މުޅި ރާއްޖެއަށް ބަހާލައިގެން އިިތުރު 15000 ހައުސިން ޔުނިޓް އިމާރަތްކުރަނީ
17 ސެޕްޓެމްބަރު 2019 | އަންގާރަ 22:23މި ހައުސިންގ ޔުނިޓްތައް ބަހަލާފައިވާނީ އަބާދީގެ ނިސްބަތުން
އަތޮޅުތެރޭގައި އިމާރަތްކޮށްފައިވާ ހައުސިންގ ޔުނިޓްތަކެއް
ސަރުކާރުން ފްރޭމްވޯކް އެގްރީމެންޓުގައި ސޮއިކޮށް، އަމަލީ މަސައްކަތް ފެށުމަށް ތައްޔާރުވެފައިވާ 9200 ހައުސިން ޔުނިޓްގެ އިތުރުން މުޅި ރާއްޖެއަށް ބަހާލައިގެން އިތުރު 15000 ހައުސިން ޔުނިޓްގެ މަސައްކަތް ފެށުމަށް ނިންމާފައިވާކަމަށް ހައުސިން މިނިސްޓްރީން ހާމަކޮށްފި އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައިި ވާހަކަދައްކަވަމުން ހައުސިންގ މިނިސްޓްރީގެ ޑެޕިއުޓީ މިނިސްޓަރ އަލީ ޝާމިން ވިދާޅުވީ އަމާޒަކީ 20،000 ހައުސިންގ ޔުނިޓް އެންމެ މަދުވެގެން ރައްޔިތުންނަށް ފޯރުކޮށްދިނުން ކަމަށެވެ. އަދި މަސައްކަތްކުރަނީ ވިހާވެސް ގިނަ ހައުސިންގ ޔުނިޓްތަކާއެކު ރައްޔިތުންނަށް ކުރިމަތިވެފައިވާ ބޯހިޔާވެހިކަމުގެ މައްސަލައަށް ހައްލެއް ހޯދައިދިނުމަށްކަމަށް އޭނާ ވިދާޅުވި އެވެ. އެގޮތުން ފްރޭމްވޯކް އެގްރީމެންޓުގައި ސޮއިކޮށްފައިވާ 9200 ހައުސިން ޔުނިޓަކީ މާލެ ސަރަހައްދުގައިި އިމާރަތްކުރާ 4200 ޔުނިޓާއި، ދެކުނުގެ އަތޮޅުތަކުގައި އިމާރަތްކުރާ 5000 ހައުސިން ޔުނިޓްކަމަށް ޝާމިން ވިދާޅުވި އެވެ.
އޭނާ ވިދާޅުވީ އެ 5000 ހައުސިން ޔުނިޓްްގެ އިތުރުން 15000 ހައުސިން ޔުނިޓް މުޅި ރާއްޖެއަށް ބަހާލައިގެން ކުރިއަށްގެންދިއުމަށް ނިންމާފައިވާކަމަށެވެ. އެގޮތުން އަތޮޅުތަކަށް ހައުސިން ޔުނިޓްތައް ބާހާލައިފައިވާނީ އާބާދީގެ ނިސްބަތަށް ބެލުމަށްފަހުގައިކަމަށް ޝާމިން ވިދާޅުވި އެވެ.
އެއީ ހއ. އަތޮޅަށް 1500 ހައުސިން ޔުނިޓާއި، ހދ. އަތޮޅަށް 1500 ހައުސިން ޔުނިޓާއި، ރ. އަތޮޅަށް 1500 ހައުސިން ޔުނިޓާއި، އަދި ށ. އަތޮޅަށް 1000 ހައުސިން ޔުނިޓްގެ އިތުރުން ނ. އަތޮޅާއި ބ، ކ، އދ އަތޮޅަށް 1000 ހައުސިން ޔުނިޓް އެވެ. އޭގެއިތުރުން ޅ. އަތޮޅަށް 850 ހައުސިން ޔުނިޓާއި، އއ. އަށާއި ދ. އަތޮޅަށް 900 ހައުސިން ޔުނިޓާއި، މ. އަތޮޅަށާއި ފ. އަތޮޅަށް 800 އަދި ވ. އަތޮޅަށް 250 ހައުސިން ޔުނިޓް އިމާރަތްކުރުމަށް ހަމަޖެހިފައިވާކަމަށް ޝާމިން ވިދާޅުވި އެވެ.
ޝާމިން ވިދާޅުވީ މިކަން ނިންމާފައިވަނީ ވަކި އުސޫލުތަކެއްގެ މަތިން ކަމަށާއި ސެޕްޓެމްބަރު މަހުގެ 11 ވަނަ ދުވަހު އެ އުސޫލު ދިވެހި ސަރުކާރުގެ ގެޒެޓުގައި ހިމެނިފައިވާނެ ކަމަށެވެ. އަދި ރަށްތައް ކަނޑައަޅަނީ އަތޮޅު ފެންވަރުގައި މަޝްވަރާކުރުމަށްފަހުގައިކަމަށް ޝާމިން ވިދާޅުވި އެވެ.
ޝާމިން ވިދާޅުވީ މިހާރު ސޮއިކުރެވިފައިވާ 9200 ހައުސިންގ ޔުނިޓްގެ ފްރޭމްވޯކް އެގްރިމެންޓުގެ 6 މަސް ދުވަސް ނިމި، ނޮވެމްބަރު މަހުގެ ތެރޭގައި އަމަލީ މަސައްކަތް ފެށިގެންދާނެކަމަށެވެ. އަދި މިއަހަރު މިހާރުވެސް އިތުރު ޕްރޮޖެކެޓްތަކުގައި މަސައްކަތްތައް ކުރިއަށްދާއިރު، އޭގެތެރޭގައި ހުޅުމާލޭގައި ވިޔަފާރި އުސޫލުން 4000 އެއްހާ ހައުސިންގ ޔުނިޓް އިމާރަތްކުރެވެމުންދާކަމަށް ޝާމިން ވިދާޅުވި އެވެ. އަދި އަމާޒަކީ ވެރިކަމުގެ ދައުރުގެ މެދަކަށްދާއިރު، ބޮޑު ބަޔެއް ނިންމާލާ ހައްޤުވެރިންނަށް ހައުސިން ޔުނިޓްތައް ދޫކޮށްލުންކަމަށް ޝާމިން ވިދާޅުވި އެވެ.
ރައީސް އިބްރާހިމް މުހައްމަދު ސޯލިހް ވަނީ މުޅި ރާއްޖެއަށް ދިމާވެފައިވާ ބޯހިޔާވެެހިކަމުގެ މައްސަލަ ހައްލުކޮށްދެއްވާނެކަމަށް ވައުދުވެވަޑައިގެންފަ އެވެ. އަދި އެއީ އެމަނިކުފާނުގެ ސަރުކާރުގެެ އެންމެ މުހިންމު އެއް އަމާޒުގެ ގޮތުގައި ވަނީ ހަމަޖައްސަވާފަ އެވެ.
