ގަވައިދާ ހިލާފަށް ބިދޭސިން ރިކްރޫޓް ކުރާކަމުގެ ތުހުމަތުގައި ބިދޭސީއަކު ޑީޕޯޓް ކޮށްފި
13 ސެޕްޓެމްބަރު 2019 | ހުކުރު 09:03ޑީޕޯޓް ކުރެވުނު މީހާއަށް ގަވައިދާ ހިލާފަށް ބިދޭސިން ރިކްރޫޓް ކުރާކަމުގެ ތުހުމަތު ކުރެވޭ
ޑީޕޯޓް ކޮށްފައިވަނީ 49 އަހަރުގެ ބަންގްލަދޭށް ފިރިހެނެއް ކަމަށްވާ އެމްޑީ ޝަފީގުލް އިސްލާމް
މޯލްޑިވްސް އިމިގްރޭޝަން އާއި މޯލްޑިވްސް ޕޮލިސް ސަރވިސް ގުޅިގެން ކުރިއަށް ގެންދާ އޮފަރޭޝަނެއްގެ ދަށުން ގަވައިދާ ހިލާފަށް ބިދޭސިން ރިކްރޫޓް ކުރާކަމުގެ ތުހުމަތުގައި ބިދޭސީއަކު ޑީޕޯޓް ކޮށްފި އެވެ.
ބުރާސްފަތި ދުވަހު ކުރިއަށް ގެންދިޔަ މި ޖޮއިންޓް އޮޕަރޭޝަންގެ ދަށުން ޑީޕޯޓް ކޮށްފައިވަނީ 49 އަހަރުގެ ބަންގްލަދޭށް ފިރިހެނެއް ކަމަށްވާ އެމްޑީ ޝަފީގުލް އިސްލާމް އެވެ. މި މީހާ އަކީ ގަވާއިދާ ހިލާފަށް ފުޅާ ދާއިރާއެއްގައި ވިޔަފާރި ކުރާމީހެއް ކަމުގައިވެސް އިމިގްރޭޝަން އިން ބުނެއެވެ.
މިކަމާ ގުޅިގެން ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު އަހްމަދު ހުސައިން ވިދާޅުވީ، މި އޮޕަރޭޝަނަކީ ގަވައިދާ ހިލާފަށް ރާއްޖޭގައި އުޅެމުންދާ ބިދޭސީން މަދުކުރުމަށް ކުރަމުންދާ މަސައްކަތުގެ ތެރެއިން ހިންގުނު ހާއްސަ އޮޕަރޭޝަނެއް ކަމުގައެވެ. އަދި އިމިގްރޭޝަންގެ މަގުސަދަކީ ގަވައިދާ ހިލާފުވުމަށް މެދުވެރިވާ ސަބަބުތައް ހޯދާ، އެ ސަބަބުތައް މަދުކޮށް ނަތީޖާއަކަށް ވާސިލްވުން ކަމުގައި މުހައްމަދު ވިދާޅުވިއެވެ.
މުހައްމަދު އިތުރަށް ވިދާޅުވީ، ޑީޕޯޓް ކޮށްލެވުނު މި މީހާ އަކީ ގިނަ އަދަދެއްގެ ބިދޭސީން ތަކެއް ގަވައިދާ ހިލާފުވުމަށް މެދުވެރިވި ސަބަބެއް ކަމުގައެވެ.
މިހާރުވެސް ރާއްޖޭގައި ލައްކަ އަކަށް ވުރެ ގިނަ ބިދޭސީން އުޅޭކަމަށް އިމިގްރޭޝަންގެ ތަފާސް ހިސާބުތަށް ދައްކާއިރު، އޭގެތެރެއިން 63،000 އަށް ވުރެ ގިނަ ބިދޭސީންނަކީ ގަވައިދާ ޚިލާފަށް އުޅޭ ބިދޭސީންނެވެ.
