ސައުދީގެ ތެޔޮ ކުންފުނިތަކަށް ދިން ޑްރޯން ހަމަލާ ރާއްޖޭގެ ސަރުކާރުން ކުށްވެރި ކޮށްފި

ސައުދީ އަރަބިއްޔާގެ ތެޔޮ އުފައްދާ މައި ތެޔޮ ކުންފުނި, އަރަމްކޯގެ ދެ ފެސިލިޓީއަކަށް ޑްރޯންގެ ހަމަލާއެއް ދިނުމާއި ގުޅިގެން ދިވެހިރާއްޖެއިން އެކަން ކުށްވެރިކޮށްފިއެވެ.

ސައުދީ އަރަބިއްޔާގެ ތެޔޮ ކުންފުނި ކަމަށްވާ އަރާމްކޯ އިން އެ ޤައުމުގެ އަބްގައިގް އާއި ޚުރައިސްގައި ހިންގާ ތެޔޮ ޕްލާންޓަށް ހޮނިހިރު ދުވަހު ދިން ޑްރޯން ހަމަލާތަކާއި ގުޅިގެން ފޮރިން މިނިސްޓްރީން ނެރުނު ބަޔާނެއްގައި ބުނީ، މި ހަމަލާތައް ހަރުކަށި އިބާރާތުން ކުށްވެރި ކުރާ ކަމަށާއި، މިފަދަ ހަމަލާތަކުގެ ސަބަބުން އާންމުންގެ އެތައް ބައެއްގެ ފުރާނައަށް ނުރައްކާވެ، ޤައުމުތަކުގައި އޮންނަ ސަލާމަތާއި ހަމަޖެހުން ނެތިގެންދާ ކަމަށެވެ. އަދި މިއީ އެ ސަރަހައްދުގެ މަޝްރަހު އިތުރަށް ގޯސްވެގެން ހިނގައިދާނެ ކަމެއް ކަމަށްވެސް ބަޔާނުގައި ބުނެފައިވެއެވެ.

އޭގެ އިތުރުން، ޓެރަރިޒަމްގެ މިފަދަ އަމަލުތަކުގެ ސަބަބުން ސަރަހައްދުތަކުގައި އަމާންކަން ޤާއިމު ކުރުމަށް ބައިނަލްއަޤުވާމީ މުޖުތަމައުން ކުރާ މަސައްކަތްތަކަށް ބުރޫއަރާ ކަމަށާއި، ޓެރަރިޒަމާއި ދެކޮޅަށް ކުރާ މަސައްކަތްތަކުގައި ސައޫދީގެ ސަރުކާރާއި ރައްޔިތުންނާއި އެކުގައި ރާއްޖެ ދެމި އޮންނާނެ ކަމުގެ ޔަޤީންކަން ދޭކަމަށް ވެސް ބަޔާނުގައި ބުނެފައިވެއެވެ.

ދެ ތަނުގައި ވެސް ރޯވެފައިވާ އަލިފާން މިހާރު ކޮންޓްރޯ ލްކޮށްފައިވާ ކަމަށް ސައުދީ އަރަބިއްޔާގެ ރަސްމީ މީޑިއާ އިން ބުނެފައިވާއިރު، މި ހަމަލާގެ ސަބަބުން ސައޫދީގެ ތެލުގެ އުފެއްދުންތެރިކަން ވަރަށް ބޮޑަށް ދަށަށް ދާނެ ކަމަށާއި، އޭގެ ސަބަބުން ދުނިޔޭގެ ތެލުގެ ވިޔަފާރީގެ ބާޒާރަށް ވެސް އަސަރު ކުރާނެ ކަމަށް ރިޕޯޓްތައް ބުނެއެވެ.