ދައްކާ ބިރަކަށް ފަހަތަކަށް ނުޖެހޭނަން: ހަނަފީ
ބިދޭސީންގެ މައްސަލައަށް ހައްލެއް ހޯދާނީ މި ވެރިކަމުގައި
އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ)
ދައްކާ ބިރަކަށް ފަހަތަށް ނުޖެހޭނެ ކަމަށް އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ) ވިދާޅުވެއްޖެއެވެ.
ހުކުރު ދުވަހުގެ ރޭ ހަނަފީ ކުރެއްވި ޓުވީޓެއްގައި ވިދާޅުވީ ނުފޫޒުން އެއްކިބާވެ އިމިގްރޭޝަންގެ ޤާނޫނުން ފުރިހަމަ އަށް ތަންފީޒު ކުރައްވާނެ ކަމަށާއި ބިދޭސީންގެ މައްސަލައަށް ހައްލެއް ހޯދާނީ ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހުގެ ވެރިކަމުގައި ކަމަށެވެ. އަދި އަބަދު ވެސް ދެމި ތިބޭނީ ރައްޔިތުންގެ ހިދުމަތުގައި ކަމަށް ހަނަފީ ވިދާޅުވިއެވެ.
ދާދި ފަހުން އިމިގްރޭޝަންގެ ފަރާތުން ވަނީ ގަވައިދާ ހިލާފަށް ބިދޭސިން ރެކްރޫޓް ކުރިކަމުގެ ތުހުމަތުގައި އާއި ރާއްޖޭގައި ހުރުމަށް ދޫކޮށްފައިވާ ހުއްދައިގެ ޝަރުތުތަކާއި ޚިލާފުވުމުން ދެ ބިދޭސީ މީހުން ޑީޕޯޓްކޮށްފައެވެ.
ދެ ބިދޭސީން ޑީޕޯޓްކޮށްފައިވާއިރު ހަނަފީ މީގެ ކުރިން ވިދާޅުވެފައިވަނީ ރާއްޖޭގައި އުޅޭ ބިދޭސީންގެ އަދަދު ކޮންޓްރޯލް ވާން ޖެހޭ ކަމަށާއި ރާއްޖޭގައި ދިރިއުޅޭ ބިދޭސީންގެ އަދަދު ގިނަވުމުގެ މައްސަލަ ހައްލު ކުރެވޭނީ ގައުމީ ނިސްބަތުން ވޯކް ވިސާ ދޭނެ އަދަދު ކަނޑައަޅައިގެން ކަމަށެވެ.
ރާއްޖޭގައި 1،44,607 ބިދޭސީން އުޅެއެވެ. އޭގެތެރޭގައި ގަވައިދާ ޚިލާފަށް އުޅޭ 63،000 ބިދޭސީން ރާއްޖޭގައި މިވަގުތު ތިބި ކަމަށް އިމިގްރޭޝަންގެ ތަފާސް ހިސާބުތަކުން ދައްކައެވެ.
