ޕެގީ، ރާއްޖޭގެ ކަނޑު ހުރަސްކޮށް ބޭ އޮފް ބެންގާލަށް
13 ސެޕްޓެމްބަރު 2019 | ހުކުރު 04:34ޕެގީ އަކީ އޭތީގެ ވާތު އުރަފަތް ހަލާކުވެގެން އަޑިއަށް ނުފީނޭ ހާލަތަށް ބަލިވެފައި އޮތް ވެލައެއް
އަނިޔާތަކަކާއެކު ފެނުނު ވެލާގެ ނަމަކީ ޕެގީ
ގިނަ އަނިޔާތަކެއް ލިބި ނުފީނޭ ހާލަތުގައި އޮއްވާ، ފޯ ސީޒަން ކުޑަހުރާ ރިސޯޓުގެ ފްލައިން ޓަރޓަލް ޕްރޮގްރާމްގެ ދަށުން، ރިހެބިލިޓޭޓް ކުރުމަށްފަހު ކަންޑަށް ދޫކޮށްލި ވެލާ މިހާރު ރާއްޖޭގެ ކަނޑުގެ ސަރަހައްދު ފަހަނައަޅާ ގޮސް ބޭ އޮފް ބެންގާލްއަށް ދަތުރުކޮށްފިއެވެ.
25 އޮގަސްޓު 2014 ގައި މާލެ އަތޮޅުގެ އުތުރުން ކުރަމަތި އައިލެންޑް ރިސޯޓާއި ދިމާލުން، ގިނަ އަނިޔާތަކަކާއެކު ފެނުނު މި ވެލައަކީ "ޕެގީ" ގެ ނަމުން ނަންދީފައިވާ ވަރަށް ހާއްސަ ވެލައެއްގެ ގޮތުގައި ކުޑަހުރާ ރިސޯޓުން ވަނީ ސިފަކޮށްދީފައެވެ.
ޕެގީ ކަނޑަށް ދޫކޮށްލިއިރު އޭތި ދާނުދާ ދިމައެއް ބެލުމަށްޓަކައި، އޭގެ ބުރަކަށީގައި ވަނީ ޓްރެކިންގ ޑިވައިސްއެއް ހަރުކޮށްފައެވެ. ޕެގީ، ރާއްޖޭގެ ކަނޑު ހުރަސްކޮށް ބޭ އޮފް ބެންގަލް އަށް ދިޔަކަން އެނގިފައިވަނީ އެ ޓްރެކިންގ ޑިވައިސްގެ ސަބަބުންނެވެ.
ޕެގީ އަކީ އޭތީގެ ވާތު އުރަފަތް ހަލާކުވެގެން އަޑިއަށް ނުފީނޭ ހާލަތަށް ބަލިވެފައިވާތީ 2016 ވަނަ އަހަރު، ބެލްޖިއަމްގައި ހުންނަ ޕެއަރި ޑެއިޒާ ޒޫ އަށް ރިހެބިލިޓޭޓް ކުރުމަށް ފޮނުވާލެވުނު ވެލައެކެވެ. އޭތި ފުރަތަމަ ފެނިފައިވަނީ މަސްވެރިކަން ކުރާ ނެޓެއްގައި ހައްޔަރު ވެފައި އޮއްވާ މާލެ އަތޮޅުންނެވެ. އަދި ޕެއަރި ޑެއިޒާ ޒޫއިން ނިންމީ ޕެގީއަކީ ރާއްޖެއަށް އެރި ވެލައެއްކަމުން އަލުން އަނބުރާ ކަނޑަށް ދޫކޮށްލަން ވާނީ ވެސް ރާއްޖެއިން ކަމަށެވެ.
ކުޑަ ހުރާ ރިސޯޓުގެ ޑިސްކަވަރީ ސެންޓަރުގެ މެނޭޖަރު އެލެހަންޑްރާ ކަރވާލޯ ވިދާޅުވީ ޕެގީ ފަދަ ދިރުންތަކަށް މިފަދަ ގޮތްގޮތުން ހިމާޔަތްކަން ދިނުމަކީ އެމީހުންގެ އަމާޒެއް ކަމަށާއި ޕެގީގެ ހާލަތު މުޅިން ރަނގަޅުވެ އަލުން އޭތީގެ އަމިއްލަ މާހައުލަށް ދޫކޮށްލެވުމަކީ ވަރަށް އުފާވެރި ކަމެއް ކަމަށެވެ.
ކުޑަ ހުރާ ރިސޯޓުގެ ފްލައިން ޓާޓަލް ޕްރޮގްރާމް ގެ ދަށުން އިތުރު ވެލާތަކަށްވެސް މިގޮތަށް ހިމާޔަތްކަން ދިނުމުގައި ކުރިއަށް ދާނެ ކަމަށް އެ ރިސޯޓުން ވަނީ ބުނެފައެވެ..
