ރާއްޖޭގަ އެމްބަސީ ހަދަން ބިން ދޫކުރިޔަސް އެބިމުގެ މިލްކުވެރިކަމެއް ނުލިބޭނެ: މިނިސްޓަރ ޝާހިދު

އެހެން ގައުމުތަކުގެ އެމްބަސީތައް ރާއްޖޭގައި ހަދަން ބިން ދޫކުރިނަމަވެސް އެ ބިމުގެ މިލްކުވެރިކަން އެ ގައުމުތަކަށް ނުލިބޭނެ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މިނިސްޓަރ ޝާހިދު ވިދާޅުވީ ރާއްޖޭގައި އެހެން ގައުމުތަކުގެ އެމްބަސީތައް އަޅަން ބިން ދޫކުރަން ހަމަޖެހިފައިވީނަމަވެސް އޭގެ މާނައަކީ އެބިމުގެ މިލްކުވެރިކަން އެ ގައުމަކަށް ދެނީ ނޫން ކަމަށެވެ.

އޭނާ ވިދާޅުވީ އުސޫލުގައި އޮންނަގޮތުން، މިފަދަ ކަމަކަށް ރާއްޖެއިން ބިން ދޫކުރެވޭނީ އެގައުމަކުން ވެސް ރާއްޖެއަށް ބިން ދޫކުރުމުން ކަމަށެވެ. އަދި ވޭތުވެދިޔަ ސަރުކާރުތަކުން ރާއްޖޭގައި އެމްބަސީތައް އެޅުމަށް ބައެއް ގައުމުތަކަށް ބިން ދޫކޮށްފައިވާކަމަށެވެ. އެގޮތުން، އިންޑިއާ، ޗައިނާ އަދި ސްރީލަންކާއަށް ބިން ދޫކޮށްފައިވާ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، މިނިސްޓަރ ޝާހިދު ވިދާޅުވީ އެމްބަސީ އެޅުމަށް މާލެއިން ދީފައިހުރި ބިންތައް، ހުޅުމާލޭގެ ބިންތަކަށް ބަދަލުކޮށްދިނުމަށް އެ ގައުމުތަކުން އެދުނު ކަމަށެވެ. އަދި ބިންތައް ދީފައި ހުރީ ހުޅުމާލޭގެ ދެވަނަ ފިޔަވަހި ތަރައްގީވާން ފެށުމުގެވެސް މާ ކުރިން ކަމަށާއި އޭރު ބިންތައް ދޫކުރިއިރު ބިންތައް ދީފައިހުރީ އެކި ސަރަހައްދުތަކުން ކަމަށެވެ. އެގޮތުން ސައުދީ އަރަބިއާއަށް ތިން ބިމެއް ދޫކޮށްފައިވާކަމުގައި ވިދާޅުވިއެވެ. އެ ތިން ބިމަކީ ސައުދީގެ އެމްބަސީއެއް ރާއްޖޭގައި އެޅުމަށާއި އެގައުމުން ރާއްޖެއަށް ކަނޑައަޅާފައި ހުންނަވާ ސަފީރު ހުންނަވަން ބިމެއްގެ އިތުރުން އެމްބަސީގައި މަސައްކަތް ކުރާ މުވައްޒިފުން ތިބޭނެ ބިމެކެވެ.

ރައީސް އިބްރާހިމް މުހައްމަދު ސޯލިހުގެ ސަރުކާރުގެ ވިސްނުމުގައި އޮތީ ދުނިޔޭގެ އެހެން ގައުމުތަކުގަ ވެސް ކަން ކުރާ ގޮތަށް، ވަކި ސަރަހައްދެއް އެމްބަސީތައް ހުންނަ ސަރަހައްދެއްގެ ގޮތުގައި ކަނޑައަޅައި އެތަނުން ބިން ދޫކުރުން ކަމަށް މިނިސްޓަރ ޝާހިދު ވިދާޅުވިއެވެ. އޭގެ ބޭނުމަކީ ބައިނަލް އަގްވާމީ ކޮންވެންޝަންތަކާއި އެއްގޮތަށް އެމްބަސީތަށް ހިމާޔަތްކޮށް ރައްކާތެރިކުރުން ކަމަށާއި ރާއްޖޭގައި ހުންނަ ކޮންވެންޝަންތަކަށް ރައްކާތެރިކަން ދިނުމަކީ ރާއްޖޭގެ އަތްމަތީއޮތް ކަމެއް ކަމަށް އޭނާ ވިދާޅުވިއެވެ.

މީގެއިތުރުން އިންޑިއާ އެމްބަސީއަށް ހުޅުމާލެއިން ބިމެއް ކަނޑައަޅާ އެތަނުގައި ބިންގާ އަޅާފައިވާކަމަށާއި ސްރީލަންކާއަށާއި ބަންގްލަދޭޝްއަށް ވެސް އެ ސަރަހައްދުން ބިން ކަނޑައަޅާފައި ވާކަމަށް މިނިސްޓަރ ވަނީ ވިދާޅުވެފައެވެ. އަދި ޗައިނާ ސަރުކާރަށްވެސް ލަސްނުވެ ބިން ދޫކުރުމުގެ ކަންތައް ހަމަޖެހިގެންދާނެ ކަމަށް ވެސް މިނިސްޓަރ ވިދާޅުވިއެވެ.