އައްޑޫ ހައި ސްކޫލްގެ މަލްޓިޕާރޕަސް ހޯލް 2 ބުރި އިމާރާތަކަށް ބަދަލު ކުރަނީ
މި މަޝްރޫއުއަކީ ޕީއެސްއައިޕީގެ ދަށުން ކުރިއަށް ގެންދެވޭ މަޝްރޫއެއް ކަމަށް
ރަސްމިއްޔާތުގެ ތެރެއިން
ސ. ހިތަދޫ, އައްޑޫ ހައި ސްކޫލްގައި ޢިމާރާތްކުރަން ހަމަޖެހިފައިވާ މަލްޓިޕާރޕަސް ހޯލްގެ ދެ ބުރި އިމާރާތުގެ މަސައްކަތް ހަވާލުކުރުމުގެ އެއްބަސްވުމުގައި އާދީއްތަ ދުވަހު ސޮއި ކޮށްފިއެވެ.
އާދީއްތަ ދުވަހު ބޭއްވި ސޮއި ކުރުމުގެ ރަސްމިއްޔާތުގައި މިނިސްޓްރީގެ ފަރާތުން ސޮއި ކުރެއްވީ ފައިނޭންސް އެގްޒެކެޓިވް ނައުޝާދު މުޙައްމަދެވެ. އިނޯކާ ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ ހަސަން ޝަމީމެވެ.
މި މަސައްކަތް އިނޯކާ ޕްރައިވެޓް ލިމިޓެޑްއާއި ހަވާލުކުރެވިފައިވާއިރު މި މަޝްރޫއުއަކީ 7،844،929.89 (ހަތް މިލިއަން އަށްސަތޭކަ ސާޅީސް ހަތަރު ހާސް ނުވަ ސަތޭކަ ނަވާވީސް ރުފިޔާ އަށްޑިހަ ނުވަ ލާރި )ގެ މަޝްރޫއެކެވެ.
އެޑިއުކޭޝަން މިނިސްޓްރީގެ ފަރާތުން ފައިނޭންސް އެގްޒެކެޓިވް ނައުޝާދު މުޙައްމަދު މައުލޫމާތު ދެއްވަމުން ވިދާޅުވީ މި މަޝްރޫއުއަކީ ޕީއެސްއައިޕީގެ ދަށުން ކުރިއަށް ގެންދެވޭ މަޝްރޫއެއް ކަމަށެވެ. އަދި މި އިމާރާތުގެ މަސައްކަތް 210 ދުވަހުގެ ތެރޭގައި ނިމޭނެ ކަމަށް ވެސް ނައުޝާދު މުޙައްމަދު ވިދާޅުވިއެވެ. މިނިސްޓްރީއިން ބުނީ 2020 ވަނަ އަހަރުގެ ސެޕްޓެމްބަރ މަހުގެ ކުރީކޮޅު އިމާރާތުގެ މަސައްކަތް މުޅިން ނިމި ބޭނުންކުރަން ފެށޭނެ ކަމަށް އުއްމީދު ކުރާ ކަމަށެވެ.
