އެފްއައިވީބީގެ އެންގުމަށް އިހުތިރާމް ކުރުން މުހިންމު: ލަތީބެ

ވޮލީގެ މައި އިދާރާ އިންޓަރ ނޭޝަނަލް ވޮލީބޯލް ފެޑެރޭޝަން (އެފްއައިވީބީ) ގެ އެންގުމަށް އިހުތިރާމް ކުރުން މުހިންމު ކަމަށް ވޮލީބޯލް އެސޯސިއޭޝަންގެ ރައީސް މުހައްމަދު ލަތީފް (ލަތީބެ) ވިދާޅުވެއްޖެއެވެ.

ލަތީބެ ސޮއިކުރައްވާ ނެރެފައިވާ ނޫސް ބަޔާނެއްގައި ވިދާޅުވީ، ވޮލީބޯލް އެސޯސިއޭޝަން އޮފް މޯލްޑިވްސް ގެ އިންތިހާބީ ހިންގާކޮމިޓީގެ ބާރު ކަނޑުވާލައި، އެ އެސޯސިއޭޝަނުގެ ހިންގުން، ނޯމަލައިޒޭޝަން ކޮމިޓީއަކާ، ކޮމިޝަނަރ އޮފް ސްޕޯޓްސް ޙަވާލުކޮށްފައިވަނީ، ވޮލީބޯޅައިގެ މައި އިދާރާކަމުގައިވާ އެފްއައިވީބީގެ އާއްމު އުސޫލްތަކާ އޮލިމްޕިކް ޗާޓަރާ ހިލާފަށްކަމަށާއި، އެފްއައިވީބީގެ ފަރާތުން 4 ސެޕްޓެމްބަރ 2019 ވަނަ ދުވަހު، ކޮމިޝަނަރ އޮފް ސްޕޯޓްސްގެ ފަރާތުން އައްޔަންކުރައްވާފައިވާ ނޯމަލައިޒޭޝަން ކޮމިޓީގެ ރައީސް އަލްފާޟިލް ޢަބުދުﷲ އާމިރަށް ފޮނުވި ސިޓީގައި އެކަން ބަޔާންކޮށްފައިވާ ކަމަށެވެ.

އެގޮތުން ސަރުކާރުގެ ކަމާބެހޭފަރާތުން އެންމެފަހުން ރަޖިސްޓްރީ ކޮށްދީފައިވާ ވޮލީބޯލް އެސޯސިއޭޝަން އޮފް މޯލްޑިވްސްގެ އިންތިޚާބީ ހިންގާ ކޮމިޓީކަމާއި، ކޮމިޝަނަރ އޮފް ސްޕޯޓްސްގެ ފަރާތުން އައްޔަންކުރައްވާފައިވާ ނޯމަލައިޒޭޝަން ކޮމިޓީއަކީ، ވޮލީބޯޅައާއި ބީޗް ވޮލީ އާއި ގުޅޭގޮތުން އެއްވެސް ކަމެއް ކުރުމުގެ ހައިސިއްޔަތެއް އޮތް ފަރާތެއް ނޫންކަމާއި، އަދި ނޯމަލައިޒޭޝަން ކޮމިޓީއަކީ ވޮލީބޯލް އެސޯސިއޭޝަން އޮފް މޯލްޑިވްސްގެ ނަމުގައި އެއްވެސް މުއާމަލާތެއް އަދި އެއްވެސް ޙަރަކާތެއް ހިންގުމުގެ ހައިސިއްޔަތެއް އޮތް ފަރާތެއް ނޫންކަމަށް އެފްއައިވީބީގެ ސިޓީގައި ބަޔާންކޮށްފައިވާ ކަމަށް ލަތީބެ ވިދާޅުވިއެވެ.

މީގެއިތުރުން ލަތީބެ ވިދާޅުވީ، ނޯމަލައިޒޭޝަން ކޮމިޓީގެ ފަރާތުން މިހާރު ހިންގާ ހުރިހާ ޙަރަކާތެއް ވަގުތުން ހުއްޓާލުމަށާއި، ވޮލީބޯލް އެސޯސިއޭޝަން އޮފް މޯލްޑިވްސްގެ ހިންގުން، އިންތިޚާބީ ހިންގާ ކޮމިޓީއާއި ޙަވާލުކުރުމަށްވެސް އެ ސިޓީގައި ބަޔާން ކޮށްފައިވާ ކަމަށެވެ.

ލަތީބެ ވިދާޅުވީ، 4 ސެޕްޓެމްބަރ 2019 ދުވަހުން ފެށިގެން، ވޮލީބޯލް އެސޯސިއޭޝަން އޮފް މޯލްޑިވްސްގެ ނަމުގައި، ނޯމަލައިޒޭޝަން ކޮމިޓީން ހިންގާ އެއްވެސް ޙަރަކާތަކީ، އެފްއައިވީބީ އާއި އެ ޖަމިއްޔާ އާއި ގުޅިފައިވާ އެއްވެސް ފަރާތަކުން ބަލައިގަންނާނެ ހަރަކާތެއް ނޫން ކަމަށާއި، އަދި ނޯމަލައިޒޭޝަން ކޮމިޓީއިން ހިންގާ އެއްވެސް ހަރަކާތަކީ ވޮލީބޯލް އެސޯސިއޭޝަން އޮފް މޯލްޑިވްސްގެ ރަސްމީ ހައިސިއްޔަތު ލިބިދެވޭނެ ހަރަކާތްތަކެއް ނޫންކަން، ވޮލީބޯޅަ އާއި ބީޗްވޮލީބޯޅައަށް ޝައުގުވެރިކަންދެއްވާ އެންމެހާ ފަރާތްތަކުގެ މައުލޫމާތަށްޓަކައި ދަންނަވާ ކަމަށެވެ.

އެފްއައިވީބީގެ ސިޓީގައި ބަޔާންކުރައްވާފައިވާގޮތަށް، ވޮލީބޯލް އެސޯސިއޭޝަން އޮފް މޯލްޑިވްސްގެ ހިންގުން، އިންތިޚާބީ ހިންގާކޮމިޓީއާއި ޙަވާލުކޮށްދެއްވުމަށް، މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އޮނަރަބްލް އަޙްމަދު މަޙްލޫފުގެ އަރިހުގައި 2019 ސެޕްޓެމްބަރ 8 ވަނަ ދުވަހު ސިޓީއަކުން ވަނީ ދަންނަވާފައި ކަމަށްވެސް ލަތީބެ ވަނީ ވިދާޅުވެފައެވެ.

އެފްއައިވީބީން ފޮނުއްވާފައިވާ ސިޓީގައި، އެ އިދާރާގެ އެންގެވުމާ އެއްގޮތަށް ޢަމަލު ނުކުރައްވާނަމަ، ފިޔަވަޅު އަޅަން ޖެހިދާނެކަމާއި، ވޮލީބޯޅަ އާއި ގުޅުންހުރި ފަރާތްތަކުން ވާހަކަ ދައްކައިގެން ޙައްލު ހޯދުމަށްވެސް ވަނީ ބަޔާންކޮށްފައެވެ.