9 ތަނެއް ފާސްކުރި، އެއްވެސް މީހަކު ހައްޔަރެއް ނުކުރޭ: ފުލުހުން
11 ސެޕްޓެމްބަރު 2019 | ބުދަ 07:40އެއީ މާލެ ސިޓީއިން 8 ތަނަކާއި އައްޑޫ ސިޓީގެ 1 ތަން
ފުލުހުން
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަނުން ތަހުގީގު ކުރަމުންދާ މައްސަލަތަކާ ގުޅިގެން އަންގާރަ ދުވަހު ފުލުހުން ހިންގި އޮޕަރޭޝަންގައި އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެފިއެވެ.
ފުލުހުންގެ މިޑީއާ އޮފިޝަލް ރާއްޖެއެމްވީ އަށް މައުލޫމާތު ދެެއްވަމުން ވިދާޅުވީ އޮފަރޭޝަންގައި ބަލާ ފާސްކުރެވިފައިވަނީ ޖުމްލަ 9 ތަނެއް ކަމަށެވެ. އެއީ މާލެ ސިޓީއިން 8 ތަނަކާއި އައްޑޫ ސިޓީގެ 1 ތަނެވެ.
މި އޮޕަރޭޝަނަކީ ތަހުގީގު ކުރަމުންދާ މައްސަލަތަކާއި ގުޅިގެން ކޮމިޝަނުން ބަލާފާސްކުރަން ބޭނުންވާ ތަންތަނާއި މީހުން ބާލާފާސްކުރުމަށް ކުރިއަށް ގެންދާ އޮޕަރޭޝަނެއް ކަމަށް ފުލުހުން ބުނެފައިވާއިރު މި ތަންތަނާއި މީހުން ބަލާފާސްކުރަނީ ކޮމިޝަނުގެ އެދުމަށް ކޯޓުން ނެރެފައިވާ އަމުރުތައް ތަންފީޒުކުރުމަށް ކަމަށްވެސް ވަނީ ބުނެފައެވެ.
މި އޮޕަރޭޝަން ކުރިއަށް ގެންދަނީ ފުލުހުންގެ ކްރިމިނަލް އިންވެސްޓިގޭޝާން ކޮމާންޑާއި، ފޮރެނސިކް ސަރވިސް ޑިޕާރޓްމެންޓާއި ޑިވިޒަނަލް ޕޮލިސިންގ ކޮމާންޑުންނެވެ.
