރަދުންގެ ގަނޑުވަރުގައި ބޭނުންކޮށްފައި ހުރި ކަޅު ވަކަރެވެ.
ރައީސް ޔާމީންގެ ސަރުކާރުގައި މި މިސްކިތް ރޫޅާލައިގެން ގެންދިޔައީ 2016 ވަނަ އަހަރުގެ އޮގަސްޓް މަހުގެ ތެރޭގައެވެ. އެއަށް ފަހު މި މިސްކިތް އެއްވެސް ތަނެއްގައި އާންމުންނަށް ފެންނާނެހެން ބަހައްޓާފައެއް ނުވެއެވެ. އަދި އެ މިސްކިތް ގދ.ތިނަދޫގައި ބަހައްޓަން އުޅޭކަމުގެ ވާހަކަތަކަކާއި ހުޅުމާލޭ ފޭސް ދޭއްގައި ބަހައްޓަން އުޅޭކަމުގެ ވާހަކަތަކެއްވެސް އަޑު އިވިގެން ދިޔައެވެ.
ކަޅުވަކަރު މިސްކިތް އަލުން ރާވާ ނިމޭއިރު، މިސްކިތުގެ ވަށައިގެން ހިމެނޭ ސަރަހައްދު ޕާކެއްގެ ގޮތުގައި ތަރައްގީ ކުރެވޭނެއެވެ. އަދި މި ޕާކުގައި ގައުމީ ދާރުލްއާސާރުގެ އައުޓްޑޯ އެގްޒިބިޝަން އޭރިއާއެއްވެސް ހިމެނޭނެއެވެ. އަންނަ ނޮވެމްބަރު މަހުގެ ތެރޭގައި މި މިސްކިތް ރާވައި ހުޅުވަން އުއްމީދުކުރާ ކަމަށް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން ވަނީ މައުލޫމާތު ދީފައެވެ.
