ރާއްޖޭގެ މަސައްކަތްތެރިންގެ ފެޑަރޭޝަނެއް އުފައްދައިފި
މި ފެޑެރޭޝަންގައި ހުރިހާ މަސައްކަތްތެރިންގެ ޖަމިއްޔާތަކުން ބައިވެރިވޭ
ޓީމްގެ މައުރޫފް ޒާކިރު
ރާއްޖޭގައި ހަރަކާތްތެރިވާ މަސައްކަތްތެރިންގެ ޖަމިއްޔާތައް ބައިވެރިވެގެން މަސައްކަތްތެރިންގެ ފެޑެރޭޝަންއެއް އުފައްދައިފިއެވެ.
މޯލްޑިވްސް ޓްރޭޑު ޔޫނިއަން ކޮންގްރެސް (އެމްޓީޔޫސީ) ގެ ނަމުގައި އުފައްދާފައިވާ ފެޑެރޭޝަން އިފްތިތާޙްކޮށްފައިވަނީ މިއަދު ހުޅުމާލެ ސަމަން ހޮސްޓުގައި ބޭއްވި ޙާއްސަ ހަފްލާއެއްގައެވެ.
މި ފެޑެރޭޝަން އިފްތިތާޙްކުރުމަށްފަހު މި ފެޑެރޭޝަނުން ކުރުމަށް ރާވާފައިވާ މަސައްކަތްތަކާއި ގުޅޭގޮތުން ނޫސްވެރިންނަށް މައުލޫމާތުދެމުން ޓޫރިޒަމް އެމްޕްލޯއީސް އެސޯސިއޭޝަން (ޓީމް)ގެ ޖެނެރަލް ސެކްރެޓަރީ މައުރޫފް ޒާކިރު ވިދާޅުވީ، މި ފެޑެރޭޝަނުން ރާއްޖޭގެ މަސައްކަތްތެރިންނަށް ދިމާވާ މައްސަލަތައް ހައްލުކުރުމުގައި މަސައްކަތްކުރާނެ ކަމަށެވެ.
މިހާރު ރާއްޖޭގައި ހަރަކާތްތެރިވާ މަސައްކަތްތެރިންގެ ހުރިހާ ޖަމިއްޔާތަކެއް ބައިވެރިވާކަމަށް އެމްޓީޔޫސީން މައުލޫމާތުދެއެެވެ. އެމް.ޓީ.ޔޫ.ސީގެ ހިންގާ ކޮމެޓީގެ ރައީސަކީ ޓީމްގެ ސެކްރެޓަރީ މައުރޫފް ޒާކިރެވެ. ނައިބް ރައީސަކީ ޕޯޓް ވޯކަރސްގެ އައިޝަތު ރުޚުސާނާއެވެ. ހަޒާންދާރަކީ ޓީމްގެ އަލީ ނާޒިމެވެ. އެމްޓީޔޫސީގެ ޖެނެލަރަލް ސެކްރެޓަރީއަކީ ހެލްތުވޯރކާސްގެ ފާޠިމަތު ޒިމްނާއެވެ.
